ខេត្តប៉ៃលិន ៖ បុរសម្នាក់ ជាមន្ត្រីសមត្ថកិច្ចនៃស្នងការដ្ឋាននគរបាលខេត្តបាត់ដំបង បានប្រើរថយន្តទំនើបម៉ាកកាមរីបាឡែន រកស៊ីដឹកឈើគ្រញូងខុសច្បាប់ ត្រូវសមត្ថកិច្ចក្រុមអភិរក្សសត្វព្រៃ (MJP) ប្រចាំការសំឡូត-ប៉ៃលិន ធ្វើការចាប់ឃាត់ខ្លួន ខណៈពេលដែលបុរសម្នាក់នេះបម្រុងបើករថយន្តរត់គេច ។ 
ហេតុការណ៍នេះបានកើតឡើងកាលពីវេលាម៉ោង៣និង៤០នាទី រសៀលថ្ងៃទី០៣ ខែសីហា ឆ្នាំ២០១៤ សិ្ថតក្នុងភូមិភ្នំដំបង សង្កាត់ អូរតាវ៉ៅ ក្រុងប៉ៃលិន ខេត្តប៉ៃលិន។ ជនសង្ស័យដែលក្រុមមន្ត្រីអភិរក្សចាប់ឃាត់ខ្លួន ឈ្មោះ សូ ផល្លា ភេទប្រុស អាយុជាង៤០ឆ្នាំ ជាមន្ត្រីស្នងការដ្ឋាននគរបាល ខេត្តបាត់ដំបង មានស្រុកកំណើតនៅភូមិបវេល ឃុំបវេល ស្រុកបវេល ខេត្តបាត់ដំបង ។ 
បច្ចុប្បន្នស្នាក់នៅក្នុង ក្រុងបាត់ដំបង រឹបអូសបានឈើប្រណីតប្រភេទគ្រញូងចំនួន៨ដុំ ស្មើនឹង១៧៧គីឡូក្រាម ដោយបើកបររថយន្តម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ 2D-0780 បែកកង់មុខ និងកង់ក្រោយផ្នែកខាងឆ្វេង ។ បើតាមការឲ្យដឹងពីលោកចាន់ សុជាតិ អនុប្រធានផ្នែកប្រតិបត្តិនៃមូលនិធិម៉ា ដក្សចូលីភីត(MJP) បានរៀបរាប់ថា៖ ក្រោយពីទទូលបានព័ត៌មានថា មានរថយន្តមួយគ្រឿងម៉ាកកាមរីបាឡែន ពណ៌ស្ករ ពាក់ស្លាក់លេខភ្នំពេញ 2D-0780 ក្នុងការសង្ស័យដឹកឈើខុសច្បាប់ ទើបខាងលោកចាត់ឲ្យមន្ត្រីចម្រុះ មានសមត្ថកិច្ចកងរាជអាវុធហត្ថ មន្ត្រីបរិស្ថាន មានគ្នាចំនួន៦នាក់ បើករថយន្តចំនួនពីរគ្រឿងដេញតាម ។ 
លោកបន្តថា៖ គ្រាន់តែឃើញរថយន្តខាងលោកដេញតាម រថយន្តសង្ស័យខំបើកយ៉ាងលឿនក្នុងទិសដៅពីត្បូង ទៅជើង គ្រានោះក៏មានមន្ត្រីរបស់លោកមួយចំនូន បានស្ទាក់រថយន្តកាមរីបាឡែនខាងលើឲ្យឈប់ ប៉ុន្តែមិនឈប់ ក៏មានគម្រោងបោះចំរូងដែកគោលលើបន្ទះក្តារ ទើបបណ្តាលឱ្យបែកកង់ផ្នែកខាងឆ្វេងទាំងពីរ ។ តែទោះបី ជារថយន្តមួយគ្រឿងនេះត្រូវចំរូង បណ្តាលឱ្យបែកកង់ក៏ដោយ ក៏រថយន្តសង្ស័យខាងលើ នៅតែបន្តបើករត់គេច , លុះរថយន្តសមត្ថ កិច្ចបន្តដេញតាមទាន់ ត្រូវបុរសរូបនេះបើករថយន្តកៀរស្ទើរតែធ្លាក់ទៅក្នុងស្នាមភ្លោះ រងរបួសថែមទៀតផង ។
ប្រភពបន្តទៀតថា៖ ពេលនោះរថយន្តបើករត់ទាំងកង់បែកបានប្រហែល៣ទៅ៤គីឡូម៉ែត្រ ក៏ត្រូវឃាត់ខ្លួនបានតែម្តង ។ ក្នុងការឃាត់ខ្លួនដែរ សមត្ថកិច្ចក្រុមអភិរក្សសត្វព្រៃ (MJP) ប្រចាំការសំឡូត-ប៉ៃលិន បានរកឃើញឈើប្រណីត ប្រភេទគ្រញូងចំនួន៨ដុំ ស្មើនឹង១៧៧គីឡូក្រាម ព្រមទាំងឃាត់ខ្លួនបុរសម្នាក់ឈ្មោះ សូ ផល្លា អាយុជាង៤០ឆ្នាំ ជាមន្ត្រីស្នងការដ្ឋាននគរបាល ខេត្តបាត់ដំបង ។ទាក់ទិនទៅនឹងបញ្ហានេះដែរ ខាងលោកនឹងរៀបចំកសាងសំនុំ រឿងបញ្ជូនខ្លួនជនសង្ស័យ និងវត្ថុតាងខាងលើ ទៅអយ្យការអមសាលាដំបូងខេត្តប៉ៃលិន ដើម្បីចាត់ការ
ទៅតាមនីតិវិធី ។ សូមបញ្ជាក់ថា កាលពីឆ្នាំ២០១១កន្លងទៅមានមន្ត្រីបរិស្ថានម្នាក់ ឈ្មោះ សំបូរ អាយុជាង៤០ឆ្នាំ បានឈរស្ទាក់រថយន្តជនល្មើសនៅពេលយប់ ក៏ត្រូវគេបើករថយន្តបុកស្លាប់ចោលកូនប្រពន្ធ ខណៈបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ។ ដូច្នោះនៅចំណុចខាងលើជាកន្លែងដែលក្រុមឈ្មួញរកស៊ីដឹកឈើគ្រញូងលួចលាក់ យ៉ាងក្តៅគគុក ជាយូរថ្ងៃ ខែ ឆ្នាំផងដែរ ៕
