ខេត្តស្ទឹងត្រែង៖សហគមន៍អេកូទេសចរណ៍ក្នុងតំបន់រ៉ាមសារ ខេត្តស្ទឹងត្រែង ពោរពេញទៅដោយសក្តានុពលខ្ពស់ បាននឹងកំពុងទាក់ទាញភ្ញៀវទេសចរណ៍ជាតិ និងអន្តរជាតិ ក៏ដូចជាភ្ញៀវក្នុងតំបន់ និងក្រៅតំបន់ជាដើមនោះ ឲ្យចាប់អារម្មណ៍ និងមកលេងកម្សាន្ត ក៏ដូចជាទស្សនានូវទស្សនីយភាពជាច្រើនបែបដែលមាននៅក្នុងតំបន់នោះ នារដូវទឹកសម្រកនេះ ។
បើចង់ទៅកម្សាន្តនៅទីនោះ គឺត្រូវធ្វើដំណើរចេញពីទីរួមខេត្តស្ទឹងត្រែងឆ្ពោះទៅស្ពានសេកុង និងឆ្លងទៅទិសខាងជើងខេត្ត បានចម្ងាយជាង៥គីឡូម៉ែត្រ ហើយនៅខាងឆ្វេងដៃ ឃើញមានស្លាកសញ្ញាដាក់ថា(បក្សីមេគង្គរីសត) ហើយនៅទី
នោះ នឹងមានអ្នកចាំបម្រើសេវាជូនភ្ញៀវឲ្យដើរកម្សាន្តតាមរយៈកាណូតតូចៗ អាចផ្ទុកមនុស្សបានចំនួន៧នាក់ នោះភ្ញៀវទេសចរណ៍ នឹងបានទៅដល់គោលដៅកម្សាន្តតាមបំណង ។
លោក ឈួន ឆន នាយករងតំបន់រ៉ាមសារ បានបញ្ជាក់ប្រាប់ឲ្យដឹងថាៈតំបន់រ៉ាមសារ មានសហគមន៍នេសាទចំនួន១៧ និងសហគមន៍អេកូទេសចរណ៍ចំនួន២ គឺសហគ
មន៍អេកូទេសចរណ៍ (សម្រស់កោះហាន) និងសហគមន៍អេកូទេសចរណ៍ (បុរីអូរស្វាយសែនជ័យ)។ រីឯជីវចម្រុះដែលមានវត្តមានបណ្តុំនៅទីនោះ មានដូចជាត្រី១៣០ប្រភេទ សត្វស្លាប៩៧ប្រភេទ និថនិកសត្វ២១ប្រភេទផងដែរ ។
លោកនាយករងតំបន់រ៉ាមសារ ក៏បានឲ្យដឹងទៀតថាៈក្នុងចំណោមកោះទាំង៥០ ដែលភ្ញៀវទេសចរណ៍និយមចូលចិត្តទៅទស្សនា មានកោះទន្សាយ កោះពូថៅ កោះហិប និងកោះហានជាដើម ព្រោះកោះទាំងនោះមានសក្តានុពលអេកូឡូស៊ីខ្ពស់ក្នុងការទាក់ទាញភ្ញៀវទៅកម្សាន្តក៏ដូចជាបោះជំរុំតង់ជាដើម ។
សូមជម្រាបថាៈសហគមន៍អេកូទេសចរណ៍តំបន់រ៉ាមសារ បានធ្វើឲ្យភ្ញៀវទេសចរណ៍និយមចូលចិត្តតាមការស្នាក់អាស្រ័យ ដោយរបៀបបោះជំរំុតង់ សម្រាកលម្ហែរកាយ ស្រូបយកខ្យល់អាកាសបរិសុទ្ធ អាំងសាច់ ញ៉ាំភេសជ្ជៈរួមនិងអាហារប្រចាំតំបន់ឆ្ងាញ់ៗ និងស្តាប់បទចំរៀងយ៉ាងពិរោះរណ្តំចិត្តនៅលើកោះនាពេលរាត្រី ជាពិសេសស
ម្រាប់អ្នកដែលចូលចិត្តជិះទូកកម្សាន្តមើលទេសភាពព្រៃលិចទឹក និងពពួកសត្វស្លាបជាច្រើនប្រភេទនាពេលរសៀល និងងូតទឹកលេងយ៉ាងត្រជាក់កាយ ។
សូមបញ្ជាក់ថាៈតំបន់រ៉ាមសារ គ្រប់គ្រង និងអភិរក្សដោយក្រសួងបរិ
ស្ថាន មានចម្ងាយពីទីរួខេត្ត៥គីឡូម៉ែត្រ និងមានផ្ទៃដី១.៤៦០០ហិកតា លាតសន្ធឹងនៅតាមបណ្តោយដងទន្លេមេគង្គលើ ប្រវែង៣៧គីឡូម៉ែត្រផងដែរ ។ ដោយឡែកនៅក្នុងតំបន់រ៉ាមសារ មានកោះចំនួន៥០ ក្នុងនោះមានកោះធំៗចំនួន៧ និងកោះតូចៗចំនួន៤៣កោះ ។ ហើយភូមិសាស្ត្រតំបន់រ៉ាមសារនេះស្ថិតនៅក្នុងទឹកដីនៃស្រុកចំនួន២ និងក្រុង១ហើយក្នុងនោះដែរគឺមានស្រុកថាឡាបរិវ៉ាត់ ស្រុកបុរីអូរស្វាយសែនជ័យ និងក្រុងស្ទឹងត្រែង ៕
