ក្រុមសាខាស្រុកកណ្តាលស្ទឹង យកឈ្នះក្រុមសាខាស្រុកស្អាងដោយលទ្ឋផល៥ទល់នឹង៣ ក្នុងការប្រកួតបាល់ទាត់ក្របខណ្ឌធនាគារអេស៊ីលីដា លើទីលានដំរីស ស្ថិតក្នុងមជ្ឍមណ្ឌលគរុកោសល្យភូមិភាគរាជធានីភ្នំពេញអូរបែកក្អម នាព្រឹកថ្ងៃទី៩ ខែសីហា ឆ្នាំ២០១៤ ។ ក្រុមទាំង២នេះមានប្រៀបនិងកំលាំងបច្ចេកទេសលេងមិនចាញ់គ្នាប៉ុន្មានទេ ទាំងការគ្រប់គ្រងក៏ដូចជាបញ្ចូនគ្រាប់បាល់ឈានទៅរកទីគូប្រកួតរៀងខ្លួន ប៉ុន្តែក្រុមសាខាស្រុកកណ្តាលស្ទឹង មានសំណាងជាងដោយក្នុងតង់ទី១គេអាចរកគ្រាប់បាល់បាននាំមុខបណ្តោះអាសន្ន២ទល់នឹង១ ។ ពេលចូលដល់តង់ទី២ក្រុមសាខាស្រុកស្អាង វាយបកសងវិញចំនួន២គ្រាប់ ខណះគូប្រកួតរកបាន៣គ្រាប់បន្ថែមដែរ ។
៥គ្រាប់ក្រុមសាខាស្រុកកណ្តាលស្ទឹង កីឡាករសូ សុខុម ២គ្រាប់ ទីវ សុខា ចាន់ ចនប៉ុណ្ណៈ កូវ សិលា ម្នាក់១គ្រាប់ រីឯ៣គ្រាប់ក្រុមសាខាស្រុកកណ្តាលស្ទឹង កីឡាករអ៊ុច សត្យា២គ្រាប់ និងអ៊ុំ រតនៈ ១គ្រាប់ ។ ជារៀងរាល់ចុងសប្តាហ៍ក្រុមបាល់ទាត់ធនាគារអេស៊ីលីដាស្ទើរគ្រប់សាខាទាំងអស់ តែងតែបានធ្វើការប្រកួតគ្នាជាប្រចាំក្រោយសំរាកពីការងារដើម្បីជាការជំរះនូវទុក្ខកង្វល់ និងភាពស្មុគស្មាញ ហើយអ្វីដែលពិសេសជាងនេះទៅទៀតនោះ គឺជាការរឹតចំណងមិត្តភាពសាមគ្គីភាព រវាងកីឡាករដែលជាបុគ្គលិកធនាគារអេស៊ីលីដា នៅតាមបណ្តាសាខានីមួយៗ 
ឱ្យកាន់តែជិតស្និតបន្ថែមទៀត ពីព្រោះកីឡាមិនត្រឹមតែធ្វើឱ្យយើងមានសុខភាពល្អតែប៉ុណ្ណោះទេ គឺថែមទាំងធ្វើឱ្យយើងមានការរាប់អានគ្នាកាន់តែស្និតស្នាលជាមួយផងដែរ ។គួររំលឹកផងដែរថា បច្ចុប្បន្នកីឡាបាល់ទាត់នៅក្នុងព្រះរាជាណាចក្រកម្ពុជា កំពុងតែមានការរីកចំរើន និងទទួលបានការគាំទ្រពីសំណាក់យុវជន មហាជនពីគ្រប់មជ្ឍដ្ឋាន នេះដោយមានការយកចិត្តទុកដាក់ខ្ពស់ពីសំណាក់ប្រមុខរាជរដ្ឋាភិបាលកម្ពុជា ទើបធ្វើឱ្យវិស័យកីឡាបាល់ទាត់ មានការអភិវឌ្ឍន៍រីកចម្រើនជាបន្តបន្ទាប់ ៕ 
