ភ្នំពេញ ៖ រថយន្តហ៊ីយ៉ាន់ដាយ ពណ៌ស១គ្រឿងបានធ្វើដំណើរតាមបណ្ដោយផ្លូវវ៉េងស្រេងដោយសារតៃកុងរថយន្តស្រវឹងស្រា ក៏បានរ៉េចង្កូតទៅបុកគូទរថយន្តហ៊ីយ៉ាន់ដាយប្រភេទយីឌុបដឹកអុសចំពីចំហៀងផ្នែកខាងឆ្វេងបណ្តាលឲ្យរថយន្តខ្ទេចផ្នែកខាងមុខយ៉ាងដំណំចំណែកតៃកុងរថយន្តរងរបួសជើងត្រូវបានរថយន្តសាមុយមន្ទីរពេទ្យឯកជនដឹកបញ្ជូនសង្គ្រោះភ្លាមៗ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១២ និង ៤៥នាទីរំលងអាធ្រាត្រឈានចូលថ្ងៃទី២៦ខែកុម្ភៈឆ្នាំ២០១៤ ត្រង់ចំណុចមុខរោងចក្រតំឡើងម៉ូតូហុងដា តាមបណ្ដោយផ្លូវវេងស្រេងស្ថិតក្នុងសង្កាត់ត្រពាំងថ្លឹង ខណ្ឌពោធិ៍សែនជ័យ។
ប្រភពព័តមានពីកន្លែងកើតហេតុបានឱ្យដឹងថា គេបានឃើញរថយន្តហ៊ីយ៉ាន់ដាយធុនតូច ពណ៌ស ពាក់ស្លាកលេខ ភ្នំពេញ 2H-3765ធ្វើដំណើរដោយជិះគ្នា៤ទៅ៥នាក់តាមផ្លូវវ៉េងស្រេង ពីទិសដៅកើតទៅលិចខណៈមកដល់មុខរោងចក្រតំឡើងម៉ូតូហុងដាក៏បានជ្រុលទៅបុកគូទរថយន្តហ៊ីយ៉ាន់ដាយប្រភេទយីឌុបដឹកអុសពណ៌ខៀវលាយស ១គ្រឿង ពាក់ស្លាកលេខ យ.១១១១ ភព៣ ចំពីចំហៀងផ្នែកខាងឆ្វេងបណ្តាលឲ្យរថយន្តខូចខាតផ្នែកខាងមុខខ្ទេចចំណែកតៃកុងគាបជាប់ក្នុងរថយន្តរងរបួសជើង។
បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍នៅកន្លែងកើតហេតុ និងហៅសាមុយមន្ទីរពេទ្យឯកជនដឹកបញ្ជូនជនរងគ្រោះទៅសង្គ្រោះភ្លាមៗ និងបានទំនាក់ទំនងទៅសមត្ថកិច្ចជំនាញចរាចរធ្វើការវាស់វែងនិងនាំយករថយន្តទាំង២គ្រឿងរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដើម្បីរង់ចាំដោះស្រាយគ្នាជាក្រោយ។
គួរបញ្ជាក់ថាចំពោះហេតុការណ៍គ្រោះថ្នាក់ចរាចរខាងលើនេះគឺបានមកពីតៃកុងរថយន្តហ៊ីយ៉ាន់ដាយបើកបរទាំងស្ថានភាពស្រវឹង ហើយប្រើល្បឿនលឿន ខ្វះការប្រុងប្រយ័ត្ន ទើបបង្កអោយមានគ្រោះថ្នាក់បែបនេះ សំណាងដែលមិនបណ្ដាលអោយនរណាម្នាក់រងគ្រោះដល់អាយុជីវិត៕
