កំពង់ធំ៖ សមាគមអតីតយុទ្ធជនកម្ពុជា ខេត្តកំពង់ធំ បានសាងសង់ផ្ទះដែលជាអំណោយដ៏ថ្លៃថ្លាសម្តេច តេជោហ៊ុន សែន ប្រធានសមាគមអតីតយុទ្ធជនកម្ពុជា បានប្រគល់ជូនអតីតយុទ្ធជន ដែលមានជីវភាព ខ្វះខាត រស់នៅក្នុងខេត្តកំពង់ធំរហូតមកដល់ថ្ងៃនេះ បានចំនួន៩៥ខ្នល់ផ្ទះហើយ ក្នុងនោះអតីតយុទ្ធជន និងខិត ខំដោះស្រាយជូនបងប្អូនអតីតយុទ្ធជនដែលមានជីវភាពខ្វះខាតពិតៗបន្តទៀត តាមប្រសាសន៍ណែនាំរបស់ ឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា។
ប្រសាសន៍នេះ ត្រូវបានឯកឧត្តម ឧត្តមសេនីយ៍ទោ សោម ស៊ុន មេបញ្ជាការងយោធភូមិភាគទី៤ និងជា ប្រធានសមាគមអតីតយុទ្ធជនកម្ពុជា ខេត្តកំពង់ធំ ថ្លែងនៅក្នុងពិធីប្រគល់ផ្ទះលើកទី៩៥ ដែលជាអំណោយ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជូនដល់គ្រួសារអតីតយុទ្ធជនពិការ រស់នៅភូមិឈូកខ្សាច់ ឃុំឈូកខ្សាច់ ស្រុកបារាយណ៍ ខេត្តកំពង់ធំ ដែលមានអាជ្ញាធរ មេឃុំ និងប្រជាពលរដ្ឋ ចូលរួមសម្តែងសេចក្តីត្រេតអយ៉ាងច្រើនកុះករផងដែរ នៅល្ងាចថ្ងៃចន្ទទី០៣ ខែកញ្ញា ឆ្នាំ២០១៨។
ឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង បានប្រគល់ផ្ទះជូនអតីតយុទ្ធជនឈ្មោះ ហ៊ន សា ឋានន្តរសក្ដិពលបាលឯកអាយុ៤៥ ឆ្នាំ បានចូលរួមបម្រើក្នុងជួរកងទ័ពនៅថ្ងៃទី១៥ខែ ឧសភា ឆ្នាំ១៩៨៩ នៅអតីតអង្គភាពវរសេនាតូចលេខ៣០ នៃយោធាខេត្តកំពង់ធំ បានរងរបួសនៅសមរភូមិពាមអាទិត្យ ឃុំសាគ្រាម ស្រុកប្រាសាទបល្ល័ង្ក នៅថ្ងៃទី២០ ខែតុលា ឆ្នាំ ១៩៩៣ មានភរិយាឈ្មោះ ឈិន ថី អាយុ៣៦ឆ្នាំ មានកូនចំនួន២នាក់ នៅក្នុងបន្ទុក កន្លងមករស់នៅជ្រកកោនជាមួយបងប្អូនជិតខាង ដោយគាត់ពុំមានផ្ទះសម្បែងស្នាក់នៅឡើយ ។ 
ផ្ទះថ្មីដែលបានប្រគល់ជូន ទំហំ ៤មx៦ម សាងសង់ពីឈើ ជញ្ជាំងនិងរនាបក្តារ ដំបូងស័ង្កសី ខ្ពស់ផុតពីដី ដែលបានចំណាយថវិកាក្នុងការសាងសង់អស់ទឹកប្រាក់៦,៨៧០,០០០ រៀល ឯកឧត្តម និងក្រុមការងារសមាគមអតីតយុទ្ធជនខេត្តកំពង់ធំ បាននាំយកមកនូវអំណោយរបស់សម្ដេចតេជោ ហ៊ុន សែន ផ្តល់ជូនគាត់បន្ថែមទៀតរួមមាន÷ អង្ករចំនួន ៥០ គីឡូក្រាម , មីយើងចំនួន ០២ កេស , ទឹកទឹកត្រីទឹកស៊ីអ៉ីវ ចំនួន ០២ យួរ , មុងជ្រលក់ថ្នាំចំនួន ០២ និងថវិកាចំនួន២២១,០០០រៀលផងដែរ ។
មេឃុំ និងប្រជាពលរដ្ឋ បានអគុណសម្តេច តេជោ ហ៊ុន សែន និងសម្តេចគត្តិព្រឹត្តបណ្ឌិត ដែលបានជួយដល់ គ្រួសារអតីតយុទ្ធជន ក្នុងខេត្តកំពង់ធំ ដែលមានជីវភាពខ្វះខាត ពិតៗ ឲ្យមានជម្រកសា្នក់នៅសមរម្យ និងមិន ភ្លេចគុណបំណាច់នោះទេ សូមគាំទ្របោះឆ្នោតជូនសម្តេចគ្រប់អណត្តិបន្តទៀត។
ដោយ ប៊ុន រដ្ឋា 
