ខេត្តកំពង់ធំ៖ ជីវិតដ៏សែនកំម្សត់របស់លោកយាយ លើសពីល្ខោននិយាយរឿងនាងបណ្តាចារ ដោយសារតែ ជីវិតដ៏សែនជូរចត់ ឈឺចាប់ខ្លោចផ្សា លើសនាងបណ្តាចារ ដែលព្រាត់ប្រាស់កូនស្លាប់ចោល១២នាក់ និងប្តីម្នាក់សរុប១៣នាក់ នឹងបានបន្សល់តែលោកយាយចំណាស់ក្នុងវ័យ៨៤ឆ្នាំ ឲ្យរស់គ្មានទ្រនំអណ្តែតរសាត់ គ្មានកោះត្រើយ តែក្នុងជីវិតចុងក្រោយរបស់លោកយាយ មិនដែលបំភ្លេចគុណរបស់សម្តេចតេជោ ហ៊ុន សែន ហើយក៏បានសុំអំពាវនាវដល់សម្បុរសជន ជិតឆ្ងាយ សុំត្រឹមតែម្ហូបឆ្ងាញ់មួយពេលប៉ុណ្ណោះ។
លោកយាយ តេង ហ៊ិម អាយុ ៨៤ឆ្នាំ ត្រូវបានយកចិត្តទុកដាក់ ពីសំណាក់ ឯកឧត្តម ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ និងជាមេបញ្ជាការតំបន់ប្រតិបត្តិការសឹករងកំពង់ធំ ដោយមិន បណ្តោយឲ្យពលរដ្ឋណាម្នាក់ ឬអតីតយុទ្ធជនណាម្នាក់អត់បាយស្លាប់ដោយមិនអើពើ ក្រោយពីបាន ដឹងព័ត៌មានហើយនោះទេ ឧត្តមសេនីយ៍ទោ សោម ស៊ុន បានដឹកនាំសហការីចុះទៅសួរសុខទុក្ខលោកយាយ វ័យចាស់ជរាទុរគត់ជន រួមជាមួយអាជ្ញាធរ នៅភូមិត្រពាំងឬស្សី ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ព្រឹកថ្ងៃទី ១៤ ខែតុលា ឆ្នាំ ២០១៨។
លោកយាយ តេង ហ៊ិម បានរៀបរាប់ទាំងទឹកភ្នែកថា លោកយាយបានបាត់បង់ ស្វាមី និងកូនចំនួន១២ នាក់ ក្នុងរបបខ្មែរក្រហម ជីវិតរបស់លោកយាយ រសាត់អណ្តែតដូចចកអណ្តែតតាមទឹក ពីខេត្តមួយទៅខេត្ត ក្នុង ជីវិតឯកការ រហូតដល់ព្រះជន្ម៨៤ ឆ្នាំ គ្មានកូន គ្មានចៅ គ្មានប្តី គ្មានផ្ទះសំបែង រស់នៅដោយសារតែ ចិត្តសប្បុរសជន ក្នុងភូមិ នាំគ្នាជួយគ្នាចិញ្ចឹម បីបាច់ថែរក្សា ផ្តល់ម្ហូបអាហារតាមលទ្ធភាពដែលពួកគាត់មាន ។
លោកយាយ បានបន្តថា ជីវិតសែនកំសត់ ក្នុងជំនាន់ប៉ុលពត លោកយាយត្រូវបានពួកខ្មែរក្រហមជម្លៀសគាត់ទៅរស់នៅតំបន់ប៉ៃលិន ប្តីគាត់ត្រូវខ្មែរក្រហមយកទៅសម្លាប់ដោយចោទថាជាខ្មាំង រីឯកូនគាត់ចំនួន១២ នាក់ (ប្រុស៣ នាក់ ស្រី៩នាក់) ត្រូវបានស្លាប់ដោយជម្ងឺ និងគ្មានអាហារបរិភោគ ក្រោយថ្ងៃរំដោះ៧ មករា ឆ្នាំ១៩៧៩ លោកយាយបានវិលត្រឡប់មកស្រុកកំណើតវិញតែម្នាក់ឯង បាត់បង់ស្វាមី និងកូនដែលជាទីស្រឡាញ់ចំនួន១២ នាក់ ហើយពេលមកដល់ស្រុកកំណើតវិញឪពុកគាត់ក៏បានស្លាប់ចោលគាត់ទៀត ចំណែកម្ដាយលោកយាយស្លាប់ចោលលោកយាយតាំងពីអាយុ៧ខែមកម្លេះ ដែលខ្សែជីវិតគាត់ រសាត់អណ្តែត ព្រាត់ប្រាស់ និរាសលើសនាងបដាចារក្នុងរឿងព្រេងនិទានទៅទៀត តើទិដ្ឋភាពព្រាត់ប្រាសបែបនេះស្ត្រីគ្រប់រូបទប់ទឹកភ្នែកបានទេ ។
លោកយាយ តេង ហ៊ិម បានលើកដៃសំពះដឹងគុណ ដោយការគោរព ស្រឡាញ់ សម្ដេចតេជោហ៊ុន សែន ស្មើនឹងឪពុក ព្រោះសម្តេចបានធ្វើឲ្យគាត់រស់រានមានជីវិត រួចផុតពីរបបប្រល័យពូជសាសន៍ប៉ុលពត បច្ចុប្បន្ននេះដោយវ័យកាន់តែចាស់ សុខភាពកាន់តែទ្រុឌទ្រោម ជួនពេលខ្លះក្រោយពេលអត់បាយសិលពីល្ងាច លោកយាយធ្វើដំណើរហេវហត់ដួលនៅលើដី តែបានអ្នកភូមិផងជួយសង្គ្រោះជីវិត និងថែទាំគាត់ ។
ក្នុងពិធីសួរសុខទុក្ខ ឧត្តមសេនីយ៍ទោ សោម ស៊ុន បានពាំនាំអំណោយសម្តេចតេជោ ហ៊ុន សែន តាមរយឯកឧត្តមឧត្ដមសេនីយ៍ឯកហ៊ុន ម៉ាណែតផ្តល់ជូន ក្នុងឳកាសចុះ សួរសុខទុក្ខគាត់ និងបានជួយឧបត្ថម្ភជូនគាត់នូវអង្ករចំនួន៥០ គីឡូក្រាម មីយើងចំនួនចំនួន២ កេស ទឹកផ្លែឈើចំនួន២ កេស និងថវិកាចំនួន១៥០,០០០ រៀល ដោយឡែកលោកយាយ ចំនួន ២នាក់ បានឧបត្ថម្ភថវិកាជូនគាត់ ក្នុងម្នាក់ៗ ទទួលបាន ២០,០០០ រៀល និងលោកតាពិការជើងម្ខាងទទួលបាន ៣០,០០០រៀល ផងដែរ ៕
ដោយ ប៊ុន រដ្ឋា
