ដោយការមិនយកចិត្តទុកដាក់របស់ម្ចាស់ផ្សារសាមគ្គីខេត្តសៀមរាប ក្នុងការឲ្យក្រុមហ៊ុនដឹកជញ្ជូនសម្រាមមិន ទាន់ពេលវេលា ដោយបានស្តុបសម្រាមគទុកចោល ធ្វើឲ្យរលួយ និង ជះខ្លឹនអាក្រក់ដល់អ្នករស់នៅជិតខាងផ្សារនេះជាសម្ខាន់សណ្ឋាគារ ផ្ទះសំណាក់ និង ភ្ញៀវទេសចរណ៍ ។
តាមប្រសាសន៍របស់លោកស្រី ហេង គឹមស៊ាង រស់នៅជិតផ្សារសាមគ្គីបានឲ្យដឹងថា បច្ចុប្បន្ននេះក្លិនស្អុយគំនរ សម្រាមរបស់ផ្សារដែលស្តុបនៅជិតផ្ទះរបស់ពួគគាត់បានកំពុងតែធ្វើឲ្យប៉ះពាល់ដល់សុខភាពប្រជាពលរដ្ឋយ៉ាងធ្ងន់ធ្ងរផងដែរ ។លោកស្រីក៏បានសំណូមពរឲ្យម្ចាស់ផ្សារ ក៏ដូចអាជ្ញាធរក្រុងនិងខេត្ត ជួយដោះស្រាយបញ្ហាក្លិនស្អុយសម្រាមនេះជាបន្ទាន់ ព្រោះពួកគាត់បានដាក់ពាក្យប្តឹងទៅ អាជ្ញាធរខេត្ត និង ស្ថាប័នជំនាញរួចរាល់អស់ហើយ។
តាមការបញ្ជាក់របស់លោក ប៉ោង ហ៊ាង អ្នកទទួលខុសត្រូវបញ្ហាសម្រាមនៅផ្សារសាមគ្គីនេះ បានឲ្យដឹងថា ខាងផ្សាររបស់លោកបានប្រមូលសម្រាមទុកដាក់បានត្រឹមត្រូវហើយ តែបញ្ហាក្លិនស្អុយសម្រាមនេះដោយ សារតែខាងក្រុមហ៊ុនដឹកសម្រាមដែលលោកជួលនោះមកដឹកមិនទាន់ពេលវេលា។
ក្នុងការបញ្ជាក់របស់លោក កែវ ជាស៊ី ប្រធានរដ្ឋបាលនៃក្រុមហ៊ុនសម្អាតក្រុងការយ៉ាPLCបានឲ្យដឹងថា ការដឹកជញ្ជូនសម្រាមរបស់ក្រុមហ៊ុនលោកធ្វើទៅតាមកិច្ចសន្យា ដូច្នេះកាលណាសម្រាមរបស់ផ្សារនេះ ហូសកំណត់កិច្ចសន្យាត្រូវដឹកនោះក្រុមហ៊ុនលោកមិនទទួលខុសត្រូវ និង មិនមកដឹកនោះទេ។
ពាក់ព័ន្ធបញ្ហានេះលោក សូ ប្លាតុង អភិបាលស្តីទីក្រុងសៀមរាប បានទទួលស្គាល់ថា បញ្ហានេះពិតជាមានមែន ហើយកន្លងមកអាជ្ញាធរធ្លាប់ចុះទៅណែនាំម្តងរួចមកហើយ ប៉ុន្តែលើនេះលោក និង សហការជាមួយមន្ត្រីជំនាញចុះទៅធ្វើកិច្ចសន្យាព្រមាន បើលើកនេះគោរពតាម ការណែនាំរបស់សាលាក្រុងមិនបាននិង ធ្វើការផ្អាកពិន័យទៅតាមផ្លូវច្បាប់។
ពាក់ព័ន្ធទៅនឹងបរិស្ថាននោះដែរលោក ភួង លីណា ប្រធានស្តីទីមន្ទីរបរិសា្ថនខេត្តបានឲ្យដឹងថា លោករងចាំបទបញ្ជាពីអាជ្ញាធរខេត្ត ព្រោះប្រជាពលរដ្ឋគាត់ប្តឹងទៅសាលាខេត្ត ហើយពេលបានបទបញ្ជាលោកនិងចុះទៅ ព្រម ទាំងរកនូវវិធីដោះស្រាយបញ្ចប់ភ្លាមមិនចង់ទុកឲ្យបញ្ហានេះនៅរាំរ៉ៃបន្តទៅទៀតនោះឡើយ ។
សូមបញ្ជាក់ផងដែរថា សម្រាមនៅផ្សារសាមគ្គីនេះ កន្លងមកត្រូវបានបណ្តាញសារព័ត៌មានយើង ធ្វើការចុះផ្សាយ អំពីបញ្ហាសម្រាម និង យកផ្លូវសាធារណៈ ជួលឲ្យគេលក់ដូរ ធ្វើឲ្យការធ្វើចរាចរណ៍ចេញចូលទៅកាន់លំនៅដ្ឋាន របស់ បងប្អូនប្រជាពលរដ្ឋ នៅក្នុងភូមិបន្ទាយចាស់នេះពុំរួចឡើយ ហើយក៏ពុំដែលឃើញមានកម្លាំងសមត្ថកិច្ចសណ្តាប់ធ្នាប់ ណាម្នាក់ចុះទៅធ្វើការរៀបចំទីនោះទេ ឬក៏ត្រូវថ្នាំសណ្តំរបស់ម្ចាស់ផ្សារនេះ ៕
