ភ្នំពេញ ៖ លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ច តំណាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញប្រារព្ធពិធីរាបបាត្រ រំដោះកម្ម ឧទិ្ទសកុសល ជូនអ្នកដែលបានស្លាប់ ចំនួន១៤០០០នាក់ នៅសារមន្ទីរជាតិ
ទួលស្លែង និងដើម្បីឧទ្ទិសកុសលផលបុណ្យជូនដល់វិញ្ញាណក្ខន្ឋ អ្នកមានគុណ និងជូនចំពោះយុទ្ធជនអង់អាចក្លាហាន ដែលពលីជីវិតដោយសារការពារទឹកដីមាតុភូមិ ព្រមទាំងឧទ្ទិសកុសលបុណ្យនេះ ដល់វិញ្ញាណក្ខន្ឋ ប្រជាជនខ្មែរស្លូតត្រង់ រាប់លាននាក់ ដែលបានស្លាប់ទាំងអយុត្តិធម៌ ក្រោមអំពើសាហាវយង់ឃ្នង បំផុតក្នុងរបបប៉ុលពត ពិសេសការ ធ្វើទារុណកម្មយ៉ាងព្រៃផ្សៃ នៅក្នុងសារមន្ទីរជាតិនេះតាំងពីឆ្នាំ១៩៧៥ -១៩៧៩ ។
ពិធីរាបបាត្រនេះបានប្រព្រឹត្ដទៅកាលពីព្រឹកថ្ងៃទី១៨ ខែកញ្ញា ឆ្នាំ២០១៤ ស្ថិតនៅសារមន្ទីរ ជាតិទួលស្លែង ក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ។ ក្នុងឱកាសនោះលោកស្រី និងថ្នាក់ដឹកនាំមន្ដ្រីរាជការក្រសួងវប្បធម៌និងវិចិត្រសិល្បៈក៍បាននាំយកបច្ច័យមួយចំនួនវេប្រគេនដល់ព្រះសង្ឃ និង រាបបាត្រ ដល់ព្រះសង្ឃចំនួន៣៦ អង្គ ព្រមទាំងគ្រឿងឧបភោគ បរិភោគភេសជ្ជៈមួយចំនួនទៀតផងដែរ ។
លោកស្រី ម៉ែន សំអន បានថ្លែងនូវការអរគុណចំពោះថ្នាក់ដឹកនាំបុគ្គលិកមន្ត្រីរាជការ ទាំងអស់ក្នុងក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ច និង ខុទ្ទកាល័យគណៈរដ្ឋមន្ត្រី ក៏ដូចខាងក្រសួងវប្បធម៌ និងវិចិត្រសិល្បៈអាជ្ញាធរ គ្រប់លំដាប់ថ្នាក់ដែលបានចំណាយថវិកា និងកម្លាំងកាយចិត្តចូលរួមក្នុងពិធីបុណ្យកាន់បិណ្ឌ នៃរដូវភ្ជុំបិណ្ឌប្រពៃណីខ្មែរយើង និង សូមជូនពរឲ្យប្រាថ្នាអ្វីៗបានដូចបំណង។ 
ជាមួយគ្នានោះលោកស្រី ក៍បានបួងសួងសូមឲ្យវត្ថុសក្ដិសិទ្ធិក្នុងលោកតាមជួយបីបាច់ថែរក្សា សម្ដេចតេជោ និង សម្ដេចកិតិព្រឹទ្ធបណ្ឌិត ក្រុមគ្រួសារសាច់ញាតិទាំងអស់ និង ប្រជាពលរដ្ឋខ្មែរទូទាំងប្រទេសជួបតែសុខសន្តិភាព និងការអភិវឌ្ឍន៍ ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីជារៀងរហូត ៕ 
