ក្រុមបាល់ទាត់សាធារណរដ្ឋឆេកបានប្រកួតក្នុងផ្ទះរបស់ខ្លួនដោយបានយកឈ្នះលើក្រុមមច្ចុរាជពណ៌ទឹកក្រូច ហូឡង់ ក្នុងលទ្ធផល២-១សម្រាប់យុទ្ធនាការជម្រុះពានរង្វាន់ទ្វីបអឺរ៉ុបឆ្នាំ២០១៦នៅក្នុងពូលA ។ ការប្រកួតនៅនាទីទី២១ ក្រុមម្ចាស់ផ្ទះឆេកបានធ្វើការនាំមុខមុនដោយការស៊ុតយ៉ាងល្អពីសំណាក់កីឡាករ Borek Dockal (ប៊ូរេក ដុកកាល់) ។ លទ្ធផលនេះបានរក្សារហូតដល់ចប់តង់ទី១ ។ លុះការប្រកួតចូលដល់តង់ទី២បានតែ១០នាទីប៉ុណ្ណោះ ខ្សែការពារហូឡង់ Stefan de Vrij (ស្តេហ្វេន ដឺ វ្រីច) បានជួយឲ្យហូឡង់តាមបានស្មើវិញដោយការតែតបាល់បញ្ចូលទីដ៏ល្អ ។
ប៉ុន្តែការប្រកួតរៀបនឹងបញ្ចប់ទៅហើយ ម្ចាស់ផ្ទះឆេកអាចវាយបកយកឈ្នះវិញបានដោយការស៊ុតបំប៉ោង សំណាញ់ទីរបស់កីឡាករ Vaclav Pilar (វ៉ាក្លាវ ភីឡា) ចប់ការប្រកួតឆេកឈ្នះហូឡង់ក្នុងលទ្ធផល ២-១ ។ គួរបញ្ជាក់ថា ចំពោះការប្រកួត២គូផ្សេងទៀតនៅក្នុងពូលAនេះគឺ កាហ្សាក់ស្ថាន ស្មើជាមួយ ឡាតវៀ ០-០ និងអ៊ីស្លង់ ឈ្នះ ទួរគី ៣-០ ៕
