កំពង់ធំៈ ដើម្បីតបស្នងសងគុណអ្នកម្តាយថ្លៃ ដែលមានបុណ្យគុណដ៏ធំធេង បានផ្សេងព្រេងក្នុងជំនាន់បនក្បត់ប្រល័យពូជសាសន៍ប៉ុលពត រយះពេល៣ឆ្នាំ៨ខែ២០ថ្ងៃ អ្នកម្តាយជាទីស្រឡាញ់ បានប្រាប់ខ្ញុំថា ត្រូវបានពួកត្បិលចង្រៃគំរាមគំហែង ធ្វើបាបទាំងកំលាំងចិត្តកំលាំងកាយ បង្អត់អាហារ បង្ខំធ្វើការជាទម្ងន់ ប្រធានកងដែលគម្រាមយកខ្ញុំទៅសម្លាប់ បើសិនជាសម្លាប់កូនខ្ញុំ សុំ
យកខ្ញុំទៅសម្លាប់ជំនួសកូនខ្ញុំចុះ ពាក្យពេចន៍ដ៏មានតម្លៃមិនអាចកាត់ថ្លៃបាននេះ ធ្វើឲ្យខ្ញុំមិនអាចបំភ្លេចបានទេ ទីបំផុតអ្នកម្តាយដែល បានក្លាយខ្លួនជាស្រ្តីម៉េម៉ាយបាន អោបក្រសោបកូនៗក្នុងការចិញ្ចឹមបីបាច់ថែរក្សា រហូតផ្តល់ការសិក្សាបំរើជាតិមាតុភូមិរហូតមកដល់សព្វថ្ងៃនេះ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានរៀបចំប្រារព្ធវិធីបុណ្យចម្រើនព្រះជន្មជូនអ្នកម្តាយ ឈ្មោះ ហ៊ុល រ៉េន ដែលមានជន្មាយុគម្រប់៧៩ឆ្នាំ ឈានចូលដល់៨០ឆ្នាំ នៅរសៀលថ្ងៃទី០៣ខែមិនាឆ្នាំ២០១៨ នៅគេហដ្ឋានលោកវរសនីយទោ សោម កុសល្យ នៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ដើម្បីជាការដឹងគុណចំពោះអ្នកមានគុណដែលបានផ្ដល់ជីវិតឲ្យកូន និងមើលថែទាំបីបាច់ថែរក្សាកូនៗរហូតដល់មានចៅដែលជាទីស្រឡាញ់ទាំងអស់រហូតដល់ថ្ងៃនេះ ។
លោកយាយហ៊ុល រ៉េន ជាស្ត្រីមេម៉ាយ ស្វាមីរបស់គាត់ត្រូវបានពួកឃាតករអាវខ្មៅយកទៅសម្លាប់ចោលយ៉ាងសាហាវព្រៃផ្សៃនៅដើមឆ្នាំ១៩៧៧ នៅក្នុងរបបប្រល័យពូជសាសន៍ប៉ុលពតដោយចោទថាជាខ្មាំង នៅចុងឆ្នាំ១៩៧៧ កូនប្រុសជាទីស្រឡាញ់របស់គាត់ម្នាក់ទៀត ត្រូវពួកធ្មិល យកទៅសម្លាប់ម្នាក់ទៀត ដោយគ្រាន់តែលួចជីកដំឡូងដែលដាំបានដោយខ្លួនឯង ដើម្បីចម្អែតក្រពះបំបាត់ភាពស្រេកឃ្លានតែបុណ្ណោះ ។
ឧត្តមសេនីយ៍ សោម ស៊ុន បានបញ្ជាក់ថា លោកយាយហ៊ុល រ៉េន បានពុះពារតស៊ូគ្រប់បែបយ៉ាងដើម្បីចិញ្ចឹមបីបាច់ថែរក្សាកូនប្រុស២នាក់ រហូតដល់មានមុខមាត់បម្រើសង្គមជាតិនៅថ្ងៃនេះ ដែលបច្ចុប្បន្នគឺ រូបឯកឧត្តមផ្ទាល់ និងប្អូនប្រុសបង្កើតឈ្មោះ លោកវរសេនិយទោ សោម កុសល្យ ដែលបច្ចុប្បន្នជាមេបញ្ជាការផ្នែកសឹករងស្រុករវៀង ខេត្តព្រះវិហារ ។
ឯកឧត្តម សោម ស៊ុន បានបន្តថា ដើម្បីជាការដឹងគុណចំពោះអ្នកម្តាយខ្ញុំ ដែលបានលះបង់គ្រប់បែបយ៉ាងដែលបានបីបាច់មើលថែរក្សាកូនៗរហូតដល់មានចៅដែលជាទីស្រឡាញ់ទាំងអស់មកដល់ថ្ងៃនេះ និងសូមអគុណសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានរំដោះប្រជាពលរដ្ឋខ្មែរ និងបានផ្តល់ជីវិតថ្មីដល់គ្រួសារខ្ញុំ និងសូមប្តេជ្ញាស្មោះត្រង់ជានិច្ចគាំទ្រសម្តេចជានាយករដ្ឋមន្រ្តីនៃព្រះរាជា ណាចក្រកម្ពុជាគ្រប់អណ្ណត្តិបន្តទៀត។ ដោយ ប៊ុន រដ្ឋា
