គ្រូបង្វឹកក្រុមសាំបាប្រេស៊ីលលោក Dunga (ឌុងហ្គា) បានសម្រេចចិត្តកោះហៅអតីតខ្សែប្រយុទ្ធរបស់ក្លិប មេឃខៀវ Manchester City កីឡាករ Robinho (រ៉ូប៊ីនញ៉ូ) ឲ្យជាប់ជាជម្រើសជាតិជាថ្មីម្តងទៀត ។ Robinho នឹងត្រូវមកជំនួសតំណែងរបស់កីឡាករ Hulk (ហ៊ូក) ដែលកំពុងមានរបួសនៅពេលដែលក្រុមប្រេស៊ីលនឹងត្រូវធ្វើការប្រកួតមិត្តភាពចំនួន២លើកនៅខែក្រោយ បន្ទាប់ពីប្រទេសនេះទើបតែរៀបចំធ្វើជាម្ចាស់ផ្ទះការប្រកួតបាល់ទាត់ពានរង្វាន់ពិភពលោករដូវក្តៅរួចមក។
លោក Dunga នឹងត្រូវដឹកនាំប្រេស៊ីលប្រកួតមិត្តភាពជាមួយប្រទេសកូឡុំប៊ី និងអេក្វាដ័រនៅខែក្រោយក្នុងគោលបំណងស្តារមុខមាត់ប្រេស៊ីលឡើងវិញ បន្ទាប់ពីពួកគេប្រកួតចាញ់អាល្លឺម៉ង់យ៉ាងអាម៉ាស់៧-១ក្នុងការប្រកួត នៅទីក្រុងបេឡូហូរី ហ្សង់តេ ។ គួរបញ្ជាក់ថា នេះជាលើកដំបូងរបស់ Robinho ដែលបានចូលលេងឲ្យក្រុមប្រេស៊ីលក្រោយពេលរូបគេ បានខកខានចាប់តាំងពីចុងឆ្នាំ២០១៣មក ៕
