ខេត្តកំពតះទោះជាចំណុចមុខផ្សារកំពង់ត្រាចត្រូវបានពង្រីកឲ្យមានទ្រង់ទ្រាយធំទូលាយទៅហើយក្តី ប៉ុន្តែនៅតែមានការលំបាកក្នុងពេលធ្វើដំណើរឆ្លងកាត់ ព្រោះតែចំណុចមុខនេះត្រូវបានក្លាយជាចំណតរថយន្តយ៉ាងអនាធិបតេយ្យ ស្របពេលបច្ចុប្បន្នមានរថយន្តដឹកថ្មនិងរថយន្តខ្នាតធំបើកប្រជែងឆ្លងកាត់ទីនេះជាច្រើនគ្រឿងផងនោះទើបបណ្តាលឲ្យចំណុចផ្លូវខាងលើត្រូវកកស្ទះចរាចរជាច្រើនអន្លើ។
គេបានកត់សម្គាល់ឃើញជារៀងរាល់ព្រឹកដងផ្លូវនេះត្រូវក្រុមអ្នករត់តាក់សីុយករថយន្តមកចតតម្រៀបគ្នាលើចិញ្ចើមផ្លូវ ហើយនាំគ្នារត់ដេញចាប់ម៉ូយយ៉ាងប្រញាយ ដែលធ្វើឲ្យអ្នកដំណើរតាមម៉ូតូនិងរថយន្តជួបការលំបាកគ្រប់ពេលវេលាជួនកាលឈប់ចតបន្តកន្ទុយគ្នា យើយក៏អាចស្ទះចរាចររាប់ម៉ោងទម្រាំឆ្លងកាត់បាន។ទន្ទឹមនឹងការកកស្ទះនេះក៏បានធ្វើឲ្យប៉ូលិសចរាចរគ្មានពេលទំនេរដែរ ដោយសមត្ថកិច្ចជំនាញជាប់រវល់ផ្លំកញ្ចែរអត់ទំនេរមាត់ ដើម្បីរៀបចំសណ្តាប់ធ្នាប់ឲ្យប្រជាពលរដ្ឋធ្វើដំណើរបានស្រួល។លើសពីនេះទីតាំងមុខផ្សារកំពង់ត្រាចឲ្យតែដល់ថ្ងៃបុណ្យជាតិឬពិធីផ្សេងៗគឺស្ទះផ្លូវរាល់តែលើក ហើយក៏នាំផលរំខានដល់អ្នកដំណើរគ្រប់ពេលវេលា។
លើសពីនេះចិញ្ចើមផ្លូវក្បែរផ្សារកំពង់ត្រាចក្រៅពីមានរថយន្តតាក់សីុចតតម្រៀបគ្នានោះក៏ជាបេនសំរាប់ចតរឺម៉កនិងការដាក់ឆ័ត្រលក់ដូរពាសវាលពាសកាលផងដែរដែលជាកក្តានាំឲ្យកកស្ទះដល់អ្នកដំណើរគ្រប់ពេលគ្រប់វេលា។ ប្រជាពលរដ្ឋតែងតែត្អូញត្អែរខណះដែលពួកគេបានធ្វើដំណើរឆ្លងកាត់ចំណុចខាងលើនេះ ជួនកាលពួកគាត់ត្រូវចតយានជំនិះរង់ចាំឱកាសដើម្បីឆ្លងកាត់ទីនោះដោយភាពលំបាកលំបិនទៀតផង។
ចំការយកចិញ្ចឹមផ្លូវធ្វើជាចំណតរថយន្តបង្កភាពស្មុគស្មាញដល់អ្នកដំណើរជាច្រើនឆ្នាំមកហើយនោះ គេមិនដឹងថា អ្នកគ្រប់គ្រងភាសីុចំណតរថយន្តគិតបែបណានោះទេ ឬមួយខ្ជិលរវល់លើបញ្ហានេះ ហើយចាំតែអង្គុយរាប់ក្បាុលឡានយកលុយច្រកហោប៉ៅយ៉ាងសប្បាយចិត្ត ទោះបីស្ទះចរាចរបែបនេះក្តី។
ម្យ៉ាងទៀតថ្វីត្បិតមានការកកស្ទះចរាចរត្រង់ចំណុចនេះហើយបែរជាអ្នកគ្រប់គ្រងផ្នែកភាសីុចំណតរថយន្តនហាក់មិនទាន់បានជ្រើសរើសរកទីតាំងណាមួយសំរាប់ឲ្យម្ចាស់រថយន្តតាក់សីុរកចំណតបាននៅឡើយ ហើយសង្ឃឹមថាបើគ្មានការកែទម្រង់ឲ្យបានទាន់ពេលវេលានោះទេដងផ្លូវមុខផ្សារស្រុកកំពង់ត្រាចនឹងក្លាយជាកន្លែងចំណតយាយន្តយ៉ាងអនាធិបតេយ្យមិនខាន។ ទាក់ទិននឹងករណីដូចខាងលើនៅព្រឹកថ្ងៃទី១ខែសីហា ឆ្នាំ២០១៤កម្ពុជាថ្មី មិនអាចសុំការអត្ថាធិប្បាយណាមួយពីលោក ប៉ែន សេង ប្រធានភាសីុក្នុងស្រុកកំពង់ត្រាចបានឡើយ ដោយសារពេលនេះទូរស័ព្ទរបស់លោកស្ថិតក្រៅតំបន់សេវា៕
