ចោរប្លន់ប្រដាប់អាវុធពីរនាក់ ធ្វើសកម្មភាពបាញ់ពីរគ្រាប់ប្លន់ម៉ូតូពីនារីម្នាក់មិនបានសម្រេច ត្រូវប្រជាពលរដ្ឋ ចាប់វាយស្ទើរស្លាប់ស្ទើររស់ម្នាក់និង ម្នាក់ទៀតរត់រួច

ភ្នំពេញ៖ ចោរប្លន់ប្រដាប់អាវុធពីរនាក់ ម្នាក់ត្រូវប្រជាពលរដ្ឋវាយរហូតស្ទើរស្លាប់ស្ទើររស់ និង​ម្នាក់ទៀត​ត្រូវរត់គេចខ្លួន បន្ទាប់ពីពួកគេទាំងពីរនាក់ ធ្វើសកម្មភាពបាញ់ប្លន់យកម៉ូតូ និងគ្រឿងអលង្ការ​ពីនារីម្នាក់​មិន​បានសម្រេច នៅចំណុចផ្លូវលេខ៧០ ស្ថិតក្នុងភូមិទួលរកា សង្កាត់ចាក់អង្រេក្រោម

កាលពីវេលាម៉ោង ២៣និង០០នាទីយប់ថ្ងៃទី២៣ ខែកក្កដា ឆ្នាំ២០១៤។

            យោងតាមប្រភពព័ត៌មានពីសាក្សីបានឲ្យដឹងថា៖ ទាក់ទិននឹងអំពើបាញ់ប្លន់ខាងលើនេះ គេសង្កេត​ឃើញ​នារីរងគ្រោះខាងលើ មិនបានបញ្ជាក់ឈ្មោះ បានជិះម៉ូតូមួយគ្រឿងម៉ាកស្គុបពី ទើបតែចេញមកពីធ្វើការ លុះ​មក​ដល់មុខផ្ទះរបស់ខ្លួន ដែលនៅជិតកន្លែងកើតហេតុនេះ ស្រាប់តែមានចោរប្រដាប់អាវុធមួយក្រុមមានគ្នាពីរនាក់ ជិះម៉ូតូមួយគ្រឿងម៉ាកសេ១២៥ សេរីឆ្នាំ២០១៤ ពណ៌ខ្មៅពាក់ស្លាកលេខភ្នំពេញ 1CK-6647 បានជិះ​មក​ពីក្រោយ  ហើយលើកកាំភ្លើងបាញ់ឡើងលើចំនួនមួយគ្រាប់ដើម្បីគំរាមឲ្យនារីរងគ្រោះចុះពីលើម៉ូតូ ​និងឲ្យដោះ​គ្រឿង​អលង្កា ក្នុងខ្លួនឲ្យគេទាំងអស់ ។

ដោយនារីរងគ្រោះមានការភ័យខ្លាំងពេក​ ក៏បានស្រែកឆោរឡោរឲ្យគេ​ឯងជួយ ហើយស្នូរកាំភ្លើងដែលបន្លឺឡើងចំនួនមួយគ្រឿងនោះ​ បានបង្កឲ្យមានការភ្ញាក់ផ្អើលជាខ្លាំង​ដល់ប្រ​ជា​ពលរដ្ឋ ​ដែលនៅជិតកន្លែងកើតហេតុ​ និងបាននាំគ្នាមកជួយអន្តរាគមន៍​ វាយប្រតាយប្រតប់ដណ្តើម​កាំភ្លើង​ជាមួយនិងជនសង្ស័យម្នាក់ ក្នុងចំណោមបក្សពួកពីរនាក់ ដែលមានកាំភ្លើងជាប់ដៃនោះ ក៏បណ្តាលឲ្យផ្ទុះគ្រាប់​កាំភ្លើងមួយគ្រាប់ថែមទៀតតែសំណាងល្អមិនបណ្តាលឲ្យចំនណារម្នាក់ឡើយហើយកាំភ្លើងត្រូវប្រជាពលរដ្ឋដណ្តើមបានក៏ធ្វើការព្រួតវាយម្នាក់មួយដៃមួយជើងស្ទើរស្លាប់ស្ទើររស់សល់តែដង្ហើមចង្រឹតចំណែកឯជនសង្ស័យម្នាក់ទៀតឃើញស្ថានការដូចនេះក៏ បានព្យាយាមរត់គេចខ្លួនបាត់ស្រមោលសូន្យឈឹងតែម្តង។
  ក្រោយកើតហេតុសមត្ថកិច្ចមូលដ្ឋានបានចុះអន្តរាគមន៍ដល់កន្លែងកើតហេតុនិងធ្វើការឃាត់ខ្លួនជនសង្ស័យខាងលើរួមទាំងកាំភ្លើងម៉ូតូនិងវត្ថុតាងផ្សេងៗទៀតបញ្ចូនទៅកាន់អធិការដ្ឋាននគរបាលខណ្ឌមានជ័យដើម្បីកសាងសំណុំរឿងបញ្ចូនទៅតុលាការចាត់ការចាត់ការតាមផ្លូវច្បាប់៕