វិលទៅកាន់ Olympiacos វិញ ខ្សែប្រយុទ្ធក្លិប Fulham កីឡាករ Konstantinos Mitroglou បានយល់ព្រមផ្លាស់ទៅកាន់ក្លិប Olympiacos ក្នុងលក្ខណៈខ្ចីជើងរយៈពេលយូរ ។ ខ្សែប្រយុទ្ធវ័យ២៦ឆ្នាំដែលបានផ្លាស់មកកាន់ Fulham កាលពីខែមករាក្នុងតម្លៃពលកម្ម១១លានផោនរូបនេះ បានសម្រេចចិត្តវិលត្រឡប់ផ្លាស់ទៅកាន់ក្លិបចាស់របស់ខ្លួនវិញក្រោយពេលរូបគេជួបប្រទះនឹងបញ្ហារបួសរ៉ាំរ៉ៃកាលដែលលេងនៅ Fulham ។ Mitroglou ចូលលេងបានតែ៣ប្រកួតប៉ុណ្ណោះឲ្យ Fulham ចាប់តាំងពីផ្ទេរមកកាន់ក្លិបនេះហើយនៅរដូវកាល ថ្មីនេះរូបគេមិនទាន់បានបង្ហាញខ្លួនមួយប្រកួតណាឡើយ ។ គួរបញ្ជាក់ថា បច្ចុប្បន្ន Fulham កំពុងស្ថិតក្រោមការដឹកនាំរបស់គ្រូបង្វឹក Felix Magath ហើយក្លិបនេះកំពុង ឈរនៅលំដាប់ទី២៣ក្នុងតារាងក្របខណ្ឌអង់គ្លេស Championship ៕
