កំពង់ធំ៖ ឯកឧត្តម ឧត្តមសេនីយ៍ទោ សោម ស៊ុន មេបញ្ជការងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានអញ្ជើញសម្ពោធផ្លូវលំដែលមានប្រវែង335ម បន្ទាប់មានការខូចខាតយ៉ាងដំណំ ក៏ ត្រូវបានជួសជុលឡើងវិញ បានចំណាយថវិការ អស់ចំនួន៦,២៨០,០០០រៀល និងដាក់ឲ្យប្រើប្រាស់ ជាផ្លូវការ ជូនបងប្អូនប្រជាពលរដ្ឋ រស់នៅភូមិថ្នល់ ឃុំទ្រៀល ស្រុកបារាយណ៍ ខេត្តកំពង់ធំ ។
ពិធីសម្ពោធផ្លូវលំក្រាលគ្រួសក្រហមនេះ ក្រោមអធិតីភាពឯកឧត្តម សោម ស៊ុន អនុប្រធានគណៈបញ្ជាការឯកភាពរដ្ឋបាលខេត្តកំពង់ធំ ដោយមានការចូលរួម កងកម្លាំងទាំង៣ប្រភេទ ពីលោកយាយ លោកតា ប្រជាពលរដ្ឋ និងប្រជាការពារ រួមទាំងកងកម្លាំងក្នុងពិធី សំណេះសំណាលជាង២០០នាក់ នៅថ្ងៃទី២៤ខែសីហាឆ្នាំ២០១៨។
ក្នុងឳកាសនោះ ឯកឧត្តម ឧត្តមសេនីយ៍ទោ សោម ស៊ុន បានប្រគល់ វិទ្យុទាក់ទងចំនួន5 គ្រឿង ជូនប្រជាការពារសម្រាប់បំរើការងារ ការពារសន្តិសុខជូនប្រជាពលរដ្ឋ ក្រោមការឧបត្ថម្ភ ព្រះអង្គព្រះនាម ចែម មុន្នី ចិន្តា ព្រះគ្រូចៅអធិការវត្តពោធិវង្ស ហត្ថី ហៅវត្តពោធិ ដែលព្រះអង្គរមានការព្រួយពីសន្តិសុខ សុវត្តិភាពរបស់ប្រជាពលរដ្ឋ និងចូលរួមឧបត្ថម្ភវិទ្យុទាក់ទង ដើម្បីសម្រួលការងារទំនាក់ទំនងឲ្យបានឆាប់រហ័ស ដើម្បី ទុកស្កាត់នូវ បញ្ហាអសន្តិសុខក្នុងភូមិ។
ឧត្តម ឧត្តមសេនីយ៍ទោ សោម ស៊ុន បានគោរពនិងថ្លែងអំណរគុណ ចំពោះបងប្អូនប្រជាពលរដ្ឋ ដែលរស់នៅភូមិថ្នល់ បាននាំគ្នាទៅបំពេញកាតព្វកិច្ចជាប្រជាពលរដ្ឋខ្មែរ បោះឆ្នោតជូនសម្តេចតេជោ ហ៊ុន សែន ឲ្យបន្តដឹកនាំនាវាសន្តិភាព នឹងការអភិវឌ្ឍន៍ នូវអណត្តិទី៦នេះបន្តទៀត ឯកឧត្តម បានសំនូមពរឲ្យប្រជាការពារ ទាំងអស់គោរពច្បាប់ អនុវត្តច្បាប់នៃព្រះរាជាណាចក្រកម្ពុជា ដោយតួនាទីភារកិច្ចប្រជាការពារមិនត្រូវ កាងបទល្មើស យកតួនាទីទៅគំរាមគំហែងប្រជាពលរដ្ឋ និងពុំមានសិទ្ធក្នុងការចាប់ចង និងឃុំឃាំងបុគ្គលណា ព្រោះពុំមែនជាមន្រ្តីនគរបាលយុត្តិធម៌ តែអាចសហការឃាត់ខ្លួនជនល្មើសប្រគល់ជូនសមត្ថកិច្ច ក្នុងនោះហាមពាក់ឯកសណ្ឋាន ឬស្លាកសញ្ញា កងម្លាំងជាដាច់ខាត ព្រោះជារឿងខុសច្បាប់ ម្យ៉ាងទៀតធ្វើឲ្យមាន ការយល់ច្រឡំដល់ប្រជាពលរដ្ឋ ។
ដោយ ប៊ុន រដ្ឋា 
