កណ្តាល ៖ ជនសង្ស័យម្នាក់ត្រូវបានកម្លាំងសមត្ថកិច្ចប៉ូលិសស្រុកអង្គស្នួល ខេត្តកណ្តាលឃាត់ខ្លួនបាននៅវេលាម៉ោង៤ និង១០នាទី ល្ងាចថ្ងៃទី១៣ ខែសីហា ឆ្នាំ២០១៤ ពាក់ព័ន្ធករណីចែកចាយគ្រឿងញៀនខុសច្បាប់ ។ សកម្មភាពឃាត់ខ្លួនជនសង្ស័យនេះនៅចំណុចផ្ទះជួលស្ថិតក្នុងភូមិមនោរម្យ ឃុំបែកចាន ស្រុកអង្គស្នួល ដកហូតបានថ្នាំញៀន៧កញ្ចប់តូច និងឧបករណ៍ប្រើប្រាស់គ្រឿងញៀនបានមួយចំនួនទៀត ។
លោក មាស សំណាង អធិការស្រុកអង្គស្នួលបានប្រាប់ឲ្យដឹងថាជនសង្ស័យដែលឃាត់ខ្លួនបានឈ្មោះ សំណាង បញ្ញា ភេទប្រុស អាយុ៣០ឆ្នាំ មុខរបរកម្មករឡានដឹកអុស រស់នៅភូមិចំបក់កោង ឃុំទួលព្រិច ស្រុកអង្គស្នួល ខេត្តកណ្តាល ។ លោកអធិការបានបញ្ជាក់ទៀតថា ជនសង្ស័យ និងវត្ថុតាងគ្រឿងញៀន សមត្ថកិច្ចព្រហ្មទណ្ឌស្រុកបានកសាងសំណុំរឿងបញ្ចូនទៅតុលាការខេត្តកណ្តាល ដើម្បីចាត់ការតាមនិតិវិធីច្បាប់ ៕ 
