ក្លិបហង្សក្រហម Liverpool ត្រូវបានគេរាយការណ៍ថា បានឈានដល់កិច្ចព្រមព្រៀងលើការនាំយកខ្សែការពារឆ្វេង Alberto Moreno ពីក្លិប Sevilla រួចរាល់ហើយដែលមានតម្លៃពលកម្មប្រមាណ១៦លានផោន ។
Liverpool បានតាមធ្វើការទាក់ទងកីឡាករសញ្ជាតិអេស្ប៉ាញរូបនេះជាយូរណាស់មកហើយ ប៉ុន្តែក្លិប Sevilla ធ្លាប់បានបដិសេធមិនព្រមលក់ខ្សែការពាររូបនេះដោយចង់ឲ្យ Liverpool ផ្តល់តម្លៃខ្លួនដល់រូបគេចំនួន២០លានផោន ។
ទោះបីជាយ៉ាងណាក៏ដោយ គេហទំព័រ Daily Mail បានអះអាងថា នៅពេលនេះ Sevilla បានយល់ព្រមលក់ Moreno ទៅឲ្យ Liverpool ហើយដែលកីឡាកររូបនេះនឹងធ្វើដំណើរទៅកាន់ទឹកដី Anfield នៃប្រទេសអង់គ្លេស នៅថ្ងៃអង្គារនេះ ។
គួរបញ្ជាក់ថា Liverpool ទើបតែបាត់បង់ពានរង្វាន់ International Champions Cup បន្ទាប់ពីពួកគេប្រកួតចាញ់ Manchester United ៣-១ នៅវគ្គផ្តាច់ព្រ័ត្រ ៕
