ខណៈកូរ៉េខាងត្បូងប្រកួតចាញ់អាល់ហ្សើរី៤-២ក្នុងពូលH ក្រុមបិសាចក្រហមទ្វីបអឺរ៉ុបប៊ែលហ្ស៊ិកបានឡើងទៅកាន់វគ្គ១៦ក្រុមចុងក្រោយហើយបន្ទាប់ពីបានយកឈ្នះ ក្រុមខ្លាឃ្មុំទឹកកករុស្ស៊ីក្នុងលទ្ធផលទាំងប្រផិតប្រផើយ១-០ ។ ក្រុមទាំងពីរមិនអាចធ្វើអ្វីគ្នាបានឡើយក្នុងតង់ទីមួយដោយ
បញ្ចប់ត្រឹមលទ្ធផល០-០ ។ ប៉ុន្តែចូលដល់តង់ទី២ការប្រកួតជិតនឹងបញ្ចប់ទៅហើយ កីឡាករ Divock Origi (ឌីវ៉ុក អូរីហ្គី) បានក្លាយជាវិរបុរសស៊ុតមួយគ្រាប់នៅនាទីទី៨៨ បានជួយឲ្យប៊ែលហ្ស៊ិកឈ្នះរុស្ស៊ី១-០ ។
លទ្ធផលនេះបានជួយឲ្យប៊ែលហ្ស៊ិកឈរនៅកំពូលតារាងពូលHដោយមាន៦ពិន្ទុហើយឆ្លងទៅវគ្គ១៦ក្រុមចុងក្រោយ ។ ចំណែកឯការប្រកួតមួយគូទៀតរវាងកូរ៉េខាងត្បូងនិងអាល់ហ្សើរីគឺបញ្ចប់ដោយលទ្ធផលអាល់ហ្សើរីឈ្នះកូរ៉េខាងត្បូង៤-២ ។ អាល់ហ្សើរីរកបាន៣គ្រាប់មុននៅតង់ទី១ហើយកីឡាករ៣នាក់ផ្សេងគ្នាគឺ Islam Slimani (អ៊ីស្លាម ស្លីម៉ានី) នៅនាទី ២៦, កីឡាករ Rafik Halliche (រ៉ាហ្វីក ហាលីឆេ) នៅនាទី ២៨ និងកីឡាករ Abdelmoumene Djabou (អាប់ដេលមូមីណេ ចាប៊ូ) នៅនាទី៣៨ ។ ចប់តង់ទី១អាល់ហ្សើរីនាំមុខកូរ៉េខាងត្បូង៣-០ ។
ការប្រកួតបានឈានចូលនាទីទី៥០នៃតង់ទី២ទើបកីឡាកររបស់កូរ៉េខាងត្បូង Heung-Min Son (ហួង មីន សុន) រកបាន១គ្រាប់វិញ ។ នៅនាទីទី៦២ កីឡាករ Yasine Brahimi (យ៉ាស៊ីន ប្រាហ៊ីមី) រកគ្រាប់ទី៤ឲ្យអាល់ហ្សើរីនាំមុខ៤-១ ប៉ុន្តែមកដល់នាទីទី៧២កីឡាករ Ja-Cheol Koo (ចា ឈុលគូ) ជួយឲ្យកូរ៉េខាងត្បូងតាមបាន២-៤ ។ លុះចប់ការប្រកួតកូរ៉េខាងត្បូងចាញ់អាល់ហ្សើរី៤-២ ។ នៅក្នុងពូលHនេះ ក្រុមប៊ែលហ្ស៊ិកបានឡើងទៅវគ្គបន្ទាប់មុនគេដោយមាន៦ពិន្ទុឈរកំពូលតារាងខណៈក្រុមលេខ២គឺអាល់ហ្សើរី មាន៣ពិន្ទុ ចំណែកកូរ៉េខាងត្បូង និងរុស្ស៊ីមាន១ពិន្ទុដូចគ្នា ហើយក្រុមទាំងបីនេះកំពុងតែប្រជែងគ្នាត្រូវការឈ្នះរៀងខ្លួន ៕ 
