ខេត្តក្រចេះ៖ នៅវេលាម៉ោងប្រមាណជា ១២និង៣០នាទីរំលងអាធ្រាតឈានចូលថ្ងៃទី២៥ ខែកក្ដដា ឆ្នាំ២០១៤ ប្រជាពលរដ្ឋនៅឃុំស្វាយជ្រះ ស្រុកស្នួល ខេត្តក្រចេះ បានភ្ញាក់ផ្អើល ដោយលឺស្នូរកាំភ្លើងផ្ទុះបំពងនាកណ្តាលរាត្រីដែលត្រូវបានគេដឹងថា ជាការប៉ះទង្គិចគ្នា រវាងសមត្ថកិច្ច
ជាមួយក្រុមអ្នកកាងឈ្មួញដឹកជញ្ជូនព្រៃឈើ ខណៈដែលសមត្ថកិច្ចចំរុះ ដឹកនាំដោយលោក ទី សុវិនថាល់ ព្រះរាជអាជ្ញាអមសាលាដំបូងខេត្តក្រចេះ កំពុងចុះបង្ក្រាបរថយន្តដឹកឈើ នៅក្នុងភូមិសាស្ត្រ ស្រុកស្នួលខេត្តក្រចេះ ។
តាមប្រភពព័ត៌មានបានឲ្យដឹងថា៖ ការផ្ទុះអាវុធនេះ បណ្ដាលឲ្យស្រ្តីម្នាក់ ដែលទើបនឹងឆ្លងទន្លេបានប្រហែលជា ពីរខែ ទទួលរងរបួសយ៉ាងធ្ងន់ធ្ងរចំនួន ពីរកន្លែង ១កន្លែងនៅកំភួនដៃខាងស្ដាំ មួយគ្រាប់ និងកន្លែងទី២ នៅចំណុច ស្មាខាងឆ្វេង១គ្រាប់ បច្ចុប្បន្ន ស្ត្រីដែលទទួលរងរបួស ក្នុងការបាញ់បោះនេះ ត្រូវបានក្រុមគ្រួសារ យកទៅសំរាកនៅមន្ទីរពេទ្យបង្អែក ខេត្តក្រចេះ។
ប្រភពព័ត៌មានពីកន្លែងកើតហេតុបានឲ្យដឹងទៀតថា៖ នេះជាការផ្ទុះអាវុធរបស់មន្ត្រីប៉េអឹមផ្ទៃប្រទេសម្នាក់ ឈ្មោះ ហ៊ាង ធារ៉ា ដែលទើបតែផ្លាស់មកកាន់ខេត្តក្រចេះ ក្នុងគ្រាចុះអនុវត្ត ការបង្ក្រាបបទល្មើសព្រៃឈើ ក្រោមការដឹកនាំរបស់ព្រះរាជអាជ្ញាអមសាលាដំបូងខេត្តក្រចេះ ។
ទោះជាយ៉ាងណាក៏ដោយ លោក ទី សុវិនថាល់ ព្រះរាជអាជ្ញាអមសាលាដំបូងខេត្តក្រចេះ បានប្រាប់តាមទូរស័ព្ទថាៈ ការបង្កឲ្យមានគ្រោះដល់ប្រជាជននាពេលនេះ មិនមែនជាការផ្ទុះអាវុធរបស់សមត្ថកិច្ចនោះទេ ព្រោះពេលចុះបង្ក្រាបការដឹកជញ្ជូនឈើនាពេលនេះ សមត្ថកិច្ចបានប៉ះទង្គិចជាមួយក្រុមល្មើស ដែលឈរកាងឈ្មួញដឹកជញ្ជូនព្រៃឈើ កាលពីរំលងអាធ្រាត្រឈានចូល ថ្ងៃទី២៥ ខែកក្កដា ឆ្នាំ២០១៤ ៕
