នាព្រឹកថ្ងៃទី២៨ ខែកក្កដា ឆ្នាំ២០១៤នេះ នៅរដ្ឋបាលសាលាខេត្តសៀមរាប បានបើកកិច្ចប្រជុំវិសាមញ្ញ របស់ក្រុមប្រឹក្សាខេត្តសៀមរាប អាណត្តិទី២ដែលដឹកនាំកិច្ចប្រជុំដោយឯ.ឧ នូ ផល្លា ប្រធានក្រុមប្រឹក្សាខេត្តសៀមរាប ឯ.ឧ ឃឹម ប៊ុនសុងអភិបាលនៃគណៈអភិបាលខេត្តសៀមរាប
ដោយមានអញ្ជើញចូលរួមពីសំណាក់ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្តអស់លោក លោកស្រីជានាយករដ្ឋបាល នាយកទីចាត់ការអង្គភាពទាំង ៦ ចំណុះរដ្ឋបាលសាលាខេត្ត ថ្នាក់ដឹកនាំមន្ទីរអង្គភាព អាជ្ញាធរក្រុង ស្រុក។
បន្ទាប់ពីការពិនិត្យកូរ៉ុម សមាសភាពសមាជិកក្រុមប្រឹក្សាខេត្ត ចូលរួមប្រជុំមានវត្តមាន ១៨រូប លើ១៩រូប រួចមក
ឯ.ឧ នូ ផល្លា ប្រធានក្រុមប្រឹក្សាខេត្តបើកកិច្ចប្រជុំវិសាមញ្ញ ដើម្បីពិនិត្យនិងអនុម័តរបៀបវារៈចំនួន៣ ដែលបានលើកឡើងក្នុងកិច្ចប្រជុំ ពិនិត្យពិភាក្សា និងអនុម័តលើសេចក្តីព្រាង សេចក្តីសម្រេច ស្តីពីការទទួលស្គាល់សមាសភាពប្រធានអនុប្រធាន និង សមាជិកគណៈកម្មាធិការសម្របសម្រួល បច្ចេកទេសក្រុមប្រឹក្សាខេត្ត និង ការអនុម័តលើសេចក្តីព្រាងសេចក្តីសម្រេចស្តីពីការតែងតាំងសមាសភាព គណៈកម្មាធិការរៀបចំដែនដី និងនគរូបនីយកម្មខេត្ត និងពិនិត្យអនុម័តនូវបេក្ខភាពអនុប្រធានមន្ទីរសុខាភិបាលខេត្តផងដែរ។
បន្ទាប់ការអានសេចក្តីព្រាងសេចក្តីសម្រេច ស្តីពីការទទួលស្គាល់សមាសភាពប្រធាន អនុប្រធាន និង សមាជិក របស់គណៈកម្មាធិការសម្របសម្រួលបច្ចេកទេសក្រុមប្រឹក្សា ដោយលោក ហែន ពុទី្ធនាយករងរដ្ឋបាលសាលាខេត្តរួចមក អង្គប្រជុំក្រុមប្រឹក្សាទាំងមូលបានធ្វើការពិនិត្យ និងពិភាក្សា ព្រមទាំងបានឲ្យអនុញ្ញាតឲ្យតំណាងសមាជិកក្រុមប្រឹក្សាមកពីគណបក្សនយោបាយទាំងពីរដែលមានអសនៈនៅក្នុងក្រុមប្រឹក្សាខេត្ត អាណត្តិទី២ ដើម្បីប្រកាសនូវសមាសភាពរបស់សមាជិកខ្លួន ចូលជាសមាជិកគណៈកម្មាធិការសម្របសម្រួល បច្ចេកទេសក្រុមប្រឹក្សាខេត្ត។ ក្នុងនោះដែរតំណាង