ខេត្តប៉ៃលិន៖ កម្លាំងសមត្ថកិច្ច នៃស្នងការដ្ឋាននគរបាលខេត្តប៉ៃលិន ក្រោមការបញ្ជាផ្ទាល់ពីលោក ជុំ សែនសទ្ធា ព្រះរាជអាជ្ញាអមសាលាដំបូងខេត្ត និងលោកឧត្តមសេនីយត្រី ជា ចាន់ឌិន ស្នងការនគរបាលខេត្តប៉ៃលិន បានចុះបង្ក្រាបល្បែងបញ្ជល់មាន់ មួយកន្លែង ព្រមទាំងឃាត់ខ្លួន អ្នកញៀនល្បែង៨នាក់ រិបអួសរថយន្តកាមរីឆ្លាម១គ្រឿង និងម៉ូតូ១២គ្រឿង ព្រមទាំងមាន់ជល់ចំនួន៦ ។ ហេតុការណ៏ចុះបង្ក្រាបនេះ បានកើតឡើងកាលពីវេលាម៉ោង១២ និង៣០នាទី រសៀល ថ្ងៃទី១៧ ខែកក្កដា ឆ្នាំ២០១៤ ស្ថិតនៅខាងក្រោយភ្នំយ៉ាត ក្នុងភូមិអូរតាប្រាង្គ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ 
អ្នកញៀនល្បែងបញ្ជល់មាន់ដែលសមត្ថកិច្ចឃាត់ខ្លួនទាំង៨នាក់រួមមាន៖ ទី១ ឈ្មោះវង់ សារ៉េត ភេទប្រុស អាយុ៣៤ឆ្នាំ មានទីលំនៅភូមិតាគ្រក់ ឃុំត្រែង ស្រុករតនៈមណ្ឌល ខេត្តបាត់ដំបង ។ ទី២ឈ្មោះ អន ខេង ភេទប្រុស អាយុ២៦ឆ្នាំ មានទីលំនៅភូមិទូលស្រឡៅ សង្កាត់ទូលល្វា ក្រុងប៉ៃលិន ខេត្តប៉ៃលិន ។ទី៣ឈ្មោះ សេង ប៉ិ ភេទប្រុស អាយុ៤៨ឆ្នាំ រស់នៅភូមិត្រាង ឃុំត្រាង ស្រុកកំរៀង ខេត្តបាត់ដំបង ។ ទី៤ឈ្មោះ ម៉ី សារិន ភេទប្រុស អាយុ៥៣ឆ្នាំ រស់នៅភូមិដូង ឃុំបឹងរាំង ស្រុកកំរៀង ខេត្តបាត់ដំបង ។
ទី៥ឈ្មោះ អ៊ុង សារឿង ភេទប្រុស អាយុ៤៧ឆ្នាំ រស់នៅភូមិរោងចក្រ សង្កាត់បរយាខា ក្រុងប៉ៃលិន ខេត្តប៉ៃលិន ។ទី៦ឈ្មោះណុប រដ្ឋា ភេទប្រុស អាយុ៤៥ឆ្នាំ រស់នៅភូមិអូរតាពុកក្រោម សង្កាត់ ទូលល្វា ក្រុងប៉ៃលិន ខេត្តប៉ៃលិន ។ទី៧ឈ្មោះ ឌិន វឿន ភេទប្រុស អាយុ៤៥ឆ្នាំ រស់នៅភូមិទឹកផុស សង្កាត់ប៉ៃលិន ក្រុងប៉ៃលិន ខេត្តប៉ៃលិន និងទី៨ឈ្មោះអៀប វឿន ភេទប្រុស អាយុ៥២ឆ្នាំ រស់នៅភូមិកូនខ្លុង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។ ប្រភពពីសាក្សីកន្លែងកើតហេតុបានឲ្យដឹងថា៖ មុនពេលកើតហេតុ ឃើញមានរថយន្តរបស់សមត្ថកិច្ចនគរបាល បើកក្នុងល្បឿនលឿន មកឈប់មុខសៃវៀនបញ្ជល់មាន់ ដែលមានម្ចាស់ ឈ្មោះណុប រដ្ឋា ភេទប្រុស និងឈ្មោះអន ខេង ភេទប្រុស បើកលេងយ៉ាងគគ្រឹកគគ្រេង ស្ថិតនៅចំណុចខាងក្រោយភ្នំយ៉ាត ក្នុងភូមិអូរតាប្រាង្គ សង្កាត់ប៉ៃលិន ក្រុង-ខេត្តប៉ៃលិន ។
ប្រភពបន្តថា៖ គ្រានោះស្រាប់តែឃើញ អ្នកលេងមាន់ជល់ នាំគ្នារត់ប្រសេកប្រសាច ខ្លះយកមាន់លាក់ក្នុងព្រៃ ,បោះចូលក្នុងទឹក ខ្លះទៀតរត់យកតែខ្លួន ដើម្បីគេចកុំឲ្យប៉ូលីសចាប់ ប៉ុន្តែនៅតែកម្លាំងសមត្ថកិច្ចនគរបាល ចាប់ឃាត់ខ្លួនមនុស្សចំនួន៨នាក់ រថយន្តកាមរីឆ្លាម១គ្រឿង និងម៉ូតូជាច្រើនគ្រឿង មកកាន់ស្នងការដ្ឋាននគរបាលខេត្តប៉ៃលិនផងដែរ។ លោកវេរៈសេនីយឯក ស៊ិន សុភាលក្ម្សី អនុប្រធានការិយាល័យកណ្តាលយុត្តិធម៏ នៃស្នងការដ្ឋាន នគរបាលខេត្ត បានបញ្ជាក់ប្រាប់អ្នកឆ្លើយឆ្លងព័ត៏មានឲ្យដឹងថា៖ ក្រោមការបញ្ជាផ្ទាល់ពីលោកស្នងការខេត្ត និងព្រះរាជអាជ្ញាអមសាលាដំបូងខេត្តប៉ៃលិន លោកបានដឹកនាំកម្លាំង នៃការិយាល័យព្រហ្មទណ្ទកម្រិតស្រាល ជាច្រើននាក់ ចុះទៅបង្ក្រាបល្បែងស៊ីសងបញ្ជល់មាន់ខុសច្បាប់ ដែលមានទីតាំងនៅកន្លែងកើតហេតុខាងលើ ។
លោកបានឲ្យដឹងទៀតថា៖ ក្នុងនោះដែរកម្លាំងរបស់យើង បានឃាត់ខ្លួនអ្នកញៀនល្បែងបញ្ជល់មាន់៨នាក់ រិបអួសរថយន្តកាមរីឆ្លាម១គ្រឿង ម៉ូតូ១២គ្រឿង និងមាន់ជល់៦ក្បាល យកមកកាន់ស្នងការដ្ឋាននគរបាលខេត្តប៉ៃលិន ព្រមទាំងរៀបចំសំណុំរឿងបញ្ជូនទៅតុលាការ ដើម្បីដោះស្រាយតាមនីតិវិធី ។ សូមបញ្ចាក់ថា ល្បែងបញ្ជល់មាន់ដែលសមត្ថកិច្ចចុះបង្ក្រាប ខាងលើធ្លាប់បើកលេងនៅភូមិទូលស្រឡៅ សង្កាត់ទូលល្វា ជាច្រើនឆ្នាំមកហើយ ប៉ុន្តែដោយមានការតាមដានពីក្រុមអ្នកយកព័ត៏មានពេក ក៏ផ្លាស់ទីតាំងមកកន្លែងកើតហេតុ ទើបបាន២អាទិត្យប៉ុណ្ណោះទេ ៕
