កំពង់ធំ៖ មេបញ្ជាការតំបន់ប្រតិបត្តិការសឹករងកំពង់ធំ បានបន្តសកម្មភាពមនុស្សធម៌ ដោយបានបន្តចុះសួរសុខទុក្ខ លោកយាយចាស់ជរា ស្ថិតក្នុងស្ថានភាពជាស្រ្តីមេម៉ាយ ខណៈពេលដែលគ្រួសារនេះ កំពុងតែមានជីវភាពខ្វះខាតទីទ័លក្រ ថែមទាំងមានហើយមានជម្ងឺប្រចាំកាយទៀតផង បច្ចុប្បន្នលោកយាយរស់នៅភូមិស្លាកែត សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។
ក្រុមគ្រួសារលោកយាយ ដែលទទួលបានការចុះសួរសុខទុក្ខពី មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ គឺលោកយាយ ឈួន ណៃ អាយុ៧៥ ឆ្នាំ ដែលមានជីវភាពលំបាកខ្វះខាត ក្រោយពីបែកបាក់គ្រួសារ អស់រយៈពេលជាង១៥ឆ្នាំហើយ លោកយាយមានកូនចំនួន១០(៧ នាក់បានស្លាប់ បច្ចុប្បន្ននៅរស់ ៣នាក់ ) រស់សព្វថ្ងៃ ក្រោមការចិញ្ចឹមបីបាច់ថែរក្សាពីកូនស្រីម្នាក់ឈ្មោះអាន នួន អាយុ ៥៣ ឆ្នាំ ដែលមានជីវភាពលំបាកខ្វះខាតដែរ ។
លោកយាយ បានទទួលអំណោយ ពីសម្ដេចតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា តាមរយឯកឧត្តមឧត្ដមសេនីយ៍ឯកហ៊ុន ម៉ាណែត មេបញ្ជាការកងទ័ពជើងគោក បានផ្តល់ជូនគាត់នៅពេលនេះរួមមានអង្ករចំនួន៥០ គីឡូក្រាម មីយើងចំនួន២ កេស ទឹកត្រី ទឹកស៊ីអ៊ីវចំនួន ២យួរ និងថវិកាចំនួន១០០,០០០រៀល(ដប់ម៉ឺនរៀល) នៅរសៀលថ្ងៃទី៣០ ខែកញ្ញា ឆ្នាំ ២០១៨។
ឯកឧត្តម ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ក្រៅពីការងារស្នូលរបស់អង្គភាព គឺបានឆ្លៀតពេល ក្នុងថ្ងៃឈប់សម្រាក បានធ្វើសកម្មភាពមនុស្សធម៌ ដោយបានដឹកនាំសហការី ចុះសុខទុក្ខប្រជាពលដ្ឋជួបការលំបាក នៅតាមមូលដ្ឋាន និងបានថ្លែងអំណរគុណ ដល់បងប្អូនដែលបានបំពេញកាតព្វជាពលរដ្ឋល្អ ទៅបោះឆ្នោតបានយ៉ាងច្រើនកុះករផងដែរ ក្នុងនាមខ្ញុំជាកងយោធភូមិខេមរភូមិន្ទ ក៏សូមប្តេជ្ញាជូនប្រជាពលរដ្ឋ ដើម្បីបន្តការជឿនិងទុកចិត្ត គឺបំរើប្រជាជនឲ្យបានល្អបំផុត និងបំរើទ្វេដងក្នុងអាណត្តិទី៦នេះ តាមការ អនុសាសន៍ដ៏ខ្ពង់ខ្ពស់ណែនាំរបស់សម្តេចតេជោ ហ៊ុន សែន ។
ក្រុមគ្រួសារលោកយាយ មានរំភើបចិត្តខ្លាំងណាស់ ក្រោយពីបានមើលឃើញ សកម្មភាពបំរើរាស្រ្តរបស់ កងកម្លាំង និងអាជ្ញាធរ ដោយយកចិត្តទុកដាក់មកលើប្រជាពលរដ្ឋ ដែលមិនទុកឲ្យពួកគាត់ រងទុក្ខដោយឯកកោ ម្នាក់ឯងនោះទេ និងសូមថ្លែងអំណរគុណ ឧត្តមសេនីយ៍ទោ សោម ស៊ុន ព្រមទាំងអាជ្ញាធរ ដែលបានផ្តល់អំណោយ និងស្បៀងអាហារ ដល់គ្រួសារគាត់កំពុងជួបការខ្វះខាត។
ដោយ ប៊ុន រដ្ឋា
