កំពង់ធំ៖ រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជា ណាចក្រកម្ពុជា បានយកចិត្តទុកដាក់មកលើបញ្ហាសន្តិសុខ សុវត្តិភាពរបស់ប្រជាពលរដ្ឋ និងបានសំនូមពរ ឲ្យ អាជ្ញាធរ កងម្លាំងអនុវត្តន៍នូវគោលនយោបាយ ភូមិ-ឃុំមានសុវត្ថិភាព ជូនប្រជាពលរដ្ឋ ឲ្យបានល្អក្នុងឱកាសបុណ្យកាន់បិណ្ឌភ្ជុំបិណ្ឌ ខាងមុខនេះ ។
ឯកឧត្តម ឧត្តមសេនីយ៍ទោ សោម ស៊ុន អនុប្រធានគណៈបញ្ជាការឯកភាពរដ្ឋបាលខេត្ត បានឆ្លើយតបនឹង អនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន បាននាំយក ឯកសណ្ឋានប្រជាការពារ ដែលបាន បំពាក់ជាលើកទី២ ចំនួន១០ សម្រាប់បន្ថែមទៀត ជូនដល់ប្រជាការពារនៅភូមិឥន្ទកុមា ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ នៅព្រឹកថ្ងៃទី២៤ ខែកញ្ញា ឆ្នាំ២០១៨។
ពិធីបំពាក់ឯកសណ្ឋានជូនដល់ប្រជាការពារ មានអាជ្ញាធរឃុំ -ភូមិ និងប្រជាពលរដ្ឋចូលរួមសំណេះសំណាលនេះ ឯកឧត្តម ឧត្តមសេនីយ៍ទោ សោម ស៊ុន បានសូមគោរពថ្លែងអំណរយ៉ាងជ្រាលជ្រៅជាទីបំផុត ចំពោះប្រជាជនទាំងអស់ ដែលបានបំពេញកាតព្វកិច្ចជាពលរដ្ឋល្អ អញ្ជើញទៅចូលរួមបោះឆ្នោតយ៉ាងច្រើនកុះករ និងបានបោះឆ្នោតគាំទ្រជូនសម្តេចតេជោ ហ៊ុន សែន បន្តធ្វើជានាយករដ្ឋមន្ត្រី ដើម្បីដឹកនាំនាវាកម្ពុជា មានសន្តិភាព និងអភិវឌ្ឍបន្តទៀត ។
ក្នុងពិធីក៏បានពន្យល់អំពីតួនាទី ភារកិច្ច និងសិទ្ធិ ជូនដល់បងប្អូនប្រជាការពារ ដែលជាអ្នកអនុវត្តន៏ផ្ទាល់ នៅមូលដ្ឋានជៀសវាងប្រព្រឹត្តខុសផ្ទុយនឹងគោលនយោបាយរបស់រាជរដ្ឋាភិបាល ដោយប្រជាការពារមិនត្រូវ ប្រើប្រាស់ស្លាកសញ្ញាកងកម្លាំងមានសមត្ថកិច្ចណាឡើយ មិនអាចយកតួនាទីទៅប្រព្រឹត្តបទល្មើសដើម្បី រកប្រយោជនខ្លួនឯងនោះឡើយ ហាមមិនឲ្យគំរាមគំហែង ចាប់ចង់ ឃុំឃាំងបុគ្គលណា ដោយពុំបានសហការ ជាមួយសមត្ថកិច្ច ប្រជាការពារពុំមានសិទ្ធិកាត់ក្តី ឬកសាងសំណុំរឿងបញ្ជូនទៅតុលាការ ព្រោះមិនមែនជា មន្រ្តីនគរបាលយុត្តិធម៌ តែតួនាទីភារកិច្ចគឺជួយមើលថែរទាំទ្រព្យសម្បត្តិជូនប្រជាពលរដ្ឋ និងជួយសម្រួលដល់ការកកស្ទះក្នុងពិធីបុណ្យផ្សេងៗ ជួយការពារទប់ស្កាត់បទល្មើសដែលកើតឡើងក្នុងមូលដ្ឋា ដោយសហការជាមួយកម្លាំងមានសមត្ថកិច្ច។
ឯកឧត្តម សោម ស៊ុន បានសម្តែងនូវការព្រួយបារម្ភណ៍ ចំពោះមនុស្សចាស់ និងក្មេងៗ រួមទាំងទ្រព្យសម្បត្តិ គោ ក្របី ជ្រូកមាន់ទា របស់បងប្អូនប្រជាពលរដ្ឋ ក្នុងរដូវទឹកជំនន់នេះ បានសំណូមពរដល់បងប្អូនប្រជាពលរដ្ឋ ទាំងអស់ចូលរួម ថែរក្សាទ្រព្យសម្បត្តិប្រើប្រាស់ផ្ទាល់ខ្លួន ឲ្យបានល្អចៀសវាង មានការខូចខាត និងបាត់បង់ដោយប្រកាណាមួយ នឹងសូមឲ្យបរិភោគអាហារមានអនាម័យ សម្រាន្តក្នុងមុង ចៀសវាងកើតជំងឺ តាមមកដោយសារទឹកជំនន់។
ដោយ ប៊ុន រដ្ឋា
