កំពង់ធំ៖ អតីតសមាជិកគណបក្សសង្រ្គោះជាតិ ចំនួន១៦៦នាក់ ក្រោយពីបានឃើញ គោលនយោបាយ ដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលមានសម្តេចតេជោ ជាប្រធានដឹកនាំនាវាសន្តិភាព ឆ្ពោះទៅកាន់ភាពរីកចំរើន ប្រកបដោយគុណធម៌ ទើបបងប្អូនដែលជាអតីតសមាជិកគណបក្សសង្រ្គោះជាតិ បានសម្រេចចិត្តដ៏ត្រឹមត្រូវ ស្ម័គ្រចិត្តចូលរួមជីវភាពនយោបាយ ជាមួយគណបក្សប្រជាជនកម្ពុជា ដើម្បីរួមគ្នា អភិវឌ្ឍន៍ប្រទេស ។
ពិធីបញ្ចូលសមាជិក សមាជិកា គណបក្សប្រជាជនកម្ពុជាថ្មី ចំនួន ១៦៦ នាក់ ត្រូវបានធ្វើឡើងនៅ ព្រឹកថ្ងៃទី២៥ ខែកក្កដា ឆ្នាំ២០១៨ នៅឃុំបន្ទាយស្ទោង ស្រុកស្ទោង ខេត្តកំពង់ធំ ក្រោមអធិបតីភាព ឯកឧត្តម សោម ស៊ុន សមាជិកអចិន្រ្តៃគណបក្សខេត្ត អនុប្រធានក្រុមការងារចុះជួយស្រុកស្ទោង រួមទាំង គណៈកម្មាធិការគណបក្សឃុំបន្ទាយស្ទោង និងអតីតគណបក្សសង្រ្គោះជាតិទាំង ១៥ភូមិ ចូលរួម ដោយស្របតាមលក្ខន្តិកៈ និងបទបញ្ជាផ្ទៃក្នុងរបស់គណបក្សប្រជាជនកម្ពុជា។
ឯកឧត្តម សោម ស៊ុន ប្រធានក្រុមការងារចុះជួយឃុំបន្ទាយស្ទោង បានកោតសរសើរចំពោះការសម្រេចចិត្ត របស់បងប្អូនទាំង ១៦៦នាក់ ដែល បានស្ម័គ្រចិត្តចូលរួមកសាងប្រទេសជាមួយគ្នា បំរើជាតិបំរើប្រជាជនពិត ប្រាកដ ក្រោមការដឹកនាំដោយសម្តេចអគ្គមហាសេនាបតីតេជោ ហ៊ុន សែន និងគាំទ្រសម្តេចបន្តដឹកនាំប្រទេសជាតិបន្តទៀត ហើយសូមកុំជឿលើការឃោសនាបោលបញ្ឆោតរបស់ក្រុមអគតិ ដែលមានបំណង បំផ្លិចបំផ្លាញសេចក្តីសុខ របស់បងប្អូន ។
ក្នុងឳកាសនោះដែរ បងប្អូនដែលបានមករួមរស់ជីវភាពនយោបាយ បានប្តេជ្ញាចិត្តសាមគ្គីឯកភាពគ្នាជាសាច់ជាឈាមជាមួយគណបក្សប្រជាជនកម្ពុជា និងប្តេជ្ញាចិត្តទៅចូលរួមបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ ដើម្បីបំពេញសិទ្ធិរបស់ខ្លួន នៅពេលខាងមុខនេះ ។
ដោយ ប៊ុន រដ្ឋា
