បន្ទាយមានជ័យ ះ វគ្គបំប៉នពីច្បាប់និងវិស័យដីធ្លីដល់មេឃុំ មេភូមិ ប្រធានសហគមន៍និងប្រជាពលរដ្ឋ នៅទូទាំងខេត្តបន្ទាយមានជ័យដែលចាប់ផ្ដើមបើកពីថ្ងៃទី១៣ មិថុនា ដល់ ថ្ងៃទី១៧ ខែកក្ដដា ឆ្នាំ២០១៤ នេះ លើ៩ក្រុង-ស្រុក ត្រូវបានបិទក្រោម អធិបតីភាព លោក ចុង ផែត អភិបាលរងខេត្តបន្ទាយមានជ័យ លោក វិស្វករ លី សារី ប្រធានមន្ទីររៀបចំដែនដី នគររូបនីយ៍កម្ម សំណង់និងសុរិយោដីខេត្ត ព្រមទាំងមានរដ្ឋបាលស្រុក មេឃុំ មេភូមិប្រធានសហគមន៍និងប្រជាពលរដ្ឋចូលរួម។ 
លោក ហេង ញ៉ អភិបាលរងស្រុកម៉ាឡៃលើកឡើងថា: ដោយក្នុងភូមិសាស្ត្រស្រុកជាប់ខ្សែបន្ទាត់ព្រំដែន កម្ពុជា-ថៃ មានដីច្រើនប្រភេទ ដីលំនៅដ្ឋាន ដីកសិកម្ម ដីសង្គមកិច្ច តំបន់ទេសភាពធម្មជាតិរនាមដូនសំ ហើយតែងកើតមានទំនាស់ជាញឹកញាប់។ វគ្គបំប៉នពីច្បាប់និងវិស័យដីធ្លីរយះពេល ២ថ្ងៃនៅពេលនេះ មេឃុំ មេភូមិប្រធានសហគមន៍ និងប្រជាពលរដ្ឋ ពិតជាបានយល់ច្បាស់ពីនិតិវិធី ក្នុងការជំរុញកែទម្រង់ដីធ្លីអោយទទួលបានជោគជ័យនិងពិសេសបានយកចំណេះដឹងនៃច្បាប់នេះទៅអនុវត្តក្នុងការងារជាក់ស្តែង។ 
លោក លី សារី ប្រធានមន្ទីររៀបចំដែនដី នគរូបនីយកម្មសំណង់ និង សុរិយោដីខេត្តបន្ទាយមាន ជ័យមានប្រសា សន៍ថា: យុទ្ធនាការបំប៉នពីច្បាប់និងវិស័យដីធ្លីដល់មេភូមិប្រធានសហគមន៍និងប្រជាពលរដ្ឋដែលមានការចូលរួមពីអាជ្ញាធរដែនដីផងនោះ ត្រូវបានបញ្ចប់ជាស្ថាពរ តាមគោលការរបស់ក្រសួងរៀបចំដែនដី នគរូបនីយកម្ម សំណង់និងសុរិយោដី។
ហើយបានបណ្ដុះបណ្ដាលសិក្ខាកាមបាន ចំនួន៥៦០រូប លើ៩ស្រុក-ក្រុង សិក្សាលើមេរៀនចំនួន៦គឺ កម្មសិទ្ទិលើអចលនវត្ថុ ភោគះ និងលទ្ធកម្ម សិទ្ធិតាមរយះភោគះ សម្បទានដី ការគ្រប់គ្រងដីរដ្ឋ ការដោះស្រាយទំនាស់ដីធ្លី របស់គណះកម្មារសុរិយោដី ។ លោកចុង ផែត អភិបាលរងខេត្តបន្ទាយមានជ័យមានប្រសាសន៍ថា: បញ្ហាដីធ្លី ជាបញ្ហាមួយដែលមានការពាក់ពន្ធ័និងការអភិវឌ្ឍន៍ សេដ្ឋកិច្ចសង្គមនិងការកាត់បន្ថយភាពក្រីក្ររបស់ប្រជា ពលរដ្ឋ។
លោកថ្លែងអំណរគុណដល់ក្រសួងនិងមន្ទីរជំនាញដែលបានបង្កើតអោយមានវគ្គបណ្តុះបណ្តាលបំប៉នស្តីពីច្បាប់វិស័យដីធ្លីនេះដល់មេភូមិ មេឃុំ និងប្រជាពលរដ្ឋក្នុងខេត្ត បន្ទាយមានជ័យ ដើម្បីបញ្ជ្រៀបចំណេះដឹងនិងការផ្សព្វផ្សាយបន្តដល់មូលដ្ឋាន។ លោក ចុង ផែត បន្តទៀតថាចំណេះដឹងទាំងអស់ដែលបានមកពីការសិក្សាពិតជាអាចកាត់បន្ថយនូវរាល់ភាពអសកម្មផ្សេងៗដូចជាការកាប់រាន ការកាន់កាប់ដីធ្លីដោយខុសច្បាប់ មិនបែកបាក់សាមគ្គីផ្ទៃក្នុងពីភូមិមួយទៅភូមិមួយដោយរឿងព្រំដី និងកាត់បន្ថយជម្លោះរឿងដីធ្លី៕
