កំពង់ចាម: ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល អមដំណើរដោយ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម និងមន្ត្រីពាក់ព័ន្ធជាច្រើនរូបទៀត នាព្រឹកថ្ងៃទី២១ ខែសីហា ឆ្នាំ២០១៨នេះ បានអញ្ជើញចុះសាកសួរសុខទុក្ខ និងព្យាបាលជម្ងឺ ប្រជាពលរដ្ឋដែលរងគ្រោះដោយទឹកជំនន់ នៅទីទួលសុវត្ថិភាព(ទួលបេង) ស្ថិតក្នុងភូមិកំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម ព្រមទាំងចែកជូនអំណោយជាមុងន-ភួយ ទាំង៣៥០គ្រួសារផងដែរ។ 
ឆ្លៀតក្នុងឱកាសនោះដែរ ឯកឧត្ដម ម៉ម ប៊ុនហេង រដ្ឋមន្ត្រីក្រសួងសុខាភិបាល បានពាំនាំមកនូវការសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះ បងប្អូនប្រជាពលរដ្ឋ ដែលរងគ្រោះដោយធម្មជាតិទឹកជំនន់ ជាមួយគ្នានោះដែរ ឯកឧត្តមរដ្ឋមន្ត្រី បានមានប្រសាសន៍អប់រំសុខភាពដល់បងប្អូនប្រជាពលរដ្ឋ ស្តីពី ប្រការដែលគ្រួសារនីមួយៗត្រូវអនុវត្តន៍ មុនពេល អំឡុងពេល និងក្រោយពេលមានទឹកជំនន់ ជាពិសេស ហូបស្អាត ផឹកស្អាត រស់នៅស្អាត ដោយមានសៀវភៅភ្ជាប់ជាមួយ ព្រមទាំងបង្ហាញផ្ទាល់ពីរបៀបលាយថ្នាំក្លរ៉ាមីនជាមួយទឹក២០លីត្រ និងបន្តក់គ្រាប់ថ្នាំជីវជាតិអា ដោយផ្ទាល់ដល់កុមារចំនួន១៥៨នាក់ ហើយក៏មានការពិនិត្យ និងព្យាបាលជម្ងឺជូនដល់ប្រជាពលរដ្ឋ សរុប២១៩នាក់ ផងដែរ។
ជាមួយគ្នានោះដែរ ឯកឧត្តម គួច ចំរើន អភិបាលខេត្តកំពង់ចាម បានធ្វើការអំពាវនាវ ដល់បងប្អូនប្រជាពលរដ្ឋទាំងអស់ ត្រូវប្រុងប្រយ័ត្នចំពោះគ្រោះធម្មជាតិដោយទឹកជំនន់នេះ គឺត្រូវឲ្យមានការប្រុងប្រយ័ត្នខ្ពស់ ចំពោះហេតុការណ៍ចៃដន្យណាមួយ ដែលបណ្តាលឲ្យប៉ះពាល់ដល់អាយុជីវិត ពិសេសប្រុងប្រយ័ត្នខ្ពស់ចំពោះ កុមារ ជនពិការ និងចាស់ជរា។ ព្រមទាំងមានការប្រុងប្រយ័ត្នចំពោះសត្វពស់ និងសត្វអសិរពិសនានាចឹក ក្នុងករណីបើមានសត្វអសិរពិសចឹក សូមបញ្ជូនជនរងគ្រោះជាបន្ទាន់ទៅកាន់មន្ទីរពេទ្យបង្អែក ដែលនៅជិតបំផុត ព្រោះមានក្រុមគ្រូពេទ្យ និងឱសថគ្រប់គ្រាន់សម្រាប់ធ្វើការព្យាបាលភ្លាមៗ យ៉ាងមានប្រសិទ្ធភាពបំផុត ៕
