ប៉ៃលិន ៖ ប្រជាពលរដ្ឋដែលទីទ័ល ចំនួន១៧ គ្រួសារនៅឃុំស្ទឹងត្រង់ ស្រុកសាលាក្រៅ ត្រូវបានលោកស្រី ជា លាភ អភិបាលរងខេត្តប៉ៃលិន តំណាងឯកឧត្តម កើត សុធា អភិបាលនៃគណៈអភិបាលខេត្តប៉ៃលិន នាំយកអំណោយមនុស្សធម៏ ជាស្បៀងអាហារ និងថវិការ ទៅចែកជូនពួកគាត់ដើម្បីដោះស្រាយការ លំបាកក្នុងជីវភាពរស់នៅប្រចាំថ្ងៃ ។ ពិធីចែកអំណោយនេះត្រូវបានធ្វើឡើងកាលពីព្រឹកថ្ងៃទី ១៨ ខែកក្កដា ឆ្នាំ ២០១៤ នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។ 
លោកស្រី ជា លាភ អភិបាលរងខេត្តប៉ៃលិន បានមានប្រសាសន៏ឲ្យដឹងថា៖ក្រោយពីទទួលបានសេចក្តីរាយការណ៍ថាមានប្រជាពលរដ្ឋក្រីក្រ និងខ្វះខាតស្បៀ់ងអាហារ ទើប ឯកឧត្តម កើត សុធា អភិបាលនៃគណៈអភិបាលខេត្ត ចាត់ឲ្យក្រុមការងារថ្នាក់ខេត្ត នាំយកអំណោយយកមកចែកជូនដល់ពួកគាត់ភ្លាមៗដើម្បីជួយដោះស្រាយការលំបាកជូនពួកគាត់ ។លោកស្រីបន្តថា៖អំណោយដែលចែកជូននាពេលនេះគឺមានចំនួន ១៧ គ្រួសារ គឺប្រជាពលរដ្ឋក្នុងភូមិអន្លង់រក្សាចំនួន ០៦ គ្រួសារ ប្រជាពលរដ្ឋក្នុងភូមិដីស ចំនួន ១០ គ្រួសារ និងភូមិព្រៃសន្ទះ ចំនួន០១ គ្រួសារ ។អំណោយផ្តល់ជូនក្នុងមួយៗគ្រួសារទទួលបានអង្គ ចំនួន ៥០គីឡូក្រាម ទឹកត្រី ០៦ ដប ទឹកស៊ីអ៊ីវ ០៦ដប ត្រីខ ០៥ កំប៉ុង ស្ករស ០១ គីឡូ ក្រាម ប៊ីចេងកន្លះគីឡូក្រាម និងថវិកា ៥ ម៉ឺនរៀល ។
លោកស្រីបានផ្តាំផ្ញើរដល់ប្រជាពលរដ្ឋត្រូវយកចិត្តទុកដាក់លើកបញ្ហាសុខភាព គឺត្រូវរស់នៅមានអនាម័យ ដោយហូបទឹកស្អាត បើមិនមានទឹកស្អាតទេគឺត្រូវដាំទឹកឲ្យពុះមុននឹងបរិភោគដើម្បីជៀសវាងកើតមានជំងឺផ្សេងៗ។ ប្រជាពលរដ្ឋក្រីក្រដែលបានទទួលអំណោយ បានថ្លែងអំណរគុណដល់អាជ្ញាធរខេត្តប៉ៃលិនជាពិសេសនោះ គឺឯកឧត្តម កើត សុធា ជាអភិបាលខេត្តដែលលោកបានគិតគូរពីសុខទុក្ខការលំបាករបស់ប្រជាពលរដ្ឋ ព្រមទាំងចាត់ឲ្យក្រុមការងារ ថ្នាក់ខេត្តនាំយកអំណោយយកមកចែកជូនដល់ពួកគាត់នាថ្ងៃនេះ ពួកគាត់មានចិត្តត្រែកអរយ៉ាងខ្លាំងនៅពេលដែលពួកគាត់កំពុង តែខ្វះខាតស្បៀងអាហារ សម្រាប់ជីវភាពរស់នៅប្រចាំថ្ងៃ ៕
