ខេត្តស្ទឹងត្រែង៖នៅថ្ងៃទី២៥កក្កដានេះ ទឹកទន្លេមេគង្គបានការហក់ឡើងដល់កម្ពស់៩ម៉ែត្រ២៧ធ្វើឱ្យ ប្រជាពលរដ្ឋ ដែលរស់នៅប្របនឹងដងទន្លេមេគង្គ ក្នុងខេត្តស្ទឹងត្រែង សម្តែងនៅការព្រួយបារម្ភ នៃកំពស់ទឹកទន្លេ បន្ទាប់ពីមានភ្លៀងធ្លាក់ ជារាងរាល់ថ្ងៃជោគជាំ ស្រោចស្រព
មកលើដែនដីរដ្ឋបាលខេត្តជាប់ៗគ្នា តាំងពីដើមខែកក្កដារហូតដល់ចុងខែកក្កដានេះ ។ របបទឹកទន្លេក្នុងខេត្តស្ទឹងត្រែង ត្រូវគេកត់សំគាល់ឃើញថា មានទន្លេមេគង្គ ទន្លេសេកុង ទន្លេសេសាន្ត និងទន្លេស្រែពក បាននិងកំពុងតែបន្តហក់ឡើងយ៉ាងខ្លាំង នាប៉ុន្មានថ្ងៃនេះ ញ៉ាំងឲ្យប្រជាពលរដ្ឋ ដែលមាន លំ នៅស្ថាន ប្របនឹងដងទន្លេទាំងនោះ មានក្តីកង្វល់ពីការហក់ឡើងនេះ ធ្វើឲ្យលំនៅស្ថាន សត្វពាហនៈគោក្របី ជ្រូកមាន់ទា ផលដំណាំកសិកម្ម និងដំណាំរួមផ្សំឯទៀតៗ រងនូវការលិចលង់ បាត់បង់បង្កមហន្តរាយ ដល់ជីវភា ពរស់នៅប្រចាំថ្ងៃ របស់ពួកគាត់ ព្រោះថា ក្នុងឆ្នាំ២០១៣កន្លងទៅ របបទឹកជំនន់នេះ បានបង្ក ផលប៉ះពាល់យ៉ាងធ្ងន់ធ្ងរ ដល់ជីវភាពរស់នៅរបស់ពួកគាត់យ៉ាងខ្លាំង បើទោះបីនៅក្រោយទឹកជំនន់ ក្រុមប្រជាពលរដ្ឋដែលរងគ្រោះ និង រងផលប៉ះពាល់ ពីរបបទឹកជំនន់នោះ ត្រូវបានយកចិត្តទុកដាក់ ពីអាជ្ញាធរ និងរាជរដ្ឋាភិបាលក៏ដោយក្តី ហើយ ពួកគាត់ ពិតជាមិចង់ឲ្យទឹកជំនន់ ខ្យល់ព្យុះ ឬគ្រោះធម្មជាតិនានា កើតឡើងនោះឡើយ។
ទាក់ទិននឹងកង្វល់របស់ប្រជាពលរដ្ឋនេះ កម្ពុជាថ្មីបានទំនាក់ទំនងសុំការពន្យល់ ពីលោកប៉ាង ប៉េង ប្រធានមន្ទីរធនធានទឹក និងឧត្តុនិយមខេត្ត លោកបានឲ្យដឹងថា នៅថ្ងៃ២៥កក្កដានេះ កំពស់ទឹក ទន្លេក្នុងខេត្តស្ទឹងត្រែង មានការហក់ឡើងមកត្រឹមកំពស់៩ម៉ែត្រ២៧ លើសពីថ្ងៃម្សិលមានត្រឹមកំពស់៩ម៉ែត្រ ១៥ប៉ុណ្ណោះ ។ លោកប្រធានមន្ទីរបានថ្លែងទៀតថា បើតាមការព្យាករណ៏ ពីក្រសួងធនធានទឹក និងឧត្តុនិយម ទឹកទន្លេក្នុងខេត្តស្ទឹងត្រែង អាចនឹងឈានឡើងដល់កម្រិតកំពស់ប្រកាសអាសន្ន គឺ១០ ម៉ែត្រ៧០។
ហើយក្រសួង បានចេញសេចក្តីប្រកាស ឲ្យប្រជាពលរដ្ឋដែល មានលំនៅស្ថាន ប្របនឹងដងទន្លេមេគង្គទាំងអស់ត្រូវយកចិត្តទុកដាក់ និងធ្វើការប្រុងប្រយ័ត្នខ្ពស់ ព្រោះថា ទឹកអាចនឹងឈានដល់ការលិចលង់ ក្នុងកម្រិតកំពស់១២ម៉ែត្រ ។ នៅក្នុងកិច្ចប្រជុំថ្មីៗនេះអាជ្ញាធរខេត្តបានរៀបចំផែនការ ទប់ទល់នឹងគ្រោះមហន្តរាយថ្នាក់ ខេត្តថា អាជ្ញាធរបានបង្កើតគណៈកម្មាការ គ្រប់គ្រងគ្រោះមហន្តរាយរួចហើយ មានមន្ទីរជំនាញ សហការណ៏ និងចុះប្រតិបត្តការជាមួយ សាលាខេត្ត មន្ទីរពាក់ព័ន្ធ កងកម្លាំងប្រដាប់អាវុធទាំង៣ប្រភេទ មានយោធា កងនគរបាល និងកងរាជអាវុធហត្ថ។ ដោយតម្រូវឲ្យមន្ទីរ និងអង្គភាពពាក់ព័ន្ធទាំងអស់ ត្រៀមជាមធ្យាបាយ មានរថយន្ត ទូក កាណូត ស្បៀងអាហារ ថ្នាំពេទ្យជាដើមនោះ សម្រាប់ផ្គត់ផ្គង់ និងជម្លៀសពលរដ្ឋដែលរងគ្រោះ ទៅកាន់ទីទួលមានសុវត្ថិភាព ៕
