កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម បានអះអាងថា ស្រុកស្ទឹងត្រង់នឹងប្រែក្លាយទៅជាតំបន់ទីប្រជុំជន កសិទេសចរណ៍ យ៉ាងសំខាន់ ក្នុងពេលឆាប់ៗខាងមុខនេះ ដោយមានការរៀបចំដាក់តាំងរូបផ្លែឈើនៅរង្វង់មូលគល់ស្ពានស្ទឹងត្រង់-ក្រូចឆ្មារ និងរៀបចំឲ្យមានការដាក់លក់ផ្លែឈើ ផងដែរ ។ ការថ្លែងយ៉ាងដូច្នេះក្នុងពិធីសម្ពោធដាក់ឲ្យប្រេីប្រាស់ជា
ផ្លូវការនូវសមិទ្ធផលនានា នៃមន្ទីរពេទ្យបង្អែក ហ៊ុន សែន ស្ទឹងត្រង់ កាលពីព្រឹកថ្ងៃទី១៦ ខែកុម្ភៈ ឆ្នាំ២០២១ ស្ថិតក្នុងភូមិត្នោតតាសាយ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
ថ្លែងក្នុងពិធីនោះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណដល់សមាគមសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ដែលបានគាំទ្រដល់វិស័យសុខាភិបាល ក៏ដូចជាមន្ទីរពេទ្យបង្អែកស្រុកស្ទឹងត្រង់នេះ ដោយបានផ្កល់ជាសម្ភារៈបរិក្ខាពទ្យ បូករួមទាំងសំណង់អគារ ផ្លូវបេតុង ប្រព័ន្ធបង្ហូរទឹក និងសួនច្បារ យ៉ាងស្រស់ស្អាត សរុបជាថវិកាប្រមាណជាង ៣៣ម៉ឺនដុល្លារអាមេរិក ដែលជាសមិទ្ធផល ដ៏មានសារៈសំខាន់ សម្រាប់ជួយដល់ប្រជាពលរដ្ឋ នៅក្នុងស្រុកស្ទឹងត្រង់ ផងដែរ ។ 
ឯកឧត្តមអភិបាលខេត្ត បានបញ្ជាក់ថា ថ្វីត្បិតតែ យើងទទួលបានសមិទ្ធផលល្អហើយ តែចំណុចសំខាន់ គឺសូមឲ្យប្រជាពលរដ្ឋយើង សូមព្យាបាលសុខភាពនៅឯផ្ទះ ដោយខ្លួនឯងជាមុនសិន ពោលគឺ ត្រូវចេះការពារ ប្រសើរជាង ការព្យាបាល តាមរយៈ ការរស់នៅអនាម័យសុខភាព និងការទទួលទានចំណីអាហារផ្សេងៗ ឲ្យបានល្អប្រសើរ ។ យើងទទួលបានអគារ និងទីកន្លែងល្អហើយ តែសូមឲ្យល្អ ចំពោះ តែអ្នកជម្ងឺ មកទទួលសេវាសុខាភិបាល តែប៉ុណ្ណោះ ពោលគឺ អ្នកគ្មានជម្ងឺ ពុំចាំបាច់មកសម្រាកព្យាបាលនោះឡើយ ។
ជាមួយគ្នានោះ ឯកឧត្តមអភិបាលខេត្ត ក៏បានលេីកឡើងថា តម្លៃនៃសុខសន្តិភាពមិនអាចកាត់ថ្លៃបានឡេីយ មានសុខសន្តិភាព ទេីបមានការអភិវឌ្ឍន៍ ជាក់ស្ដែងស្រុកស្ទឹងត្រង់យើងនេះ ទទួលបានសមិទ្ធផលធំៗជាច្រើន មានដូចជាស្ពាន ផ្លូវ និងមន្ទីរពេទ្យបង្អែកជាដើម ដូច្នេះសូមពុកម៉ែបងប្អូនប្រជាពលរដ្ឋទាំងអស់ រួមគ្នាថែរក្សាសុខសន្តិភាពមួយនេះឲ្យបានគង់វង្ស ដេីម្បីបន្តការអនុវត្តន៍រីកចម្រើនទៅមុខជាលំដាប់ផងដែរ ៕
