ខេត្តសៀមរាប៖ អជីវករត្រូវចូលរួមអនុវត្តច្បាប់ស្តីពីការគ្រប់គ្រងថ្នាំកសិកម្ម និងជីវកសិកម្ម ដោយមានវិធានការគ្រប់គ្រងថ្នាំកសិកម្ម អនុវត្ដច្បាប់ចំពោះសកម្មភាពពាណិជ្ជកម្ម មូលដ្ឋានអាជីវកម្មថ្នាំកសិកម្ម ឬ ជីកសិកម្ម ជាពិសេសយកចិត្តទុកដាក់ទប់ស្កាត់ ចំពោះការហូរចូលថ្នាំកសិកម្ម ឬ ជីកសិកម្មតាមច្រករបៀងព្រំដែន តាមមធ្យោបាយដឹកជញ្ជូន តាមផ្លូវទឹក ឬ ផ្លូវគោក និងធ្វើការដោះស្រាយបទល្មើសស្របតាមច្បាប់ ។
ប្រសាសន៍នេះ ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រម៉ាញ់នឹងនេសាទ តំណាង ឯកឧត្តម វេង សាខុន រដ្ឋមន្រ្តីក្រសួងកសិកម្មរុក្ខប្រម៉ាញ់និងនេសាទ ថ្លែងក្នុងពិធី សិក្ខាសាលាផ្សព្វផ្សាយណែនាំការប្រើប្រាស់ស្លាកសញ្ញាព័ត៌មាន និងគំរូស្លាកសញ្ញាព័ត៌មាននៃថ្នាំកសិកម្ម ដែលមានអជីវករលក់ដុំ និងលក់រាយ មកពីបណ្តាស្រុកក្រុងជាង៥០០នាក់ នៅសណ្ឋាគារម៉ារ៉ាឌី ដែលបានស្ថិតនៅក្នុងក្រុងសៀមរាប ខេត្តសៀមរាប ព្រឹកថ្ងៃទី ៣១ ខែ សីហា ឆ្នាំ ២០១៨។
លោកភុំ រ៉ា ប្រធាននាយកដ្ឋាននីតិកម្មកសិកម្ម បានមានប្រសាសន៍ថា គោលបំណងផ្សព្វផ្សាយដល់បណ្តាក្រុមហ៊ុន អជីវកម្មនាំចូលថ្នាំកសិកម្ម និជិវកម្ម រួមទាំងអាជីវករលក់ដុំ និងលក់រាយ ថ្នាំកសិកម្មទាំងអស់ ឲ្យយល់ដឹងពី សេចក្តីប្រកាសថ្មី ស្តីពីគោលការណែនាំ សម្រាប់ស្លាកសញ្ញាព័ត៌មាន និងគំរូស្លាកសញ្ញាព័ត៌មាន នៃថ្នាំកសិកម្មដែលទើបតែចូលថ្មីជាធរមាន ចំនុចទី២ គឺណែនាំដល់ពាណិជ្ឋករ និងអជីវករឲ្យយល់ដឹងពី ការរៀបចំ ស្លាកសញ្ញាព័ត៌មាន នៅលើសំបកវេចខ្ចប់ ដើម្បីជាមូលដ្ឋានដល់កសិករ និងអ្នកប្រើប្រាស់ ងាយស្រួលក្នុង ការយល់ដឹង ចំនុចទី៣ រួមចំណែកក្នុងការអនុវត្តច្បាប់ ស្តីពីការគ្រប់គ្រងថ្នាំកសិកម្ម និងជីកសិកម្ម ឲ្យមានប្រសិទ្ធិភាព។
លោកភុំ រ៉ា បានបញ្ជាក់ថា នៅក្នុងឆ្នាំ២០១៨ នេះ អាជីវកម្មប្រភេទថ្នាំកសិកម្មកំចាត់ស្មៅ គឺគ្រប់គ្រងថ្នាំកសិកម្ម និងជីកសិកម្មបានល្អប្រសើរ នឹងមានប្រសិទ្ធភាពខ្ពស់ នាយកដ្ឋានក៏បានរៀបចំនូវប្រកាសស្ដីពីស្លាកសញ្ញាព័ត៌មានថ្នាំកសិកម្ម និងគំរូស្លាកសញ្ញាដោយប្រកាន់ខ្ជាប់ទៅតាមនិយាមអន្តរជាតិដែលមានអង្គការ fao ជាទីប្រឹក្សាបច្ចេកទេស ។
ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រម៉ាញ់នឹងនេសាទ បានណែនាំឲ្យមានការផ្សព្វផ្សាយ អាជីវករថ្នាំ ដូចជាដេប៉ូលក់ដុំ លក់រាយ ត្រូវមានលិខិតអនុញ្ញាត លក់ដូរតែថ្នាំកសិកម្ម ឬ ជីកសិកម្មណាដែលមានស្លាកសញ្ញាព័ត៌មានជាភាសាខ្មែរ មានលិខិតអនុញ្ញាតឲ្យនាំចូល និងលិខិតអនុញ្ញាតផ្គត់ផ្គង់ចែកចាយស្របច្បាប់ ដែលចេញដោយក្រសួងកសិកម្ម រុក្ខាប្រមាញ់ និងនេសាទ 
អាជីវករមានសមត្ថភាពក្នុងការលក់ដូរផលិតផល ប្រកបដោយសុវត្ថិភាព និងការប្រើប្រាស់ថ្នាំកសិកម្មប្រកបដោយសុវត្ថិភាព និងជំរុញការលូតលាស់ដំណាំដល់ស្រែចម្ការរបស់កសិករផ្ទាល់ ។អាជីវករថ្នាំកសិកម្មឬជីកសិកម្ម ត្រូវមានភាពស្មោះត្រង់ និងមានសីលធម៌ក្នុងមុខរបររបស់ខ្លួន ដោយមិនត្រូវប្រព្រឹត្តអំពើក្លែងបន្លំគុណភាព កែច្នៃផលិតផលខុសពីគុណភាពដើម ឬក្លែងបន្លំសំបកវេចខ្ចប់ និងត្រូវជៀសវាងទិញចូលសម្រាប់លក់នូវថ្នាំកសិកម្ម ឬ ជីកសិកម្មទាំងឡាយណា ដែលលួចលាក់នាំចូលពីប្រទេសជិតខាងតាមច្រករបៀងព្រំដែន ឬជាផលិតផលមានប្រភពល្មើសច្បាប់ ។ដោយ ប៊ុន រដ្ឋា