សមាជិកក្រុមប្រឹក្សាមកពីគណបក្សសង្គ្រោះជាតិ ក៏បានធ្វើពហិការចូលជាសមាជិកគណៈកម្មាធិការសម្របសម្រួលបច្ចេកទេសក្រុមប្រឹក្សាខេត្ត ។ តែក្រោយពេលដែលអង្គប្រជុំបានប្រព្រឹត្តទៅតាមនីតិវិធីតាមការសេចក្តីណែនាំរបស់ ក្រសួងមហាផ្ទៃអង្គប្រជុំបានធ្វើការអនុម័តលើសេចក្តីព្រាងសេចក្តីសម្រេចរួចមកសមាជិក ក្រុមប្រឹក្សាខេត្តចំនួន៤រូប មកពីគណបក្សសង្គ្រោះជាតិ បានដើរចេញពីកិច្ចប្រជុំដោយមិនចូលរួមរហូតដល់ចប់កិច្ចប្រជុំ ។ ក្នុងនោះដែរឯកឧត្តមនូផល្លាក៏បានធ្វើការបញ្ជាក់នូវបញ្ជាផ្ទៃក្នុង របស់ក្រុមប្រឹក្សាខេត្តអាណត្តិទី២ ដែលបានសមាជិកកិច្ចប្រជុំក្រុម ប្រឹក្សាខេត្ត បានអនុម័ត ១៩លើ ១៩អសនៈ ។ទោះបីការដើរចេញរបស់សមាជិកក្រុមប្រឹក្សា នៃគណបក្សសង្គ្រោះជាតិទាំង០៤រូបនោះក៏ដោយ តែកិច្ចប្រជុំរបស់ក្រុមប្រឹក្សាខេត្ត អាណត្តិទី២ បានបន្តដំណើរការរបស់ខ្លួនទៅដោយរលូនទៅ តាមរបៀបវារៈដែលបានអនុម័តហើយនោះ ។
ឯ.ឧ នូផល្លាក៏បានថ្លែងអំណរគុណចំពោះការយកចិត្តទុកដាក់ ចំណាយពេលចូលរួមក្នុងកិច្ចប្រជុំដ៏មានសារៈសំខាន់នេះ របស់ថ្នាក់ដឹកនាំ អាជ្ញាធរក្រុង ស្រុក។ ឯកឧត្តមក៏បានធ្វើការណែនាំមួយចំនួនដល់ឯកឧត្តមលោកជំទាវអស់លោកលោកស្រីដែលជាប្រធានអនុប្រធានសមាជិកនៃគណៈកម្មាធិការសម្របសម្រួល បច្ចេកទេសនិងគណៈកម្មាធិការរៀបចំដែនដី និងនគរូបនីយកម្មខេត្តរបស់ក្រុមប្រឹក្សាខេត្ត ត្រូវគោរពឲ្យបាននូវរាល់របបនៃកិច្ចប្រជុំរបស់ខ្លួន គឺត្រូវមានវត្តមានចូលរួម រាល់ការប្រជុំ។ ឯកឧត្តមប្រធានក្រុមប្រឹក្សាខេត្ត ក៏បានគូសបញ្ជាក់ថា ផ្អែកលើមូលដ្ឋាននេះ គណៈកម្មាធិការសម្របសម្រួលបច្ចេកទេសគឺជាយន្តការ ប្រកបដោយប្រសិទ្ធភាព នឹង ផ្តល់យោបល់ជូនក្រុមប្រឹក្សារបស់ខ្លួន ដើម្បីជាមូលដ្ឋាននៃសេចក្តីសម្រេចនានាក្នុងការ លើកកម្ពស់អភិបាលកិច្ចល្អ ការផ្តល់សេវាសាធារណៈ និង ការអភិវឌ្ឍន៍មូលដ្ឋានតាមបែបប្រជាធិបតេយ្យសំដៅឆ្លើយ តបទៅនឹងតម្រូវការប្រជាពលរដ្ឋ និង រួមចំណែកកាត់បន្ថយភាពក្រីក្រ ៕
