កំពង់ចាមៈ ឯកឧត្តម បណ្ឌិត ហ៊ុន ម៉ាណែត នាយរងសេនាធិការចម្រុះ និងជាមេបញ្ជាកងទ័ពជើងគោក(ស្តីទី) អមដំណើរដោយ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម និងលោកឧកញ៉ា លាង ឃុន អគ្គនាយកក្រុមហ៊ុនជីបម៉ុងគ្រប់ ព្រមទាំងឯកឧត្តម លោកជំទាវ លោក លោកស្រី ប្រធាន អនុប្រធានមន្ទីរ អង្គភាពពាក់ព័ន្ធជុំវិញខេត្ត ជាច្រើនរូបទៀត បាន
អញ្ជើញចុះសាកសួរសុខទុក្ខ សំណេះសំណាល និងនាំយកនូវអំណោយមនុស្សធម៌កាកបាទក្រហមកម្ពុជា ទៅចែកជូនដល់បងប្អូនប្រជាពលរដ្ឋចំនួន១.៥៣២គ្រួសារ ស្មើនឹង២ឃុំ គឺឃុំកោះសូទិន និងឃុំកំពង់រាប ស្រុកកោះសូទិន ខេត្តកំពង់ចាម ដែលកំពុងតែរងគ្រោះដោយទឹកជំនន់ទន្លេមេគង្គ នាព្រឹកថ្ងៃទី២៦ ខែសីហា ឆ្នាំ២០១៨។ 
ឆ្លៀតក្នុងឳកាសនោះដែរ ឯកឧត្តម បណ្ឌិត ហ៊ុន ម៉ាណែត បានពាំនាំនូវប្រសាសន៍ នៃការសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលសម្តេចតែងតែយកចិត្តទុកដាក់ ចំពោះសុខទុក្ខរបស់បងប្អូនប្រជាពលរដ្ឋ ដោយមិនគិតពីនិន្នាការនយោបាយអ្វីឡើយ។ ព្រមទាំងបានស្នើដល់អាជ្ញាធរ
ត្រូវជួយសង្គ្រោះដល់ពលរដ្ឋគ្រប់ពេលវេលា និងជួយសម្រាលនូវទុក្ខលំបាករបស់ពួកគាត់ រហូតដល់ពេលទឹកស្រកទៅវិញ គឺត្រូវបន្ដផ្គត់ផ្ដង់ ឬផ្ដល់នូវស្បៀង សម្ភារប្រើប្រាស់ ជូនដល់បងប្អូនប្រជាពលរដ្ឋយើង ឲ្យបានគ្រប់ៗគ្នា ព្រោះថា ផលដំណាំមួយចំនួន និងលំនៅឋានរបស់ពួកគាត់ ក៏ត្រូវបានខូតខាតផងដែរ។
អំណោយមនុស្សធម៌ដែលត្រូវចែកជូនដល់បងប្អូនប្រជាពលរដ្ឋនេះ ក្នុងមួយគ្រួសារៗ ទទួលបាន អង្ករ០១បេទម្ងន់៣០គីឡូក្រាម មី០១កេស ទឹកផ្លែឈើ០១កេស ត្រីខ១០កំប៉ុង និងថ្នាំពេទ្យចំនួន៦មុខផងដែរ។
បន្ទាប់ពីចែកអំណោយរួច ឯកឧត្តម បណ្ឌិត ហ៊ុន ម៉ាណែត និងឯកឧត្តម អភិបាលខេត្ត ព្រមទាំងប្រតិភូអមដំណើរ បានអញ្ជើញចុះពិនិត្យមើលស្ថានភាព ទឹកជំនន់លិចភូមិប្រជាពលរដ្ឋនៅក្នុងស្រុកកោះសូទិន ដែលមានភូមិទី៧ 
ភូមិទី៨របស់ឃុំកោះសូទិន ភូមិកោះថ្មី និងពិនិត្យមើលស្ថានភាពប្រជាពលរដ្ឋជម្លៀសសត្វពាហនៈទៅទីទួលសុវត្ថិភាព ហើយឯកឧត្តម ក៏មានប្រសាសន៍ផ្តាំផ្ញើដល់បងប្អូនប្រជាពលរដ្ឋ ស្តីពី ប្រការដែលគ្រួសារនីមួយៗត្រូវអនុវត្តន៍ ជាពិសេសនារដូវទឹកជំនន់នេះ គឺត្រូវហូបស្អាត ផឹកស្អាត រស់នៅស្អាត និងថែរក្សាកូន ចៅកុំឲ្យមានករណីលង់ទឹក និងត្រូវមានការប្រុងប្រយ័ត្នចំពោះសត្វពស់ ឬសត្វអសិរពិសនានាចឹក ក្នុងករណីបើមានសត្វអសិរពិសចឹក សូមបញ្ជូនជនរងគ្រោះជាបន្ទាន់ទៅកាន់មន្ទីរពេទ្យបង្អែក ដែលនៅជិតបំផុត ព្រោះមានក្រុមគ្រូពេទ្យ និងឱសថគ្រប់គ្រាន់សម្រាប់ធ្វើការព្យាបាលភ្លាមៗ យ៉ាងមានប្រសិទ្ធភាពបំផុត។ 
ដោយឡែក នាព្រឹកថ្ងៃទី២៦ ខែសីហា ដដែលនេះដែរ ឯកឧត្តម ហ៊ុន ណេង តំណាងរាស្ត្រមណ្ឌលកំពង់ចាម និងជាប្រធានកិត្តិយសសាខាកាកបាទក្រហមខេត្តកំពង់ចាម និងលោកជំទាវ អមដំណើរដោយមន្ត្រីពាក់ព័ន្ធ បានអញ្ជើញចុះសាកសួរសុខទុក្ខ សំណេះសំណាល និងនាំយកនូវអំណោយមនុស្សធម៌សាខា
កាកបាទក្រហមកម្ពុជាខេត្ត ទៅចែកជូនដល់បងប្អូនប្រជាពលរដ្ឋ ចំនួន២៤០២គ្រួសារ នៅក្នុងឃុំពាមកោះស្នា ស្រុកស្ទឹងត្រង់ ខេត្តកំពង់ចាម ដែលកំពុងរងគ្រោះដោយទឹកជំនន់ទន្លេមេគង្គ ក្នុងនោះក៏មាន ថ្នាំពេទ្យមួយចំនួនទៀត ប្រគល់ជូនដល់មណ្ឌលសុខភាពពាមកោះស្នា សម្រាប់ធ្វើការព្យាបាលដល់ពលរដ្ឋរងគ្រោះផ្សេងៗផងដែរ ៕
