កំពង់ធំ៖ ឯកឧត្តម សោម ស៊ុន មេបញ្ជាការងយោធភូមិភាគទី៤ បានមានប្រសាសន៍ថា ក្រៅពីការងារស្នូល របស់អង្គភាព គឺបានឆ្លៀតឳកាស ចុះធ្វើការងារមនុស្សធម៌ ក្នុងនោះបានផ្តោតទៅលើការងារអតីតយុទ្ធជន ដែលរស់នៅក្នុងភូមិសាស្រ្តខេត្តកំពង់ធំ មិនតែប៉ុណ្ណោះគឺបានជួយដល់ ប្រជាពលរដ្ឋ ដែលមានជីវភាពខ្វះខាត ទីទាល់ក្រ គ្មានជម្រកស្នាក់សមរម្យ និងត្រូវបានជួយសាងសង់ជម្រកស្នាក់នៅជូនប្រជាពលរដ្ឋ ។
ជាក់ស្តែង ប្រជាពលរដ្ឋឈ្មោះ ឈួន រូង អាយុ ៤៥ ឆ្នាំ មានភរិយា និងកូនចំនួន ០៦ នាក់ គ្មានជម្រកស្នាក់នៅពិតប្រាកដ ឯកឧត្តម សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងសប្បុរសជនជួយសាងសង់ជម្រកស្នាក់នៅជូន ដើម្បីឲ្យបានសមរម្យនឹងគេ ដោយសារតែ កន្លងមកគ្រួសារនេះ បានដើរសុំបងប្អូនជ្រកកោន បណ្តោះអាសន្ន ដោយការងារមិនមានជំហររ៉ឹងមាំ ដោយកន្លងមកបាន ធ្វើជាចំណាកស្រុកជាកម្មករនៅទីក្រុងភ្នំពេញ តែបច្ចុប្បន្នរស់នៅភូមិជីឱក ឃុំបារាយណ៍ ស្រុកបារាយណ៍ ខេត្តកំពង់ធំ។
បច្ចុប្បន្នលោក ឈួន រូង ប្រកបមុខរបរដើរស៊ីឈ្នួលបាញ់ថ្នាំ និងបាចជីស្រូវ ដើម្បីយកប្រាក់កម្រៃចិញ្ចឹមគ្រួសារ និងត្រូវបានទទួលជម្រកស្នាក់នៅថ្មី ដែលបានសាងសង់រួច និងបានប្រគល់ជូននៅព្រឹកថ្ងៃទី ២៣ ខែមិថុនា ឆ្នាំ២០១៨ ដែលមានទំហំ ៤មx៥ម ដែលបានចំណាយថវិកាក្នុងការសាងសង់អស់ទឹកប្រាក់ចំនួន២,៣៥០,០០០ រៀល ក្នុងឳកាសប្រគល់ផ្ទះថ្មីនេះ ឯកឧត្តមមេបញ្ជាការ ឧបត្ថម្ភបន្ថែមទៀតនូវ អង្ករចំនួន ៥០ គីឡូក្រាម , មីយើងចំនួន ០២ កេស , កន្ទេល ០១ , មុងចំនួន ០២ ចានស្រាក់ កំសៀវទឹក ចានឆ្នាំង ស្លាបព្រា កែវទឹក ។ ល។ និងថវិកាចំនួន២៥០,០០០រៀល ផងដែរ ។
ឯកឧត្តម និងក្រុមការងារទាំងអស់គ្នា សូមក្រាបថ្វាយបង្គំថ្លែងអំណរគុណ ចំពោះព្រះតេជគុណ ជរ សុចាយ ព្រះចៅអធិការវត្តឌួងសូរិយា ហៅវត្តក្តីដូង ដែលបានជួយឧបត្ថម្ភសម្ភារៈខាងលើនេះ និងសូមថ្លែងអំណរគុណចំពោះលោកស្រី គីម ហុង អាជីវករនៅទីក្រុងភ្នំពេញដែលបានជួយឧបត្ថម្ភថវិកាចំនួន១០០$ ក្នុងការចូលរួមចំណែកក្នុងការសាងសង់ផ្ទះនេះ ។
ដោយ ប៊ុន រដ្ឋា
