កំពង់ធំៈ នេះជាអំណោយផ្ទះលើកទី៦១ហើយ ដែលបានសាងសង់ដោយ សមាគមអតីយុទ្ធជនកម្ពុជាខេត្ត និងជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធាសមាគមអតីតយុទ្ធជនកម្ពុជា ផ្តល់ជូនដល់អតីតយុទ្ធជនកម្ពុជា ដែលកំពុងតែរស់នៅក្នុងភូមិសាស្រ្តខេត្តកំពង់ធំ។
ជាក់ស្តែងឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធាន អតីតយុទ្ធជនកម្ពុជាខេត្តកំពង់ធំ បានដឹកនាំសហការី ចុះប្រគល់ផ្ទះមួយខ្នង ដែលជាអំណោយលើកទី៦១ របស់សម្តេច តេជោ ហ៊ុន សែន ប្រធានសមាគមអតីតយុទ្ធជនកម្ពុជា ប្រគល់ជូនអតីតយុទ្ឋជនពិការឈ្មោះថោង ធីម រស់នៅភូមិបល្ល័ង្កខាងលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ។
ឧត្តមសេនីយ៍ត្រី សោម ស៊ុន បានមានប្រសាសន៍ថា ដោយបានអនុវត្តតាមការណែនាំរបស់ឯកឧត្តមនាយឧត្តមសេនិយគន់ គីម អគ្គមេបញ្ជាការរងនាយសេនាធិការចម្រុះ នៃកងយោធពលខេមរភូមិមិន្ទ និងជាអគ្គលេខាធិការសមាគមអតីតយុទ្ធជនកម្ពុជា បានសាងសង់រួចរាល់នៅល្ងាចថ្ងៃទី០២ខែមិនា ឆ្នាំ២០១៨ និងបាន ប្រគល់ជូនអតីតយុទ្ធជនពិការ ឈ្មោះថោង ធីម ។
លោកព្រឹន្ទបាលឯកថោង ធីម អាយុ៥៨ឆ្នំា ចូលបម្រើក្នុងជួរកងទ័ពនៅឆ្នាំ១៩៧៩ក្នុងអង្គភាពវរសេនាតូចលេខ១៩ដំបូងគេបង្អស់ដែលបានសហការជាមួយកងទ័ពស្ម័គ្រចិត្តវៀតណាមវាយផ្ដួលរំលំរបបប្រល័យពូជសាសន៍ប៉ុលពត ហើយបានចូលមកកាន់កាប់ និងគ្រប់គ្រងកសាងពង្រឹងនៅខេត្តកំពង់ធំ នៅថ្ងៃទី៩ខែមករា ឆ្នាំ១៩៧៩ ក្រោយមកត្រូវរបួសពិការ នៅសមរភូមិ ចុងដា ឃុំត្បូងក្រពើ ស្រុកសន្ទុក ខេត្តកំពង់ធំ នៅឆ្នាំ១៩៨១ ហើយផ្ទេរទៅបម្រើការងារនៅមន្ទីរសង្គមកិច្ចខេត្តកំពង់ធំនៅឆ្នាំ១៩៨៦ ។
លោកថោង ធីម មានសមាជិក ១១នាក់ កូនប្រុសស្រី ហើយកូន៩ នាក់ បានចុះបោះឆ្នោតរួចហើយ បច្ចុប្បន្នប្រកបមុខរបររត់ម៉ូតូឌុប គួបផ្សំនិងប្រាក់បៀវត្សប្រចាំខែដែលរាជរដ្ឋាភិបាលផ្តល់ជូនគាត់ចំនួន ៤៥០,០០០រៀល ក្នុងមួយខែផងដែរ ចំនែកនៅថ្ងៃនេះគ្រួសារលោក ថោង ធីម បានទទួលផ្ទះថ្មីនេះមានទំហំ ៤x៦ ម ចំណាយថវិកាសាងសង់គិតទាំងថ្លៃឈ្នួលជាងផងសរុប ៥,៩៨៧,០០០ រៀល ក្នុងពិធីប្រគល់ផ្ទះថ្មី ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភបន្ថែមអង្ករចំនួន ៥០ គីឡូក្រាម មីម៉ាម៉ា២កេស ទឹកត្រីទឹកស៊ីអ៊ីវពីរយួរ មុងជ្រលក់ថ្នាំចំនួន១ និងថវិកាចំនួន២៥០,០០០រៀល ។
លោកថោង ធីម និងភរិយា ព្រមទាំងក្រុមគ្រួសារ និងអាជ្ញាធរដែនដី ភូមិ សង្កាត់ ដែលបានចូលរួមក្នុងកម្មវិធីនេះ បានគោរពថ្លែងអំណរគុណនិងជូនពរចំពោះសម្តេចតេជោហុ៊ន សែន និងសម្តេចកិតិព្រឹទ្ឋបណ្ឌឹត ព្រមទាំងបុត្រាបុត្រី ចៅប្រុសចៅស្រី សូមមានសុខភាពល្អអាយុយឺនយូរកម្លាំងមាំមួនប្រាជ្ញាឈ្លាវវ័យដើម្បីបន្តដឹកនាំនាវាកម្ពុជាក្នុងសន្តិភាព និងការអភិវឌ្ឍន៍ ហើយសូមប្តេជ្ញាចិត្តគោរពគាំទ្រសម្តេចជារៀងរហូតលុះអវសានជីវិត ។ ដោយ ប៊ុន រដ្ឋា
