នៅរសៀលថ្ងៃទី០៧ កក្កដា ឆ្នាំ២០១៤ ឯ.ឧ ឃឹម ប៊ុនសុង អភិបាលនៃគណៈអភិបាលខេត្ត និង ឯ.ឧ នូ ផល្លា ប្រធានក្រុមប្រឹក្សាខេត្ត និង លោកជំទាវ បាននាំយកនូវទៀនព្រះវស្សា និង គ្រឿងឧបភោគបរិភោគ និង បច្ច័យទៅវេរប្រគេនព្រះសង្ឃគង់ចាំព្រះវស្សានៅវត្តព្រះឥន្ធកិសីយ៍
ក្នុងក្រុងសៀមរាប ព្រមទាំងមានការចូលរួមពីសំណាក់ឯកឧត្តម លោកជំទាវជាគណៈអភិបាលខេត្ត អស់លោក លោកស្រី ជាថ្នាក់ដឹកនាំមន្ទីរ ស្ថាប័ន អង្គភាព អាជ្ញាធរក្រុង និងមន្ត្រីរាជការ ចៅសង្កាត់ សីលវ័ន្ត សីលវតី ផងដែរ ។
មានប្រសាសន៍សំណេះសំណាលជាមួយព្រះសង្ឃ សីលវន្ត័ សីលវតី និង ពុទ្ធបរិស័ទនាឱកាសនោះ ឯ.ឧ ឃឹម ប៊ុនសុង ក៏បានពាំនាំមកនូវ ប្រសាសន៍ផ្តាំផ្ញើ របស់សម្តេចអគ្គមហាទាំងបី សម្ខាន់សម្តេចតេជោ ហ៊ុន សែន និង សម្តេចគតិព្រឹទ្ធបណ្ឌិត ព្រមទាំងបានធ្វើ ការថ្លែងនូវអំណរគុណនាពេលកន្លងមកនេះ ទាំងព្រះសង្ឃ ពុទ្ធបរិស័ទ ប្រជាពលរដ្ឋទូទាំង ដែលបានចូលរួមបោះឆ្នោតគាំទ្រគណបក្សប្រជាជនកម្ពុជា ដើម្បីបន្តបេសកកម្មដឹកនាំប្រទេស ក្នុងកិច្ចអភិវឌ្ឍន៍ប្រទេសជាតិ ឲ្យមានការរីកចម្រើនលើគ្រប់វិស័យ ។ ឯកឧត្តម ក៏បានគូសបញ្ជាក់ផងដែរថា ក្នុងរយៈ មកនេះ ទាំងរាជរដ្ឋាភិបាល អាជ្ញាធរខេត្ត ក៏ដូចកម្លាំងសមត្ថកិច្ច បានមមាញឹកក្នុងការទទួលនូវបងប្អូនប្រជាពលករ ដែលរាជរដ្ឋាភិបាលទាហានថៃ បានបញ្ជូនមកកាន់ប្រទេសកម្ពុជា ទាំងពលករស្របច្បាប់ និង មិនស្របច្បាប់ ។ ម្យ៉ាងទៀតអាជ្ញាធរខេត្ត ក៏បានកំពុងយកចិត្តទុកដាក់ ក្នុងការរៀបចំធ្វើបែបបទ លិខិតស្នាមជូនដល់ប្រជាពលករ ដែលមានបំណងទៅបំពេញការងារនៅក្រៅប្រទេសផងដែរ ។ ឯ.ឧ ឃឹម ប៊ុនសុង ក៏បានលើកឡើងផងដែរ សម្រាប់ប្រជាពលរដ្ឋ និង ពុទ្ធបរិស័ទ អំពីទីវត្តអារាម គឺមិនត្រឹមតែបម្រើវិស័យសាសនា ជាទីសក្ការៈបូជារបស់បងប្អូនពុទ្ធបរិស័ទប៉ុណ្ណោះទេ គឺជាទីកន្លែង ដែលប្រមូលផ្តុំនូវវប្បធម៌ និង ជាថ្នាលបណ្តុះបណ្តាលធនធានមនុស្ស ដែលជាជង្រុកនៃគ្រឹះអក្សរសាស្ត្រជាតិ អរីយធម៌ វប្បធម៌ ខ្មែរយើង ។ ឯកឧត្តមក៏បានបញ្ជាក់ថា នៅពេលខាងមុខនេះព្រះសង្ឃនៅគ្រប់ទីវត្តអារាមទូទាំង ព្រះរាជាណាចក្រកម្ពុជា គោរពប្រពៃណីសាសនាព្រះពុទ្ធ ត្រូវចូលកាន់ព្រះវស្សា ក្នុងរយៈពេលអស់មួយត្រីមាស ដែលព្រះសង្ឃគង់ចាំព្រះវស្សានៅក្នុងទីវត្ត ទើបថ្ងៃនេះត្រូវបានថ្នាក់ដឹកនាំខេត្ត មន្ទីរ ស្ថាប័ន មន្ត្រីរដ្ឋបាលសាលាខេត្ត និង ក្រុង ដង្ហែរយកមកវេរប្រគេនដល់ព្រះសង្ឃនៅវត្តព្រះឥន្ធកោសីយ៍ ដើម្បីព្រះសង្ឃយកទៅដុតបំភ្លឺ បូជាថ្វាយព្រះ និង សិក្សារៀនសូត្រនូវ គម្ពីធម៌វិន័យ ព្រះសម្មាសាម្ពុទ្ធ ព្រះបរមគ្រូនៃយើង ។ ក្នុងឱកាសនោះឯ.ឧ ឃឹម ប៊ុនសុង ឯ.ឧ នូ ផល្លា និងលោកជំទាវ ព្រមទាំងឯកឧត្តម អស់លោក លោកស្រី ក៏បានប្រារព្វធ្វើពិធីវេរប្រគេនទៀនព្រះវស្សា ទៅតាមគន្លងប្រពៃណីព្រះពុទ្ធសាសនានៃយើង ដើម្បីឧទ្ទិសកុសលផលបុណ្យ ដល់បុព្វការីជន សាចសាលោកហិត កម្មាភិបាល យុទ្ធជន យុទ្ធនារី ដែលបានពលី មរណៈ ក្នុងបុព្វហេតុជាតិមាតុភូមិ ក្នុងការអភិវឌ្ឍន៍ប្រទេស ឲ្យមានការរីកចម្រើន ដែលបានចែកឋានទៅកាន់ លោកខាងមុខផងដែរ ។
សម្ភារៈបរិក្ខាដែលបានប្រគេនព្រះសង្ឃនាឱកាសនោះ មានទៀនវស្សា០១គូ ស្លាដក ១ អង្ករ ២០០គក្រ មី ១៥កេស ទឹកសុទ្ធ ១៥យូរ ត្រីខ ៤ឡូត៌ ទឹកត្រី ៦យូរ ទឹកស៊ីអ៊ីវ ៥យូរ អំបិល៨គក្រ មីចេង ៣គក្រ ប្រេងម៉ាស៊ុត ៣០លីត្រ សៀវភៅ ១០០ក្បាល និង បច្ច័យ១លានរៀល ដើម្បីទុកសម្រាប់ប្រើប្រាស់ពេលចូលព្រះវស្សា ក្នុងរយៈ ពេលអស់មួយត្រីមាស នៅក្នុងទីវត្តអារាម ៕
