ក្រុមសាំបាអឺរ៉ុប ព័រទុយហ្គាល់ បានប្រកួតចាញ់ក្រុមហ្វូងឥន្ទ្រី អាល់បានី ក្នុងផ្ទះខ្លួនឯងទាំងអាម៉ាស់ក្នុងលទ្ធផល ១-០ សម្រាប់ការប្រកួតវគ្គជម្រុះពានរង្វាន់ទ្វីបអឺរ៉ុបនៅក្នុងពូល I ។ ក្រុមម្ចាស់ផ្ទះព័រទុយហ្គាល់ហាក់បីដូចជាពិបាកស្វែងរកទម្រង់លេងនៅពេលដែលអវត្តមានកីឡាករប្រធានក្រុមគឺ Cristiano Ronaldo ។
ក្រុមទាំងពីរមិនអាចបំបែកពងមាន់បានឡើយសម្រាប់ការប្រកួតនៅតង់ទី១ដោយរក្សាត្រឹមលទ្ធផល០-០ ។ លុះការប្រកួតចូលដល់តងទី២នៅនាទីទី៥២ ខ្សែប្រយុទ្ធ Bekim Balaj (បេកខីម បាឡាក) បានរកគ្រាប់បាល់ មួយគ្រាប់ឲ្យក្រុមភ្ញៀវអាល់បានីនាំមុខម្ចាស់ផ្ទះមុនក្នុងលទ្ធផល ១-០ ។
ទោះបីជាក្រុមម្ចាស់ផ្ទះខំប្រឹងវាយសម្រុកយ៉ាងខ្លាំងក៏ដោយក៏មិនអាចបំបែករនាំងការពាររបស់អាល់បានី បានឡើយ រហូតដល់ចប់ការប្រកួតព័រទុយហ្គាល់ចាញ់អាល់បានី១-០ ។ គួរបញ្ជាក់ថា ការប្រកួតមួយគូទៀតនៅក្នុងពូល I នេះ គឺម្ចាស់ផ្ទះដាណឺម៉ាកបានប្រកួតឈ្នះក្រុមអាបេនៀក្នុង លទ្ធផល២-១ដែល២គ្រាប់របស់ដាណឺម៉ាកគឺរកបានដោយកីឡាករ Pierre-Emil Hoejbjerg (ព្យ៉ែ អេមីល ហូស្បើក) និងកីឡាករ Thomas Kahlenberg (ថូម៉ាស ខាឡេនប៊ឺក) ចំណែក១គ្រាប់របស់អាបេនៀ គឺស៊ុតដោយកីឡាករ Henrik Mkhitaryan (ហេនរីក ឃីថារីយ៉ាន) ៕ដោយផន សុខជាតិ
