ខេត្តស្ទឹងត្រែង៖ អភិបាលខេត្តស្ទឹងត្រែង លោក ស្វាយ សំអ៊ាង នៅថ្ងៃទី១៣ធ្នូឆ្នាំ២០២១ បានដឹកនាំមន្ត្រីជំនាញសូរិយោដី អាជ្ញាធរមូលដ្ឋាន និងមន្ត្រីជំនាញពាក់ព័ន្ធ អញ្ជើញចុះបិទផ្សាយជាសាធារណៈនូវឯកសារ នៃការវិនិច្ឆ័យបញ្ជីដីធ្លីមានលក្ខណៈជាប្រព័ន្ធ ចំនួន ៧០៣ ក្បាលដី នៅក្នុងភូមិស្រែស្រណុក ឃុំក្បាលរមាស ស្រុកសេសាន។ នៅក្នុងពិធីនោះទៀត ក៏មានការចូលរួមពីកងកម្លាំងទាំង៣ និងប្រជាពលរដ្ឋក្នុងមូលដ្ឋាន ប្រមាណ ២០០នាក់ ផងដែរ។
ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តស្ទឹងត្រែង លោក ម៉ិញ ស៊ីចាយ បានឲ្យដឹងថា ក្បាលដីចំនួន ៧០៣ក្បាលដី ត្រូវបានបិទផ្សាយជាសាធារណៈ រីឯការបិទផ្សាយនេះ គឺមានរយៈពេល ១៥ថ្ងៃ ចាប់ពីថ្ងៃទី១៣ធ្នូ ដល់ថ្ងៃទី២៧ធ្នូឆ្នាំ២០២១ សម្រាប់ទុកឱកាសឲ្យម្ចាស់ក្បាលដីពិនិត្យ ផ្ទៀងផ្ទាត់ទិន្នន័យរបស់ខ្លួន មុននឹងចេញប័ណ្ណកម្មសិទ្ធិជូនពួកគាត់ និងជៀសវាងកុំឲ្យមានកំហុសឆ្គងទិន្នន័យ ដែលអាចធ្វើឲ្យមានផលលំបាកនៅថ្ងៃក្រោយ ព្រោះការចេញបណ្ណ័កម្មសិទ្ធិនេះ មិនងាយស្រួលក្នុងការកែប្រែទិន្នន័យ នោះឡើយ។
អភិបាលខេត្តស្ទឹងត្រែង លោក ស្វាយ សំអ៊ាង មានប្រសាសន៍ថា ការចុះបញ្ជីដីមានលក្ខណៈជាប្រព័ន្ធ គឺដើម្បីទទួលបានប័ណ្ណកម្មសិទ្ធិដីធ្លី ដែលជាឯកសាររដ្ឋបាល បញ្ជាក់ពីសិទ្ធិជាម្ចាស់លើក្បាលដីនីមួយៗ ហើយប្រជាពលរដ្ឋដែលទទួលបានប័ណ្ណកម្មសិទ្ធិ គឺជាម្ចាស់ដីពេញលក្ខណៈ និងត្រូវបានការពារដោយច្បាប់។ លោកថា ពលរដ្ឋដែលជាម្ចាស់ដី មានសិទ្ធិប្រើប្រាស់ អាស្រ័យផល និងចាត់ចែងដីរបស់ខ្លួនផ្តាច់មុខ និងទូលំទូលាយ កុំឲ្យតែយកដីនោះទៅប្រើប្រាស់ក្នុងបទណាមួយ ដែលច្បាប់បានហាមឃាត់។ ដូច្នេះ សូមបងប្អូន កូនក្មួយទាំងអស់ ត្រូវបន្តធ្វើអាជីវកម្ម ការបង្កបង្កើនផល និងអាស្រ័យផលលើដីនេះ ដើម្បីទទួលបានផលដែលកើតចេញពីដី ដែលជាកម្មសិទ្ធិស្របច្បាប់ ប្រសើរជាងការលក់ដី ដែលអាចទទួលបានផលតែម្តង ហើយក៏ត្រូវបាត់បង់ផលនោះ ជារៀងរហូត។
ស្របពេលជាមួយជាគ្នានោះ លោក ស្វាយ សំអ៊ាង បានអញ្ជើញចែកអាវរងារ ៥០អាវ ជូនប្រជាពលរដ្ឋដែលមានវ័យចំណាស់ ៥០នាក់ ទុកសម្រាប់ពាក់ពេលអាកាសធាតុចុះត្រជាក់ខ្លាំង។ បន្ទាប់ លោកអភិបាលខេត្ត ក៏បានចុះពិនិត្យការចាក់វ៉ាក់សាំង របស់ក្រុមគ្រូពេទ្យ ជូនប្រជាពលរដ្ឋ នៅមណ្ឌលសុខភាពក្បាលរមាស និងបានឧបត្ថម្ភថវិកា ៣០០ដុល្លារ ជូនដល់ក្រុមគ្រូពេទ្យ ដែលជាថវិកាផ្ទាល់ខ្លួនរបស់ លោកអភិបាលខេត្ត ទុក្ខសម្រាប់ប្រើប្រាស់នៅក្នុងតម្រូវការចាំបាច់៕ ដោយ៖ឡុង សំបូរ
