ក្រុមគោជល់អេស្ប៉ាញបានយកឈ្នះលើក្រុមតោក្រហមម៉ាសេដូនៀក្នុងលទ្ធផល៥-១សម្រាប់ការប្រកួត វគ្គជម្រុះពានរង្វាន់ទ្វីបអឺរ៉ុបឆ្នាំ២០១៦នៅក្នុងពូល C ។ ការប្រកួតនៅនាទីទី១៥ ខ្សែការពារ Sergio Ramos ស៊ុតបាល់ពិន័យ១១ម៉ែត្រមួយគ្រាប់ជួយឲ្យម្ចាស់ផ្ទះ អេស្ប៉ាញនាំមុខមុន១-០ ។ ក្រោយមកបានតែ២នាទីប៉ុណ្ណោះ ខ្សែប្រយុទ្ធ ហ្វ្រាន់ស៊ីស្កូ អាល់កាហ្ស័រ (Francisco Alcacer) ស៊ុតបានមួយគ្រាប់ទៀតឲ្យអេស្ប៉ាញ ។ ប៉ុន្តែមកដល់នាទីទី២៨ ក្រុមម៉ាសេដូនៀ មានឱកាសស៊ុតបាល់ប៉េណាល់ទីមួយគ្រាប់វិញដោយកីឡាករ អាជីម អ៊ីប្រាយមី (Agim Ibraimi) ប៉ុន្តែការប្រកួតរៀបនឹងបញ្ចប់តង់ទី១ទៅហើយនោះ ខ្សែបម្រើ
សឺជីអូ ប៊ូស្កេត (Sergio Busquets) ស៊ុតបានគ្រាប់ទី៣ឲ្យអេស្ប៉ាញ ។ លុះការប្រកួតចូលដល់តង់ទី២ អេស្ប៉ាញរកបាន២គ្រាប់ទៀតដោយកីឡាករ David Silva នៅនាទីទី៥០ និងកីឡាករ ប៉េត្រូ រ៉ូឌ្រីហ្គេស (Pedro Rodriguez) នៅនាទី៩០ ។ ចប់ការប្រកួតអេស្ប៉ាញឈ្នះម៉ាសេដូនៀក្នុងលទ្ធផល ៥-១ ។ គួរបញ្ជាក់ថា ការប្រកួតពីរគូទៀតក្នុងពូលCដំណាលគ្នានេះគឺ លុចហ្សាំបួរ ស្មើជាមួយ បេឡារូស ១-១ ចំណែក អ៊ុយក្រែន ចាញ់ ស្លូវ៉ាគី ១-០ ៕
