កំពង់ធំ៖ ផ្ទះថ្មីមួយខ្នង ដែលទើបតែសាងសង់រួច ត្រូវបានឯកឧត្តម ឧត្តមសេនីយ៍ទោ សោម ស៊ុន បញ្ជាការងយោធភូមិភាគទី៤ និងជាមេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោក ប៉ែន វណ្ណរិទ្ធ ប្រធានចលនាយុវជនកម្ពុជា១៥៧សាខាខេត្តកំពង់ធំ និងអាជ្ញាធរមូលដ្ឋាន បានចុះប្រគល់ផ្ទះជូនដល់ ក្រុមគ្រួសារ ប្អូនស្រី អ៊ុន សុត ដែលមានជីវភាពទីទ័លក្រ នៅរសៀលថ្ងៃទី ២៦ ខែកញ្ញា ឆ្នាំ ២០១៨។
ក្រោយពេលទទួលបានការឧបត្ថម្ភពីសម្បុរសជន ថវិកាទាំងអស់ត្រូវបាននាំយកមកសាងសង់ផ្ទះ រួមទាំងថ្លៃឈ្នួលជាង និងសម្ភារៈស្បៀងអាហារសម្រាប់ប្រើប្រាស់ ជូនដល់ក្រុមគ្រួសារ ស្រ្តីមេម៉េយដែលជួបនូវការខ្វះខាត គ្មានលទ្ធភាពសាងសង់ជម្រកស្នាក់នៅបានសមរម្យ ទើបស្រ្តីរូបនេះ ទ្រាំរស់ក្នុងជម្រកខ្ទមធ្លុះធ្លាយ ដំបូលប្រកមេឃមើលពីម្ខាងធ្លុះទៅម្ខាង ជាមួយនឹងកូនតូចៗ៥នាក់ ស្ថិតនៅភូមិក្តីដូង ឃុំក្តីដូង ស្រុកកំពង់ស្វាយ ខេត្តកំពង់ធំ។
ឧត្តមសេនីយ៍ទោ សោម ស៊ុន ជាមួយនឹង លោក ប៉ែន វណ្ណរិទ្ធ ប្រធានចលនាយុវជនកម្ពុជា១៥៧សាខាខេត្តកំពង់ធំ និងអាជ្ញាធរ មានចិត្តមេត្តាធម៌ សណ្តោសប្រណី និងកោតសរសើរដល់ទឹកចិត្តប្អូនស្រី អ៊ុន សុត ក្នុងនាមជាម្តាយសុខចិត្តរងទុក្ខវេទនា ដើរស៊ីឈ្នួលគេគ្រប់សព្វបែបយ៉ាង ជាពិសេសសុខចិត្តនាំកូនជ្រកក្នុងខ្ទម កំសត់ធ្លុះធ្លាយហាសភ្លៀងផ្គរបែបនេះក៏សុខចិត្តដែរ គឺបានលុយកាក់បន្តិចបន្តួចជម្រុញឲ្យកូនបានចូលរៀនសូត្រ ក្រេបយកចំណេះដឹងនឹងគេ ដែលជាទឹកចិត្តម្តាយចំពោះកូន។
នៅក្នុងឳកាសនៃការប្រគល់ផ្ទះមួយខ្នងនេះ ដែលមានទំហំ ៣មគុណ៤អស់ ទឹកប្រាក់ក្នុងការសាងសង់គិតទាំងឈ្នួលជាង ចំនួន៤,៣០០,០០០ រៀលជូនដល់ប្អូនស្រី ឧត្តមសេនីយទោ សោម ស៊ុន និង លោក ប៉ែន វណ្ណរិទ្ធ និងភរិយា បានរួមគ្នាជួយឧបត្ថម្ភដល់គ្រួសារនេះបន្ថែមទៀតនូវ អង្ករចំនួន៥០ គីឡូក្រាម មីយើងចំនួន២ កេស ទឹកត្រីទឹកស៊ីអ៊ីវចំនួន២ យួរ ត្រីខមួយយួរ មុងជ្រលក់ថ្នាំចំនួន២ ធុងសម្រាប់ដាក់ទឹកចំណុះ១២០ លីត្រ កន្ទេលចំនួន ២ កង់ជិះមួយគ្រឿងតម្លៃ២២០,០០០រៀល និងថវិកា ចំនួន៤០០,០០០រៀល ។
ឧត្តមសេនីយ៍ទោ សោម ស៊ុន បានថ្លែងអំណរគុណដ៍ជ្រាលជ្រៅជាទីបំផុតចំពោះសប្បុរសជនទាំងអស់ដែលបានរួមចំណែកជួយដល់ការសាងសង់ផ្ទះ នេះបានចេញជារូបរាងឡើង សូមគោរពជូនពរលោក លោកស្រីទាំងអស់ សូមទទួលបាននូវសេចក្តីសុខ សេចក្តីចម្រើន និងសូមផ្តាំផ្ញើរដល់គ្រួសារប្អូនស្រី ថែរក្សាសសុខ ភាព ថែរក្សាផ្ទះសំបែងឲ្យបានល្អ និងបន្តឲ្យកូនចៅបានចូលរៀនបន្ថែមឲ្យបានគ្រប់គ្នា ដើម្បីពន្លឺសុភមង្គល នៃអាគត់របស់ពួកគេ ។
ដោយ ប៊ុន រដ្ឋា 
