សៀមរាប នាព្រឹកថ្ងៃទី០៤ខែ សីហា ឆ្នាំ២០១៤នៅរដ្ឋបាលសាលាខេត្តសៀមរាប មានធ្វើការប្រជុំផ្សព្វផ្សាយលិខិតលេខ ១០៤៤សជណចុះថ្ងៃទី ២២ ខែ កក្កដា ឆ្នាំ២០១៤ របស់ទីស្តីការគណៈរដ្ឋមន្ត្រី អំពីលទ្ធផលនៃកិច្ចប្រជុំស្តីពីបញ្ហាតំបន់ ៣ជុំវិញបឹងទន្លេសាបក្នុងភូមិសាស្ត្រខេត្តកំពង់ធំក្រោមការដឹកនាំប្រជុំរបស់ លោកប៉ោទ្រីអនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្មនិងជនលោកឃឹម ប៊ុនសុងអភិបាលនៃគណៈអភិបាលខេត្តសៀមរាប ដោយមាន ការអញ្ជើញចូលរួមពីសំណាក់លោក លោកស្រី ក្រុមការងារថ្នាក់ជាតិចុះមូលដ្ឋានខេត្តព្រមទាំងក្រុមប្រឹក្សាខេត្តអគ្គនាយកដ្ឋាននិងអស់លោក លោកស្រីជាថ្នាក់ដឹកនាំមន្ទីរអង្គភាពជុំវិញខេត្ត មន្ត្រីរដ្ឋបាលជលផល និងរដ្ឋបាលព្រៃឈើ សមត្ថកិច្ច អាជ្ញាធរ ក្រុមប្រឹក្សាក្រុងស្រុក មេឃុំ ចៅសង្កាត់មានភូមិសាស្ត្រជាប់បឹងទន្លេសាប ។ 
ក្នុងកិច្ចស្វាគមន៍របស់លោក. ឃឹម ប៊ុនសុងបានឲ្យដឹងអំពីលទ្ធផលដែលអាជ្ញាធរនិង អង្គភាពជំនាញអនុវត្តបាន កន្លងមក តាមបទបញ្ជាលេខ ០១បប របស់រាជរដ្ឋាភិបាលកម្ពុជា និងលិខិតបទដ្ឋានផ្សេងៗ និង អនុក្រិត្យលេខ ១៩៧ អនក្រក.បក ស្តីពីការកំណត់ដែនព្រៃលិចទឹកចំនួន៦៤៧ពាន់៤០៦ហិកតា នៅក្នុងខេត្តទាំង៦ ជុំវិញបឹងទន្លេសាប ក្នុង នោះក៏មានខេត្តសៀមរាបផងដែរ។
ឯកឧត្តមបានបន្តទៀតថា ការផ្សព្វផ្សាយលិខិតលេខ ១០៤៤ស.ជ.ណជូនដល់ អាជ្ញាធរថ្នាក់ខេត្ត មន្ទីរ អង្គភាពពាក់ព័ន្ធសម្ខាន់អាជ្ញាធរមូលដ្ឋាន ឲ្យបានយល់ដឹងបន្ថែមពីខ្លឹមសារ និង គោលការណ៍ របស់រាជរដ្ឋាភិបាលក្នុងគោលបំណងដើម្បីធានានូវនិរន្តរភាព បរិស្ថានធម្មជាតិនិង ប្រព័ន្ធជីវៈចម្រុះនៃបឹងទន្លេសាប និង តំបន់ពាក់ព័ន្ធ ដែលរងការរំលោភយ៉ាងធ្ងន់ធ្ងរដល់ព្រៃលិចទឹកនិង មានផលប៉ះពាល់ជាអវិជ្ជមាន
