សម្រាប់ការប្រកួតជម្រុះយូរ៉ូជាមួយក្រុមអង់ដូរ៉ានៅយប់នេះ អ្នកចាត់ការក្រុមនាគភ្លើងវ៉េល លោក Chris Coleman បានលើកឡើងថា តារាបាល់ទាត់ Gareth Bale (ហ្គារ៉េត ប៊ែល) នឹងត្រូវលេងនៅមុខតំណែងខ្សែប្រយុទ្ធសម្រាប់ការប្រកួតជម្រុះយូរ៉ូឆ្នាំ២០១៦ក្នុងពូល B ជាមួយ ប្រទេស អង់ដូរ៉ា នៅយប់នេះ ។
ជាធម្មតា Bale មានតួរនាទីលេងនៅខ្សែបម្រើស្លាបស្តាំឲ្យក្លិបអធិរាជស Real Madrid ប៉ុន្តែរូបគេអាច មានលទ្ធភាពលេងនៅខ្សែប្រយុទ្ធជួរមុខឲ្យក្រុមរបស់លោក Coleman បានក្នុងការប្រកួតជាមួយអង់ដូរ៉ា ដោយប្រទេសវ៉េលសង្ឃឹមថានឹងឈ្នះ ។ លោក Coleman ប្រាប់ BBC Sport ថា “Bale លេងបានគ្រប់ទីកន្លែង ក្រុមរបស់យើងបានបាត់បង់កីឡាករ Sam Vokes (សេម វ៉ូក) ដោយសារតែបញ្ហារបួស ហើយយើងនឹងដាក់ ប៊ែល (Bale) ជាខ្សែប្រយុទ្ធជួរមុខ” ។
គួរបញ្ជាក់ថា ប៊ែល (Bale) បានចាប់ផ្តើមអាជីពបាល់ទាត់ជាមួយក្លិប Southampton ដោយលេងនៅតំណែងខ្សែការពារឆ្វេង ប៉ុន្តែនៅរដូវកាលនេះរូបគេនឹងលេងនៅខ្សែបម្រើកណ្តាលឲ្យ Real Madrid ក្រោយពេលកីឡាករ អេនជែល ឌី ម៉ារៀ (Angel Di Maria) បានផ្លាស់ទៅកាន់ Manchester United ៕ដោយផន សុខជាតិ
