បន្ទាយមានជ័យ ៖ កិច្ចប្រជុំផ្សព្វផ្សាយផែនការយុទ្ធសាស្ត្រជាតិសកម្មភាពមីន ២០១៨-២០២៥ នៅថ្នាក់ ក្រោម ជាតិ ដែលប្រព្រឹត្តទៅក្រោមអធិបតីភាព ឯកឧត្ដម ចៅ ឡាយ អគ្គលេខាធិការរងអាជ្ញាធរមីន ឯកឧត្ដម លី សារី អភិបាលរងខេត្ត តំណាងឯកឧត្តម សួន បវរ អភិបាលនៃគណអភិបាលខេត្ត នឹងដែលមានការ ចូលរួមអ្នកពាក់ ព័ន្ធជុំវិញខេត្ត បានចូលរួម ត្រូវបានបើកនៅថ្ងៃទី២៥ ខែកញ្ញា នាសាលប្រជុំក្រុមប្រឹក្សាខេត្តបន្ទាយមានជ័យ។
ឯកឧត្ដម លី សារី អភិបាលរងខេត្ត បានមានប្រសាសន៍ លើកឡើងថា រយៈពេល ០៨ខែកន្លងមកនេះ ក្នុងខេត្ត បន្ទាយមានជ័យ បានបោសសម្អាតមីនបានចំនួនជាង ៩០០ហិកតា ដែលបានរកឃើញ និងកំទេច ចោលមីន ប្រឆាំងមនុស្សចំនួន ១៦៥១ គ្រាប់ មីនប្រឆាំងរថក្រោះចំនួន២៨គ្រាប់ និងសំណល់ជាតិផ្ទុះសល់ ពីសង្គ្រាម ចំនួន ១៨៦៥ គ្រាប់ ។ ឯកឧត្ដម តាមទិន្នន័យអង្គភាព CMVIS ប្រចាំខេត្តបន្ទាយមានជ័យ បានឲ្យដឹងថា ក្នុងឆ្នាំ២០១៨ នេះគិតពីដើមឆ្នាំ រហូតមកដល់ថ្ងៃនេះ ខេត្តបន្ទាយមានជ័យ មានការគ្រោះថ្នាក់កើតឡើងចំនួន ០៤ករណីក្នុងនោះមាន០២ករណី ដែលបានបង្កឲ្យជនរងគ្រោះស្លាប់០១នាក់ និងរបួសធ្ងន់ស្រាល ០២នាក់ និង០២ករណីទៀត បណ្ដាលឲ្យស្លាប់សត្វគោ០២ក្បាល និងខូចខាត់ដាច់ច្រាវ៉ាកគ្រឿងចក្រកំទេចមីន ១គ្រឿង។ 
ឯកឧត្ដម ចៅ ឡាយ អគ្គលេខាធិការរងអាជ្ញធរមីន មានប្រសាសន៍លើកថា ៖ ដើម្បីធានាបាននូវការ គ្រប់គ្រង់ វិស័យសកម្មភាពមីនប្រកបដោយប្រសិទ្ធភាព និងគណនេយ្យភាពរាជរដ្ឋាភិបាលកម្ពុជបានបង្កើតអាជ្ញាធរមីន ដោយសម្តេចអគ្គមហាសេនាបតី តេជោ ហ៊ុន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធាន ។ អាជ្ញាធរមីន មានតួនាទី និងភារកិច្ចធ្វើនិយ័តកម្ម សម្របសម្រួល និងតាមដានត្រួតពិនិត្យ ការអនុវត្តនៅក្នុង វិស័យសកម្មភាពមីននៅទូទាំងប្រទេសកម្ពុជា ។ លោកបន្តថា ចំពោះវិស័យនេះមានប្រតិបត្តិករជាតិចំនួន២ គឺមជ្ឈមណ្ឌលសកម្មភាពកំចាត់មីនកម្ពុជា (CMAC) 
និងមជ្ឈមណ្ឌលជាតិសម្រាប់ការគ្រប់គ្រង់កម្លាំងរក្សាសន្តិសុខ បោសសម្អាតមីន និងសំណល់ជាតិផ្ទុះពីសង្គ្រាម និងប្រតិបត្តិករអន្តជាតិរួមមាន ៖ អង្គការMAG , អង្គការHALO Trust ,អង្គការ JMAS ,អង្គការNPA , អង្គការ APOPO ព្រមទាំងមានអង្គការដោះមីន CSHD ដែលជាប្រតិបត្តករក្នុងនាម អង្គការមិនមែនរដ្ឋាភិបាលក្នុង ស្រុក មួយ ហើយក៏មានស្ថាប័នជាច្រើនទៀតដែលផ្តល់ការអប់រំអំពីហានីភ័យដោយសារមីន និងជំនួយគាំទ្រដល់ ជន រង គ្រោះដោយសារមីន ។ ឯកឧត្ដម ចៅ ឡាយ ក៏បានសំណូមពរឲ្យអាជ្ញាធរ ចូលរួមសហការ ផ្សព្វផ្សាយឲ្យ បានផុសផុលពីគ្រោះថ្នាក់ដោយសារគ្រាប់មីន និងត្រូវចូលរួមផ្តល់ព័ត៌មានបើសិនជាប្រទះឃើញគ្រាប់មីន ត្រូវរាយការមកអាជ្ញាធរ ដើម្បីធ្វើការកំទេចចោល។ 
គូរបញ្ជាក់ថា នៅត្រឹមដំណាចឆ្នាំ២០១៦ ប្រទេសកម្ពុជាបានរំដោះដីដែលមានមីនទំហំ ១,៥៤៤,៩៥៨,៥២៣ ម៉ែត្រការ៉េ (មួយពាន់ ប្រាំរយ សែសិបបួនលាន ប្រាំបួនសែន ប្រាំម៉ឺនប្រាំបីពាន់ ប្រាំរយម្ភៃបី ម៉ែត្រការ៉េ ) សម្រាប់ប្រើប្រាស់ជាដីកសិកម្ម និងបានរកឃើញ និងបំផ្លាញចោលនូវមីនប្រឆាំងមនុស្សចំនួន ១,០៣៦ ,៣៧៦គ្រាប់ និងមីនប្រឆាំងរថក្រោះចំនួន ២៤,២៥១ ព្រមទាំងសំណល់ជាតិ ផ្ទុះក្រោយសង្គាម ចំនួន២,៦៦០ ,៦៣៨គ្រាប់ផ្សេងទៀត ៕ដោយ៖ឃិន គន្ធា
