កំពង់ធំ៖ ប្រធានសមាគមអតីតយុទ្ធជនកម្ពុជាខេត្តកំពង់ធំ បានអញ្ជើញចុះសួរសុខទុក្ខ អតីតយុទ្ធជនពិការ ចំនួន៣២នាក់ ដែលកំពុងតែរស់នៅក្នុងស្រុកសន្ទុក ខេត្តកំពង់ធំ នៅផ្នែកសឹករងស្រុកសន្ទុក នៃបញ្ជាការដ្ឋានតំបន់ប្រតិបត្តិការសឹករងកំពង់ធំ នៅរសៀលថ្ងៃទី ២៤ ខែកក្កដា ឆ្នាំ២០១៨ ស្ថិតក្នុងភូមិប្រាសាទ ឃុំប្រាសាទ ស្រុកសន្ទុក ខេត្តកំពង់ធំ ។
ឧត្តមសេនីយ៍ទោ សោម ស៊ុន បានយកចិត្តទុកបំផុត មកលើជីវភាពរស់នៅ និងបញ្ហាសុខភាព រួមទាំងការប្រកបមុខរបរចិញ្ចឹមជីវិតរបស់អតីតយុទ្ធជន និងបានផ្តាំផ្ញើរដល់អតីតយុទ្ធជនគ្រប់រូប រក្សាសុខភាព បើមាន ជំងឺត្រូវរាយការណ៍ជូនប៉ុស្តិ៍នគរបាលតាមបណ្តាឃុំ សង្កាត់ដើម្បីដោះស្រាយ ឬអាចមកទទួលការព្យាបាល ជំងឺដោយឥតគិតថ្លៃ នៅគិលានដ្ឋានរបស់បញ្ជាការដ្ឋានតំបន់ប្រតិបត្តិការសឹករងកំពង់ធំដែលមានទីតាំងនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ក្នុងឳកាសនេះផងដែរ ឯកឧត្តម សោម ស៊ុន បានមានប្រសាសន៍ថា ក្រោមការណែនាំចង្អុលបង្ហាញពីសំណាក់ឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា បានយកចិត្ត ទុកដាក់ចំពោះអតីតយុទ្ធជនដែលមានជីវភាពខ្វះខាត ជម្រកស្នាក់នៅ ឬមានផ្ទះមិនសមរម្យ ត្រូវបាន សម្តេចតេជោ ហ៊ុន សែន ជាប្រធានសមាគមអតីតយុទ្ធជនកម្ពុជា ជួយសាងសង់ផ្ទះជូន អតីតយុទ្ធជន ដែលមានជីវភាពខ្វះខាតឲ្យមានជម្រក់ស្នាក់នៅសមរម្យនឹងគេ ។
ឧត្តម សោម ស៊ុន បានអំពាវនាវ ឲ្យអតីតយុទ្ធជនទាំងអស់ រួមទាំងសាច់ញាតិទៅចូលរួមបោះឆ្នោតអោយបានគ្រប់ៗគ្នា ដើម្បីជ្រើសរើសគណបក្សណាដែលបងប្អូនស្រឡាញ់ និងជឿទុកចិត្ត និងកុំចាញ់ការឃោសនារបស់ជនអគិតទាំងឡាយ ដែលរារាំងបងប្អូន មិនអោយទៅបោះឆ្នោត ។
ដោយ ប៊ុន រដ្ឋា
