កាលពីព្រឹកថ្ងៃទី២៧ ខែ កក្កដា ឆ្នាំ២០១៤នេះ នៅវិទ្យាល័យអង្គរ ខេត្តសៀមរាប មានធ្វើការ ប្រឡងជ្រើសរើសមន្ត្រីក្របខ័ណ្ឌរដ្ឋបាលស៊ីវិលនៃក្រសួងមហាផ្ទៃ ដែលមានបេក្ខជន ក្នុងខេត្តសៀមរាប ចំនួន១៥៥រូប ស្រី៨១រូប បានដាក់ពាក្យប្រឡងក្នុងក្របខ័ណ្ឌលេខាធិការរដ្ឋបាល ដែល
បានប្រព្រឹទ្ធទៅក្រោមការត្រួតពិនិត្យ និង បើកវិញ្ញាសាររបស់ ឯ.ឧ ស៊ិន រុន អភិបាលរងនៃ គណៈអភិបាលខេត្ត ព្រមទាំងអស់លោក លោកស្រីជាតំណាងក្រសួងមហាផ្ទៃ លោកនាយករដ្ឋបាលសាលាខេត្ត គណៈមេប្រយោគ និង គណៈកម្មការប្រឡង ជាច្រើនរូបចូលរួមផងដែរ ។
តាមប្រសាសន៍របស់លោក លី សំរឹទ្ធ នាយករដ្ឋបាលសាលា ខេត្តសៀមរាបបានឲ្យដឹងថា ការដាក់ពាក្យប្រឡងចូលមន្ត្រីក្របខ័ណ្ឌក្រសួងមហាផ្ទៃ មានចំនួនសរុប ១៥៥ រូប ស្រី ៨១រូប ក្នុងក្របខ័ណ្ឌមន្ត្រីលេខាធិការ រដ្ឋបាល នៃក្រសួងមហាផ្ទៃ ។ លោកក៏បានឲ្យដឹងផងដែរថា បេក្ខជនដាក់ពាក្យសុំធ្វើការប្រឡងសុទ្ធសឹង ជាសមណសិស្ស និងនិស្សិត នៅខេត្តសៀមរាប ។ នៅមណ្ឌលសៀមរាបមានបន្ទប់ប្រឡងសរុប ចំនួន០៦បន្ទប់ក្នុងថ្ងៃប្រឡងនេះមានវត្តមានបេក្ខជនចូលមកប្រឡងមានចំនួន ១៤៤រូប និង អវត្តមានបេក្ខជនចំនួន ១១រូប នៅការប្រឡងនេះក្រសួងមហាផ្ទៃបានជ្រើសរើសនូវវិញ្ញាសារគណិតវិទ្យាចំណេះដឹងទូទៅនិងលិខិតរដ្ឋបាលសម្រាប់បេក្ខជនប្រឡងក្របខណ្ឌក្រសួងមហាផ្ទៃក្នុងក្របខ័ណ្ឌមន្ត្រីលេខាធិការរដ្ឋបាល ទៅតាមការកំណត់របស់ក្រសួងមហាផ្ទៃ ។
មានប្រសាសន៍នោះដែរឯ.ឧ ស៊ិន រុន ក៏បានធ្វើការផ្តាំផ្ញើដល់ក្មួយៗ ដែលជាបេក្ខជនទាំងពីរភេទ ត្រូវខិតខំយកចិត្តទុកដាក់ឲ្យបានខ្ពស់ នៅក្នុងពេលប្រឡង ហើយត្រូវបញ្ចេញឲ្យអស់នូវ សមត្ថភាពរបស់ខ្លួន នូវចំណេះដឹងដែលបានសិក្សាកន្លងមករបស់ក្មួយៗទាំងពីរភេទ ព្រមទាំងត្រូវគោរពឲ្យ បានល្អនូវបទបញ្ជា អង្គការវិន័យក្នុងពេលប្រឡង និង ស្តាប់នូវការណែនាំរបស់គណៈមេប្រយោគឲ្យបានខ្ជាប់ខ្ជួន ។ ម្យ៉ាងទៀតការប្រឡងជ្រើសរើសមន្ត្រីក្របខណ្ឌរដ្ឋបាលក្រសួងមហាផ្ទៃនាពេលនេះ គឺជាការបំពេញនូវក្របខ័ណ្ឌមន្ត្រីរដ្ឋបាលរបស់ក្រសួងមហាផ្ទៃ ហើយក៏ជាឱកាសដ៏ប្រសើរ សម្រាប់ក្មួយៗជាបេក្ខជនទាំងអស់ ក្នុងការវាស់ស្ទង់នូវគំនិតយល់ដឹង ចំណេះដឹង ពីសមត្ថភាពរបស់ក្មួយៗ ដើម្បីយកទៅបម្រើការងារ នៅក្នុងក្របខណ្ឌមន្ត្រីរាជការរដ្ឋបាល នៃក្រសួងមហាផ្ទៃ សម្រាប់ទៅថ្ងៃអនាគត ។
ក្នុងការប្រឡងនេះ គឺបានប្រព្រឹត្តទៅមួយព្រឹកពេញ ប្រកបដោយភាពរលូន និង ទទួលបានជោគ ជ័យ ទៅតាមការកំណត់នៃកម្មវិធីរបស់ក្រសួងមហាផ្ទៃ ៕