ដល់លំនឹងធម្មជាតិ ជម្រកមច្ឆាជាតិ របបជលសាស្ត្រជាដើម ។លោកឃឹម ប៊ុនសុងបានគូសបញ្ជាក់ថា ខេត្តសៀមរាប មានក្រុង ស្រុក ៦ ជាប់បឹងទន្លេសាបក្នុងចំណោមក្រុងស្រុកទាំង១២ហើយត្រូវបានអាជ្ញាធរទន្លេសាបនិង ក្រុមការងារគណៈកម្មការថ្នាក់ខេត្ត បានពិនិត្យ កំណត់ទីតាំងតំបន់អភិរក្សព្រៃលិចទឹក(តំបន់៣ និង បោះបង្គោលកំណត់ទីតាំងតំបន់អភិរក្សព្រៃលិចទឹក បានចំនួន ៧៧ដើម ព្រមទាំងបានរំលាយអាង ចំនួន១០ នៅស្រុក២ មានផ្ទៃ ក្រឡាប្រមាណ៥៨៨,១ហិកតានិង ធ្វើការ ឃ្វៀលដីជូនប្រជាជនសរុប ៨ពាន់៦៨៦ហិកតា ។
មានប្រសាសន៍បើកកិច្ចប្រជុំនោះលោក.ប៉ោទ្រីក៏បានគូសបញ្ជាក់ថាកិច្ចប្រជុំផ្សព្វផ្សាយនេះ គឺជាក្តាប់នូវរាល់បញ្ហាដែលមានកើតឡើងនៅតាមបណ្តាឃុំ សង្កាត់ ក្រុង ស្រុក ជាប់បឹងទន្លេសាប ក្នុងតំបន់៣ របស់អាជ្ញាធរទន្លេសាបដើម្បីលើកនូវមតិយោបស់ឲ្យបានចំគោលដៅដែលមូលដ្ឋានជួបប្រទះ ដើម្បីក្តាប់ឲ្យបាននូវអ្វីដែលត្រូវដោះស្រាយបាននៅក្នុងកិច្ចប្រជុំ ហើយចំណុចបញ្ហាអ្វីដែលដោះស្រាយពុំបាន នឹង ដាក់ជូនទៅរាជរដ្ឋាភិបាលពិនិត្យនិង សម្រេច ។
បន្ទាប់ពីសេចក្តីរាយការណ៍របស់អាជ្ញាធរក្រុងស្រុកទាំង៦ និង ឃុំជាប់បឹងទន្លសាបរួចមក បណ្តាក្រសួង មន្ទីរ ជំនាញពាក់ព័ន្ធ បានធ្វើការពិភាក្សាយ៉ាងផុលផុសដោយផ្តោតទៅលើការកំណត់ឲ្យបានច្បាស់លាស់ នៅទីតាំងដីដែល បានឃ្វៀលជូនប្រជាជនរួចព្រមទាំងប្រធានបទមួយចំនួនដែលពាក់ព័ន្ធទៅនឹងការកាន់កាប់ដីធ្លីនៅក្នុងតំបន់៣របស់បង ប្អូនប្រជាជនរស់នៅក្នុងតំបន់៣ជុំវិញបឹងទន្លេសាបនៅខេត្តសៀមរាប ក្នុងគោលដៅអភិរក្សនូវធនធានមច្ឆាជាតិសត្វស្លាប នៅបឹងទន្លេសាប។
ក្នុងនោះកិច្ចប្រជុំបានផ្តោតអារម្មណ៍យ៉ាងខ្លាំង ចំពោះបញ្ហាជនឆ្លៀតឱកាសដែលបានលបលួចកាប់ទន្ទ្រានព្រៃលិចទឹកធ្វើជាកម្មសិទ្ធផ្ទាល់ខ្លួន ដែលបានរំលោភនៅក្នុងដីតំបន់៣ព្រមទាំងសុំទៅរាជរដ្ឋាភិបាលធ្វើការឃ្វៀលដីជូនសម្រាប់បង្កបង្កើនផល ហើយដីមួយចំនួនក៏មានក្រុមឈ្មួញនៅពីខាងក្រោយទៀតផង។ ក្នុងកិច្ចពិភាក្សានោះ ក៏បានលើនូវវិធានការមួយចំនួន ដើម្បីជាការកាត់បន្ថយប្រជាពលរដ្ឋនៅក្នុងតំបន់៣ក្នុងគោលដៅធ្វើការអភិរក្សនូវធនធានធម្មជាតិ ជីវៈចម្រុះនៅបឹងទន្លេសាប និង ពូជមច្ឆាជាតិសត្វស្លាប ក្នុងការបម្រើដល់វិស័យទេសចរណ៍ទៀតផង ។
