កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម បានដឹកនាំកម្លាំងសមត្ថកិច្ចជំនាញ ចុះជួយអន្តរាគមន៍ពន្លត់អគ្គីភ័យឆាបឆេះឃ្លាំងស្តុកកំណាត់មួយកន្លែងនៅទល់មុខរោងចក្រផលិតក្តារបន្ទះ ស្ថិតនៅក្នុងភូមិអណ្ដូងច្រុះ ឃុំអំពិល ស្រុកកំពង់សៀម ខេត្តកំពង់ចាម ដែលមានទំហំប្រមាណជា៣០x៤០ម៉ែត្រ កម្ពស់៦ម៉ែត្រ និងមានសាច់កំណាត់
ជា៤០០តោន ដោយករណីគ្រោះអគ្គីភ័យនេះបានកេីតមានឡើងកាលពីវេលាម៉ោង ១២:៤០នាទី ថ្ងៃទី២៧ ខែកុម្ភៈ ឆ្នាំ២០២១ ខណៈអ្នកយាមឃ្លាំង បានបិទទ្វារចាក់សោ ទៅហូបបាយថ្ងៃត្រង់ ។
ក្នុងកិច្ចប្រតិបត្តិការករណីគ្រោះអគ្គីភ័យនេះ ត្រូវបានដឹកនាំបញ្ជាផ្ទាល់ពីសំណាក់ ឯកឧត្តម អ៊ុន ចាន់ដា អភិបាលខេត្តកំពង់ចាម លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម ដោយមានការចូលរួមពី លោកអភិបាលស្រុកកំពង់សៀម កម្លាំងជំនាញផែនបង្ការ និងពន្លត់អគ្គីភ័យ ដែលដឹកនាំដោយស្នងការរងទទួលផែន កម្លាំងអន្តរាគមន៍ខេត្ត ដឹកនាំដោយស្នងការរងទទួលបន្ទុក កម្លាំងប្រចាំបញ្ជាដឹកនាំស្នងការរងដឹកនាំវេនប្រចាំបញ្ជា កម្លាំងចរាចរណ៍ខេត្ត-ស្រុក
និងកម្លាំងអគ្គីភ័យ បណ្ដាស្រុកទាំង៧ កម្លាំងកងរាជអាវុធហត្ថ កម្លាំងសឹករងស្រុក កម្លាំងប៉ុស្ដិ៍ និងកម្លាំងប្រជាការពារសរុបប្រមាណជា១៥០នាក់ ដោយប្រើប្រាស់អស់ទឹកចំនួន ៩៩ស៊ឺទែន ស្មើនឹង៤៩៥ម៉ែត្រគូប និងត្រូវចំណាយអស់រយៈពេលជាង ៦ម៉ោង ទើបសមត្ថកិច្ចអាចគ្រប់គ្រងស្ថានការណ៍បាន ដោយគិតចាប់ពីម៉ោងកើតហេតុ រហូតដល់ម៉ោង១៩:២០នាទីយប់ ទើបអគ្គីភ័យរលត់ទាំងស្រុង ដោយខូចខាតឡេវ៉ាល់ទ័រ ១គ្រឿង ឃ្លាំងមានទំហំ៣០x៤០ម៉ែត្រ កម្ពស់ ៦ម៉ែត្រ និងកំទេចសាច់ក្រណាត់ទំងន់ ៤០០តោន គិតជាទឹកប្រាក់ ជាង២០ម៉ឺនដុល្លារអាមេរិក និងសម្ភារមួយចំនួនទៀត តែពុំមានការប៉ះពាល់ដល់អាយុជីវិតមនុស្សសត្វនោះឡើយ ។
ក្នុងករណីគ្រោះអគ្គីភ័យនេះដែរ លោកឧត្តមសេនីយ៍ទោ ឯម កុសល ស្នងការនគរបាលខេត្ត បានដាក់បទបញ្ជាឲ្យចេញរថយន្តពន្លត់អគ្គីភ័យចំនួន១១គ្រឿង មានរថយន្តពន្លត់អគ្គីភ័យខេត្ត ៣គ្រឿង, កំពង់សៀម ១គ្រឿង, ព្រៃឈរ ២គ្រឿង, បាធាយ ១គ្រឿង, ជើងព្រៃ ១គ្រឿង, កងមាស ១គ្រឿង , ស្ទឹងត្រង់ ១គ្រឿង និងចំការលើ ១គ្រឿង ដឹកនាំដោយលោក ឧត្ដមសេនីយ៍ត្រី មិន សុគន្ធវិបុល ស្នងការរងទទួលផែនអគ្គីភ័យ និងអាវុធជាតិផ្ទុះ ចេញអន្តរាគមន៍ជាបន្ទាន់ ផងដែរ ៕
