គ្រូបង្វឹកជម្រើសជាតិស្វីសលោក Ottmar Hitzfeld បានប្រកាសចូលនិវត្តន៍បន្ទាប់ពីកូនក្រុមរបស់លោកធ្លាក់ចេញពីការប្រកួត World Cup ក្រោមស្នាដៃរបស់អាហ្សង់ទីន ។
កីឡាករ Angel di Maria របស់អាហ្សង់ទីនបានបញ្ចប់ក្តីស្រម៉ៃរបស់ស្វីសនៅនាទីទី១១៨នៃម៉ោងបន្ថែម១៥នាទី២ដងហើយទម្លាក់ស្វីសនៅត្រឹមវគ្គ១៦ក្រុមចុងក្រោយ ។
លោក Hitzfeld ប្រាប់គេហទំព័រ FIFA.com ថា “ខ្ញុំចង់សាទរដល់កីឡាករក្នុងក្រុមដែលធ្វើបានយ៉ាងល្អរហូតមកដល់ពេលនេះ ពួកគេទទួលបានបទពិសោធន៍ជាច្រើនក្នុងការប្រកួតដែលស្ថិតក្រោមការដឹកនាំរបស់ខ្ញុំ ហើយវាជាពេលដែលខ្ញុំត្រូវចូលនិវត្តន៍” ។
គួរបញ្ជាក់ថា លោក Hitzfeld បានចូលមកដឹកនាំក្រុមជម្រើសជាតិស្វីសកាលពីឆ្នាំ ២០០៨ ហើយថ្មីៗនេះលោកបានជួយឲ្យស្វីសឈរនៅលេខរៀងទី៦របស់ FIFA បន្ទាប់ពីក្រុមនេះប្រកួត មិនដែលចាញ់សោះក្នុងវគ្គជម្រុះ World Cup ៕
