ខេត្តព្រះវិហារ៖ ការចុះសួរសុខទុក្ខកងកម្លាំងប្រដាប់អាវុធ ដែលកំពុងឈើជើងនៅទិសទី១ ប្រាសាទព្រះវិហារ និងការសន្យាកសាងសមិទ្ធផលថ្មី នៅលើកំពូលភ្នំត្បែងមានជ័យ ជូនប្រជាពលរដ្ឋ ១១៧នាក់ ស្មើនឹង ៣៨គ្រួសារ ដែលកំពុងរស់នៅទីនោះរបស់ អភិបាលថ្មី នៃខេត្តព្រះវិហារ លោក គីម រិទ្ធី បានធ្វើឡើងគ្រាដែលលោក បានដឹកនាំមន្ត្រីរាជការ ក្នុងរយៈពេល ២ថ្ងៃបន្តបន្ទាប់គ្នា គឺនៅថ្ងៃទី៦សីហា និងថ្ងៃទី៧សីហាឆ្នាំ២០២២ ក្រោយការប្រកាសចូលកាន់មុខតំណែងជាអភិបាលខេត្តថ្មី១ថ្ងៃ ដោយធ្វើដំណើរទៅអុជធូបនៅប៉ើយលោកតាឌី នៃប្រាសាទព្រះវិហារ នៅលើកំពូលភ្នំដងរ៉ែក ស្ថិតក្នុងជាំក្សាន្ត និងឡើងភ្នំត្បែង ដើម្បីបួងសួងសុំសេចក្តីសុខ ពីវត្ថុស័ក្កសិទ្ធនៅវត្តដំបូកខ្មៅ និងវត្តថ្មបីដុំ ដែលស្ថិតនៅលើកំពូលភ្នំត្បែងមានជ័យ នៅក្នុងស្រុកសង្គមថ្មី ខេត្តព្រះវិហារ។
ពិធីបួងសួងសុំសេចក្តីសុខចម្រើនពី បារមីលោកតាឌី អតីតមេទ័ពប្រចាំទិសប្រាសាទព្រះវិហារ និងការបន់ស្រន់សុំសេចក្តីសុខ ពីវត្ថុស័ក្កសិទ្ធនៅវត្តដំបូកខ្មៅ និងវត្តថ្មបីដុំ ដែលស្ថិតនៅលើកំពូលភ្នំត្បែងមានជ័យ របស់ អភិបាលខេត្តព្រះវិហារ លោក គីម រិទ្ធី ក្នុងរយៈពេល ២ថ្ងៃ ចុងសប្តាហ៍កន្លងមកនេះ ក៏មានការចូលរួមពីថ្នាក់ដឹកនាំខេត្ត ក្រុង ស្រុក មន្ទីរ អង្គភាព កងកម្លាំងប្រដាប់អាវុធទាំង ៣ប្រភេទ និងមន្ត្រីមូលដ្ឋាន ដ៏ច្រើនកុះករ ផងដែរ។
នៅក្នុងពិធីបួងសួងនោះ គឺបានធ្វើឡើងទៅតាមលំអានប្រពៃណី ដោយថ្វាយភ្លេងពិណពាទ្យ និងគ្រឿងសក្ការៈបូជាជាច្រើនមុខ ដើម្បីឧទ្ទិសដល់បារមីលោកតាឌី និងឧទ្ទិសដល់បារមីវត្ថុស័កសិទ្ធទាំងអស់នៅវត្តដំបូលខ្មៅ និងវត្តថ្ម៣ដុំ ប្រទានពរជ័យ សិរីមង្គល បវរមហាប្រសើរ ជូនដល់ថ្នាក់ដឹកនាំ មន្រ្តីរាជការ និងប្រជាពលរដ្ឋនៅទូទាំងខេត្តព្រះវិហារ ឲ្យជៀសផុតពីរោគាព្យាធិទាំងឡាយ និងបានចាកផុតពីជំងឺកូវីតដ-១៩ ។
លោក គីម រិទ្ធី បានបន្តឧទ្ទិសកុសលផលបុណ្យ ជូនដល់បុព្វការីជន យុទ្ធជន និងយុទ្ធនារី ដែលបានបូជាសាច់ស្រស់ ឈាមស្រស់ ក្នុងបុព្វហេតុរំដោះជាតិ រំដោះមាតុភូមិ ឱ្យឆ្លងផុតពីភពខ្មៅងងិត និងសង្គ្រាមរ៉ាំរ៉ៃ ដែលបានអូសបន្លាយ អស់រយៈកាលជាច្រើនឆ្នាំកន្លងមក រហូតធ្វើឱ្យប្រទេសជាតិ មានសុខសន្ដិភាព មានការអភិវឌ្ឍន៍រីកចម្រើនលើគ្រប់វិស័យ និងធ្វើឲ្យមានអ្វីៗគ្រប់យ៉ាងដូចសព្វថ្ងៃនេះ។
