ខ្សែបម្រើក្លិបកាំភ្លើងធំ Arsenal កីឡាករ Aaron Ramsey (អារ៉ុន រ៉េមស៊ី) បាននិយាយថា រូបគេសង្ឃឹមថា នឹងអាចចូលលេងបានក្នុងជំនួបជាមួយក្លិបមេឃខៀវ Manchester City នៅចុងសប្តាហ៍នេះ បន្ទាប់ពីរូបគេ របួស.កជើង ខណៈពេលលេងឲ្យក្រុមជម្រើសជាតិវ៉េល Ramsey បានរងរបួសនេះកាលពីយប់ថ្ងៃអង្គារនៅពេលដែលក្រុមនាគភ្លើងវ៉េលប្រកួតឈ្នះអង់ដូរ៉ា២-១ ក្នុងការប្រកួតជម្រុះយូរ៉ូឆ្នាំ ២០១៦ ។
ទោះបីបច្ចុប្បន្ន Ramsey កំពុងមានក្តីព្រួយបារម្ភពីបញ្ហារបួសនេះក៏ដោយ ប៉ុន្តែរូបគេបានលើកឡើងថា គេនឹងអាចចូលលេងវិញក្នុងជំនួបជាមួយ Man City នៅទឹកដី Emirates Stadium (អេមីរ៉េត ស្តេឌៀម) នៅថ្ងៃសៅរ៍នេះ ។
កីឡាករវ័យ២៣ឆ្នាំរូបនេះប្រាប់ BBC Sport ថា “ខ្ញុំរំពឹងថា គ្រប់យ៉ាងនឹងមិនអីទេហើយខ្ញុំពិតជាចង់លេង ក្នុងការប្រកួតជាមួយក្រុមខ្លាំងនេះណាស់” ។ គួរបញ្ជាក់ថា បច្ចុប្បន្ន Arsenal កំពុងឈរនៅលំដាប់ទី៧ក្នុងតារាង Premier League បន្ទាប់ពីធ្វើការប្រកួត បានចំនួន៣លើក ៕ ដោយផន សុខជាតិ
