ភ្នំពេញៈ ក្រុមជួយសង្គ្រោះ កំពុងបានបន្ដប្រតិបត្ដិការ ស្វែងរកសពជនរងគ្រោះ ដែលនៅសេសសល់បន្តទៀត បន្ទាប់ពីបានរកឃើញសពជនរងគ្រោះចំនួន២នាក់ ក្នុងចំណោមអ្នកស្លាប់ចំនួន៤រូប កាលពីម៉ោង៣រសៀល ។
សាកសពទាំងពីររូប ដែលបានរកឃើញដំបូងនេះ ត្រូវបានគេដឹងថា៖ មានថ្នាក់ឧត្តមសេនីយ៍ទោមួយរូប និងថ្នាក់ឧត្តមសេនីយ៍ត្រីមួយរូប ។ ក្នុងចំនួនសាកសពពីររូបនេះ ត្រូវបានគេឃើញថា៖ មានម្នាក់ត្រូវបានឧទ្ធម្ភាគចក្រសង្កត់ពីលើនៅបាតភក់ ក្នុងជំរៅទឹក៣០ម៉ែត្រ និងមួយរូបទៀតគាបជាប់ នឹងកៅអីយន្តហោះ ខណៈដែលក្រុមប្រត្តិបតិការ បានស្ទូចយន្តហោះមកលើគោក ។
ក្នុងប្រតិបត្តិការពេញ១ថ្ងៃនេះ ត្រូវបាន ឯ,ឧ នាយ ឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានចុះដឹកនាំផ្ទាល់ ដើម្បីបញ្ជាកម្លាំងកងទ័ពជាច្រើននាក់ ដើម្បីចុះទឹក មុជរាវរកឧទ្ធម្ភាគចក្រ ដែលធ្លាក់ ក្នុងរណ្តៅដី ដែលមានទឹកជម្រៅដ៏ជ្រៅ ។
នៅក្នុងចំណោអ្នកកាសែតជាតិនិងអន្តរជាតិ ជាច្រើននាក់ នៅនឹងកន្លែងកើតឯ,ឧ នាយឧត្តមសេនីយ៍ ទៀ បាញ់ មានប្រសាសន៍ថា៖ ទាហានបានប្រើប្រាស់គ្រប់ផ្នែក ដើម្បីរុករកឲ្យអស់លទ្ធភាព ស្រង់យកសាកសពទាហាន និងឧទ្ធម្ភាគចក្រ ហើយឯ,ឧ បញ្ជាក់ថា៖ រណ្តៅនេះ មិនមែនធម្មតាទេ វាជារណ្តៅមរណភាព ។
ឯ,ឧ នាយឧត្តមសេនីយ៍ សឹង សំណាង មេបញ្ជាការកងទ័ពអាកាស បានឲ្យដឹងថា ក្នុងឧទ្ធម្ភាគចក្រ ដែលជួបឧទ្ទវហេតុ ធ្លាក់ពេលហ្វឹកហាត់ កាលពីព្រឹកថ្ងៃទី១៤កក្កដានេះ នៅក្នុងរណ្តៅដី ខាងក្រោយពន្ធនាគារព្រៃស គឺមាន ៥ រូប ក្នុងចំនួននេះ មានស្លាប់៤រូប និងរបួសម្នាក់ ។ ទោះជាយ៉ាងក៏ដោយ មកដល់ព្រលប់ថ្ងៃដដែលនេះ នៅមិនទាន់ដឹងពីមូលហេតុនៃហេតុការណ៍ធ្លាក់ឧទ្ធម្ភាគចក្រនោះនៅឡើយទេ ហើយត្រូវបានឯ,ឧ សឹង សំណាង អះអាងថា រង់ចាំស្រាវជ្រាវរកប្រអប់ខ្មៅរបស់ឧទ្ធម្ភាគចក្រនោះ ជាមុនសិន ។ ព្រោះនៅពេលនេះ កងកម្លាំង កងពលតូចលេខ៧០ កំពុងស្រាវជ្រាវរុករកប្រអប់ខ្មៅ និងស្រង់សាកសព ចេញក្នុងរណ្តៅដី ដែលមានទឹកជម្រៅពី២០ ទៅ៣០ម៉ែត្រ។
ឯ,ឧ ឧត្តមសេនីយ៍សឹង សំណាង បានសម្តែងការសោកស្តាយ ចំពោះឧបទ្ទវហេតុធ្លាក់ឧទ្ធម្ភាគចក្រនេះ ពិសេសចំពោះការបាត់បង់ នូវគ្រូបង្វឹកអ្នកបើកយន្តហោះកងទ័ព ដែលមានបទពិសោធន៍ ពិបាកនឹងរកបាននេះ។
