​Manchester United ​ឈ្នះ​លើកដំបូង​ក្រោយ​បំបាក់ Queen Park Rangers ​ក្នុង​លទ្ធផល​ ៤-០

​ក្លិប​បិសាច​ក្រហម​ Manchester United ​បាន​ស្គាល់​ពាក្យ​ថា​ឈ្នះ​ជា​លើកដំបូង​ចាប់តាំងពី​បើក​រដូវ​កាល​ថ្មី​មក ក្រោយពេល​ពួកគេ​លេង​ក្នុងផ្ទះ​បំបាក់​ក្លិប​កំសៀវ​តែ​ Queen Park Rangers ​ដោយ​លទ្ធផល​ ៤-០ ​។​ ​ក្រុម​ម្ចាស់ផ្ទះ​បានធ្វើការ​វាយ​សម្រុក​យ៉ាងខ្លាំង​ទៅលើ​ក្រុម​ភ្ញៀវ​ដោយ​ត្រឹមតែ​តង់​ទី​១​ប៉ុណ្ណោះ Manchester United ​អាច​បំប៉ោង​សំណាញ់​ទី​បាន​រហូតដល់​៣​គ្រាប់​គឺ​ស៊ុត​ដោយ​កីឡាករ Angel Di Maria (​អេ​ន​ជេ​ល​ ​ឌី​ ​ម៉ា​រៀ​)  ​នៅ​នាទី​ទី​២៤ ​ចំណែក Ander Herrera (​អាន​ឌើ​ ​ហើ​រ៉េ​រ៉ា​) ​ស៊ុត​នៅ​នាទី​៣៦ ​និង Wayne Rooney (​វ៉េ​ន​ ​រូ​នី​)  ​ស៊ុត​នៅ​នាទី​ទី​៤៤ ​។

​ ​ដោយឡែក​ការប្រកួត​នៅក្នុង​តង់​ទី​២ Manchester United ​អាច​រកបាន​មួយ​គ្រាប់​ទៀត​ដោយ​ថ្វី​ជើង​របស់ កីឡាករ Juan Mata (​ហួន​ ​ម៉ា​តា​) ​នៅ​នាទី​ទី​ ៥៨ ​។​ ​ចប់​ការប្រកួត Manchester United ​បំបាក់ Queen Park Rangers ​ក្នុង​លទ្ធផល​ ៤-០ ​។​ ​គួរ​បញ្ជាក់ថា​ ​ឆ្លងកាត់​ការប្រកួត​៤​លើក​កន្លងមក Manchester United ​កំពុង​ឈរ​នៅ​លំដាប់​ទី​៩​ក្នុង​តារាង  Premier League ​ដោយមាន​៥​ពិន្ទុ​ ៕ដោយផន សុខជាតិ