ខេត្តកំពង់ធំ៖ ក្រោយពីក្លាយជាអតីតយុទ្ធជន លោកវរសេនីយ៍ទោ យ៉េត ហុន អាយុ៦៤ ឆ្នាំ ជាអតីតមេបញ្ជាការផ្នែកសឹករងសន្ទុក នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវបានសម្តេចតេជោ ហ៊ុន សែន តាមរយៈ ឯកឧត្តម នាយឧត្ដមសេនីយ៍ គន់ គីម បញ្ជាឲ្យគណៈកម្មាធិការសមាគមអតីតយុទ្ធជនខេត្តកំពង់ធំ សាងសង់ផ្ទះថ្មីមួយខ្នងជូនគាត់ ព្រោះកន្លងមកគាត់គ្មានកន្លែងស្នាក់នៅ ដោយរស់នៅក្នុងអង្គភាព បច្ចុប្បន្នលោកវរសនីយ៍ទោ យ៉េត ហុន និងភរិយា ព្រមទាំងក្រុមគ្រួសារ រស់នៅភូមិស៊ីវុត្ថា ឃុំប្រាសាទ ស្រុកសន្ទុក ខេត្តកំពង់ធំ ។
ក្រោយទទួលបានផ្ទះថ្មីដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន រយៈពេលជិតមួយឆ្នាំកន្លងមក ដោយរស់នៅលើផ្ទៃដីទំហំ២,១៥០ ម៉ែត្រការ៉េ ដែលបានទិញពីប្រជាពលរដ្ឋក្រោយទទួលបានប្រាក់គោលនយោបាយចេញពីជួរកងទ័ព លោក យ៉េត ហុន និង ភរិយា បានខិតខំដាំបន្លែបង្ការផ្សេងៗដោះស្រាយជីវភាពប្រចាំថ្ងៃរបស់គ្រួសារ បានល្អប្រសើរ រួមជាមួយប្រាក់បៀវត្សប្រចាំខែដែលរាជរដ្ឋាភិបាលផ្តល់ជូនគាត់ក្នុងមួយខែៗចំនួន ១,៧៩០,០០០ រៀលផងដែរ ។
ដើម្បីជាការលើកទឹកចិត្ត ដល់អតីតថ្នាក់ដឹកនាំអង្គភាព ដែលស្ទើរតែមួយជីវិតស្ថិតនៅក្នុងជីវភាពជាកងទ័ព ជាក់ស្តែងនៅល្ងាចថ្ងៃទី២៧ ខែសីហា ឆ្នាំ២០១៨ ឯកឧត្តម ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជា ខេត្ត បានដឹកនាំសហការីអញ្ជើញទៅសំណេះសំណាលសាកសួរសុខទុក្ខ និងបានផ្តល់ជូនគាត់ផងដែរនូវ អង្ករចំនួន ៥០ គីឡូក្រាម , មីយើងចំនួន ផ២ កេស , ទឹកត្រីទឹកស៊ីអ៉ីវចំនួន ០២ យួរ , ត្រី.ខកំប៉ុង ០១ យួរ និងថវិកាចំនួន១០០,០០០ រៀល ។
ក្នុងឱកាសនោះដែរ លោក យ៉េត ហុន និងក្រុមគ្រួសារ មានក្តីរំភើបយ៉ាងក្រៃលែង ដែលជានិច្ចកាលសម្តេចតែងតែគិតគូរដល់បងប្អូនអតីតយុទ្ធជន ជាពិសេសគឺរូបគាត់ផ្ទាល់ និងសូមគោរពថ្លែងអំណរគុណចំពោះ គណៈកម្មាធិការ សមាគមអតីតយុទ្ធជនកម្ពុជា គ្រប់ជាន់ថ្នាក់ ដែលមានសម្តេចតេជោ ហ៊ុន សែន ជាប្រធាន ហើយសូមគោរពជូនពរសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងបុត្រា-បុត្រី ចៅប្រុស-ចៅស្រី សូមជួបប្រទះតែនឹងពុទ្ធពរទាំងឡាយបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។
ដោយ ប៊ុ រដ្ឋា