សូមបញ្ជាក់ថា៖ ទ្ធម្ភាគចក្រ របស់កងទ័ពអាកាស បានធ្លាក់ទៅក្នុងរណ្តៅដី ដែលមានទឹកដ៏ធំមួយ ស្ថិតខាងក្រោយពន្ធនាគារព្រៃស ក្នុងសង្កាត់ព្រៃស ខណ្ឌដង្កោ ជាយក្រុងភ្នំពេញ កាលពីម៉ោងជាង៩ ព្រឹក ថ្ងៃទី១៤កក្កដា ក្នុងពេលកំពុងហ្វឹកហាត់ ។ ទីតាំងដែលធ្លាក់នេះ ក៏ស្ថិតនៅមិនឆ្ងាយពីព្រលានយន្តហោះ អន្តរជាតិភ្នំពេញដែរ ។
ក្រោយពេលឧបទ្ទវហេតុនេះ បានកើតឡើងភ្លាមៗនោះ លោកចៅសង្កាត់ព្រៃស លោក ខាត់ សុខៃ បានឲ្យដឹងជាបឋមថា ក្រុមកងទ័ពអាកាសនោះ បានកំពុងហ្វឹកហាត់ នៅតំបន់គ្រោះថ្នាក់ ខាងក្រោយពន្ធនាគារព្រៃស អស់រយៈពេលបីបួនថ្ងៃមកហើយ ។ តែគេមិនទាន់ដឹងថា ការធ្លាក់ឧទ្ធម្ភាគចក្រនេះ បណ្តាលមកពីមូលហេតុអ្វីនោះទេ ។
ដោយឡែកឯ,ឧ ឧត្តមសេនីយ៍ យិន សុខា មេបញ្ជាការរង កងទ័ពអាកាស បានប្រាប់ថា៖ មន្ត្រីកងទ័ពអាកាស ដែលបានរងគ្រោះ នៅក្នុងករណីធ្លាក់ ឧទ្ធម្ភាគចក្រហ្វឹកហ្វឺន របស់អង្គភាព៩០៤ រួមមានទី១. លោក អ៊ុន ប៊ុណ្ណាហា ឋានៈឧត្តមសនីយ៍ទោ ជាមេបញ្ជាការកងហោះ ឧទ្ធម្ភាគចក្រ និងជាអ្នកបើកយន្តហោះ ជើងចាស់ម្នាក់ របស់កងទ័ពអាកាសកម្ពុជា ទី២. លោកឧត្តមសេនីយ៍ត្រី អៀង វណ្ណរិទ្ធ មេបញ្ជាការរងកងហោះហើរ ទី៣. លោក ថន វណ្ណឌី ទី៤. លោក ខាំ ប៊ុនណាន។ មន្ត្រីយោធាទាំង ៤នាក់នេះ បានស្លាប់ ក្នុងឧបទ្ទវហេតុនោះ។ ចំណែកមន្ត្រីកងទ័ពអាកាសម្នាក់ទៀត ដែលរងរបួសនោះ គឺលោក ចេង សុខសំបូរ អាកាសយានិក ដែលបានកំពុងតែជួយសង្គ្រោះ នៅឯមន្ទីរពេទ្យ។
ប្រភពនេះ បានបន្តថា៖ ឧទ្ធម្ភាគចក្រ ដែលជួបឧបទ្ទវហេតុនេះ ជាប្រភេទ Z9 ផលិតនៅប្រទេសចិន ដែលកម្ពុជាបានទិញ មកពីប្រទេសចិន ចំនួន១២គ្រឿង កាលពីឆ្នាំ២០០៩ ។ មុនពេលមានការធ្លាក់ ឧទ្ធម្ភាគចក្រនេះ កងកំលាំងយោធា របស់អង្គភាព៩០៤ បានហ្វឹកហ្វឺន បើកឧទ្ធម្ភាគចក្រ ម្តងម្នាក់។ លុះដល់ពេលកើតហេតុ មានអ្នកបើកម្នាក់ បានបញ្ជាឧទ្ធម្ភាគចក្រ ឡើងទៅលើយ៉ាងខ្ពស់ ពេលនោះម៉ាស៊ីន ក៏មានបញ្ហា។ អ្នកបើកបរ បានបញ្ជាឧទ្ធម្ភាគចក្រ ចុះមកក្រោម ដល់រណ្តៅដី ដែលមានទឹក។ ពេលដែលឧទ្ធម្ភាគចក្រ ចុះមកដល់ត្រឹមមួយម៉ែត្រ កំពស់ពីទឹក ក៏បានផ្ទុះតែម្តង។
ប្រភពដដែល បានអះអាងថា ការធ្លាក់ឧទ្ធម្ភាគចក្រនេះ ទំនងជាបណ្ដាលមកពីបញ្ហាបច្ចេកទេសច្រើនជាង។
រហូតដល់រសៀលនេះ សាកសពនាយទាហាន ដែលរងគ្រោះទាំងនោះ មិនទាន់ត្រូវបានគេស្រង់ចេញពីក្នុងទឹករណ្តៅដីនោះនៅឡើយទេ៕