ក្រោយការបួងសួងរួច លោកអភិបាលខេត្ត ក៏បានចុះសួរសុខទុក្ខកងកម្លាំងប្រដាប់អាវុធ ដែលស្ថិតនៅតំបន់ព្រំដែន នៃទិសទី១ ប្រាសាទព្រះវិហារ ក្នុងបុព្វហេតុការពារបូរណភាពទឹកដី និងការពារអធិបតេយ្យកម្ពុជា ដោយឈរលើស្មារតីទទួលខុសត្រូវខ្ពស់។
ដោយឡែក នៅឯលើកំពូលភ្នំត្បែងមានជ័យនោះវិញ លោកអភិបាលខេត្ត ភរិយា ក្រុមគ្រួសារ និងមន្ត្រីរាជការទាំងអស់ ក៏បានអុជធូបបួងសួង សុំសេចក្តីសុខសប្បាយ ពីវត្ថុស័ក្កសិទ្ធដែលថែរក្សានៅវត្តដំបូកខ្មៅ និងវត្តថ្មបីដុំ ហើយលោកក៏បានសន្យាជាមួយប្រជាពលរដ្ឋ ១១៧នាក់ ដែលមានចំនួន ៣៨គ្រួសារ កំពុងរស់នៅលើកំពូលភ្នំត្បែងនោះថា លោកនឹងកសាងសមិទ្ធផលថ្មីបន្ថែមទៀត ជូនពួកគាត់ ដូចជា សាលារៀន ប៉ុស្តិ៍សុខភាព ប្រព័ន្ធទឹកស្អាត និងផ្តល់ជូនធុងចម្រោះទឹកស្អាត ជាការឆ្លើយតបតាមសំណូមពររបស់ប្រជាពលរដ្ឋ និងដើម្បីផ្តល់លទ្ធភាពឲ្យកូន ចៅរបស់ពួកគាត់ ទទួលបានសេវាសាធារណៈគ្រប់គ្រាន់ពី អាជ្ញាធរខេត្ត និងរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី និងជាប្រធានគណបក្សប្រជាជនកម្ពុជា។
អភិបាលថ្មី ខេត្តព្រះវិហារ លោក គីម រិទ្ធី បានថ្លែងថា នៅក្នុងពេលនេះក្រៅពីមកអុជធូបបួងសួងសុំសេចក្តីសុខសប្បាយ ពីវត្ថុស័ក្កសិទ្ធនៅវត្តដំបូកខ្មៅ និងវត្តថ្មបីដុំ ដែលស្ថិតនៅលើកំពូលភ្នំត្បែងមានជ័យ លោកក៏មានបំណងស្វែងយល់ ពីការរស់នៅរបស់បងប្អូនប្រជាពលរដ្ឋ នៅលើខ្នងភ្នំនេះផងដែរ។ លោកអភិបាលខេត្ត ក៏បានថ្លែង កោតសរសើរដល់ប្រជាពលរដ្ឋ ដែលបាន និងកំពុងរស់នៅទីនេះ ហើយបានចូលរួមថែរក្សាបរិស្ថាននៅលើភ្នំនេះ បានយ៉ាងល្អប្រសើរ។
បន្ទាប់មក លោកអភិបាលខេត្ត និងភរិយា បានឧបត្ថម្ភថវិកា ជូនដល់ប្រជាពលរដ្ឋ ៣៨គ្រួសារ ក្នុងមួយគ្រួសារៗ ទទួលបានថវិកា ១០ម៉ឺនរៀល ប្រគេនព្រះសង្ឃ ៥អង្គ ក្នុង១អង្គបច្ច័យ ៣០ម៉ឺនរៀល និងបានប្រគេនបច្ច័យមួយចំនួន ទុកសម្រាប់កសាងវត្តដំបូកខ្មៅ និងវត្តថ្ម៣ដុំ ដែលស្ថិតនៅលើកំពូលភ្នំត្បែងមានជ័យនោះ ថែមទៀតផង៕ដោយ៖ឡុង សំបូរ