មានមតិបូកសរុបនោះលោក ប៉ោ ទ្រីក៏បានធ្វើការឯកភាពទៅលើវិធានការនៃកិច្ចពិភាក្សាបានលើកឡើង នូវចំណុចល្អៗដើម្បីជាទុនក្នុងការការពារព្រៃលិចទឹកតំបន់៣។ ម្យ៉ាងទៀតការកាត់ឃ្វៀលដីនៅតំបន់៣ធ្វើយ៉ាងណាឲ្យចំគោលដៅរបស់ប្រជាជន ក្នុងការទទួលបានផលពីទីនោះហើយព្រៃលិចទឹកគឺជាដង្ហើមរបស់វិស័យជលផល ។ បញ្ហាទាំងនេះក៏ ពាក់ព័ន្ធផងដែរ ទៅនឹងរដ្ឋបាលព្រៃឈើ និង រដ្ឋបាលជលផល។
លោកប៉ោ ទ្រីក៏បានសង្កត់ធ្ងន់ផងដែរ ចំពោះអាជ្ញាធរ មូលដ្ឋានក្រុង ស្រុកឃុំសង្កាត់សមត្ថកិច្ចប្រដាប់អាវុធសមត្ថកិច្ចជលផលត្រូវធ្វើការពិនិត្យបង្គោលកំណត់ព្រំ តាមតំបន់និមួយៗឲ្យបានត្រឹមត្រូវទៅតាមការកំណត់របស់អាជ្ញាធរបឹងទន្លេសាប ដើម្បីការពារកុំឲ្យមានការកាប់ទន្ទ្រានបន្តនូវព្រៃលិចទឹកដែលជាជម្រកត្រីពងកូននៅរដូវទឹកឡើង។ ឯកឧត្តមក៏លើកនូវគោលការណ៍មួយចំនួនលើការអប់រំផ្សព្វផ្សាយដល់ប្រជាជននិង បន្តការគ្រប់គ្រងឲ្យបានច្បាស់ពីប្រជាជនគ្មានដីធ្លីបង្កបង្កើនផលនិងត្រូវធ្វើការផ្សព្វផ្សាយបន្តនូវលិខិត លេខ១០៤៤សជណជូនប្រជាជន
រស់នៅក្នុងតំបន់៣ ព្រមទាំងធ្វើការអប់រំពួកគាត់នៅពេលប្រព្រឹត្តបទល្មើសឲ្យបានពីរទៅបីដងមុនចាប់បញ្ជូនទៅតុលាការនិង ត្រូវធ្វើការសហការជាមួយសមត្ថកិច្ច មន្ទីរជំនាញ ក្នុងការធ្វើប្រព័ន្ធស្រោចស្រពនៅក្នុងតំបន់៣ ព្រមទាំងធ្វើការអប់រំ អំពីបច្ចេកទេសក្នុងការប្រើប្រាស់ជី កសិកម្ម ដើម្បីជៀសវាងកុំឲ្យមានផលប៉ះពាល់ដល់ធនធានធម្មជាតិ ពូជមច្ឆាជាតិ និង បរិស្ថាននៅបឹងទន្លេសាប ដែលសម្បូរទៅដោយជីវៈចម្រុះក្នុងការផ្គត់ផ្គង់ដល់ការ រស់នៅរបស់ប្រជាជនទៅថ្ងៃអនាគត ៕
